• KJFC Diskuti Proposta Akizisaun Ekipamentu Médiku Ba Prevensaun No Mitigasaun Covid-19

Home » Announcements » KJFC Diskuti Proposta Akizisaun Ekipamentu Médiku Ba Prevensaun No Mitigasaun Covid-19 Print Page

KJFC Diskuti Proposta Akizisaun Ekipamentu Médiku Ba Prevensaun No Mitigasaun Covid-19

20200426_Konsellu Fundu Covid-19 Halo Reuniaun Urujenti Hodi Diskuti Proposta Akizasaun Ekipamentu Médiku

Auditorium Ministériu Finansas Loron 26 Fulan Abril 2020 – Ekipa Konsellu Jestaun Fundu Covid-19 (CGFC) halo reuniaun hodi responde ba pedidu urjente husi Sentru Integradu Jestaun Krize (SIJK) nomós husi Ministériu Saúde hodi bele aprova proposta akizisaun ekipamentu médiku ba iha prevensaun no mitigasaun Covid-19.

Ministra Finansas interina i Atuál Vise-Ministra Sara Lobo Brites hateten ohin Konsellu Jestaun Fundu Covid-19 reuniaun dala ida tan. Tanba pedidu urjente husi Sentru Integradu Jestaun Krize (SIJK) nomós husi Ministériu Saúde atu bele aprova proposta akizisaun ekipamentu ba médiku ba iha prevensaun no mitigasaun Covid-19. Iha desizaun ohin tanba hafoin rona tiha esplikasaun husi diretór sira husi Ministériu Saúde, no mós rona esplikasaun husi sekretariadu tékniku. Entaun konsellu jestaun konfirma programa no orsamentu globál ne’ebé mak horseik aprova tiha ona iha konsellu jestaun. Proposta ne’ebé ohin aprezenta provavelmente iha mudansas ba nia montante mós kestaun sira iha rekisitus legais no rekisitus tékniku liga ho fundu Covid-19 ne’e rasik. Ohin Konsellu Jestaun konsidera ida-ne’e urjente lós, i husu fila-fali Ministériu Saúde atu iha tempu badak kompleta rekisitus sira-ne’e hodi bele aprezenta fila-fali mai iha konsellu para halo aprovasaun.

“Purtantu ohin la konsege halo aprovasaun tanba depois de rona esplikasaun mai rasik husi Ministériu Saúde hatudu katak, sei presiza Ministériu Saúde kompleta prosesu legais nomós prosesu administrativu balun. Ida-ne’e maka konsellu jestaun fundu sujere sira urjente trata ida- ne’e iha loron hira nia laran. I lori fila-fali mai para bele iha aprovasaun finál ba sira-nia atividades, ho nune’e bele hahuu nia prosesu sira selu-seluk. ”, informa Ministra Finansas interina i Atuál Vise-Ministra Sara Lobo Brites.

Governante ne’e reforsa tan katak, orsamentu ba iha kompra ida-ne’e enkuadra tiha ona iha programa no sub-programa ho nia orsamentu globál ne’ebé horseik aprova purvolta $6 millaun itál. Ohin tékniku sira husi Ministériu Saúde aprezenta iha inkrementu ba iha proposta. Tanba iha duni nesesidade urjente atu hola ekipamentu para atu fó apoiu kondisoens ba ita-nia hospitál no sentru saúde sira. Iha duni inkrementu purvolta 50 pursentu husi 6 millaun ne’e, ami seidauk iha nia montante lolos, tanba ohin tékniku sira aprezenta katak, sira presiza reve atu sosa ekipamentu sira tuir ita-nia nesesidade, hakarak konfirma mós ho kompañia para bele fó sertifikasaun. Kompañia sei prontu duni hatama dokumentu ho nia ekipametu tuir rekijitus ne’ebé ita-nia Ministériu Saúde husu.

“Tanba ne’e maka la iha montante ida fiksu ohin maibé iha inkrementu 50 pursentu husi 6 millaun ne’ebé aprovadu tiha ona horseik”, esplika governante.

Ministra Finansas interina i Atuál Vise-Ministra Sara Lobo Brites informa tan katak, ekipamentu iha akizisaun ida-ne’e maka sira ohin bolu kontentores ka Ichio Movel ne’ebé maka kompletu ho nia aparellu sira hotu no kompleta mós ho toilet iha laran. Tanba moras ida Covid-19 ne’e tenki iha duni ekipamentu ho kondisaun balun para atu hela iha kontentór nia laran. Purtantu Kontentor ne’e kontribui ba montante sa’e i hola mós ho ventiladores, kama móvel automátiku, luvas propriu ba profisionál saúde nian, maskara, PPE, sapatu i botas ba profisioál saúde sira.

“Ida-ne’e ekipamentu ida urjente ne’ebé ita tenki trata duni no Ministéru Saúde tenki kompleta nia dokumentasaun no prosesu sira hotu fundu bele apresa nia aprovasaun, reforsa Ministra.
Ohin iha enkontru ne’e partisipa husi Membru Konsellu Jestaun Fundu, Sekertariadu Tékniku nomós membru husi Sentru Integradu Jestaun Krize inklui mós diretór sira husi Ministériu Saúde. Sira hotu partisipa ativu hodi diskuti proposta ida-ne’ebé maka Ministériu Saúde aprezenta atu sosa ekipamentu husi Corea.