• Komunikadu Imprensa: Klarifikasaun husi Ministériu Finansas Relasiona ho notísia husi Fontes PosKupang.com

Home » Announcements » Komunikadu Imprensa: Klarifikasaun husi Ministériu Finansas Relasiona ho notísia husi Fontes PosKupang.com Print Page

Komunikadu Imprensa: Klarifikasaun husi Ministériu Finansas Relasiona ho notísia husi Fontes PosKupang.com

Atravez husi Komunikadu Imprensa ida ne’e, Ministériu Finansas presiza halo klarifikasaun ba notísia ne’ebé publika sai husi media PosKupang.com iha loron Segunda, 9 Marsu 2020 tuku 09:13 dadersan, ne’ebé hateten husi Imigrasaun Atambua, KA Halim – atravez husi Sekretaris I Kantor Perwakilan KBRI Dili iha Oecusse, katak iha Oecusse sidadaun Italiano ida ne’ebé serbisu iha Ministériu Finansas identifikadu pozitivu ho moras COVID-19 (Corona Virus).

Uluk nanain, Ministériu Finansas Timor-Leste justifika/konfirma katak informasaun ne’ebé hato’o katak sidadaun Italiano refere ne’e serbisu iha Ministériu Finansas ne’e LA LOS tanba :
1. Tuir lista Diresaun Nasional Rekursu Humanus Ministériu Finansas, Timor-Leste laiha assessor ka konsultor internasional husi nasaun Italia.
2. Sedauk iha pesoal no individu ruma husi Ministériu Finansas tantu Internasional no Nasional maka suspeitadu ba moras Virus CORONA

Tuir mai, Ministériu Finansas mós hato’o ba Imigrasaun Atambua no media lokal sira iha Timor laran tomak, atu halo konfirmasaun antes ho Ministériu Saúde hodi konfirma status ikus ba sidadaun Italiano refere, molok hasai informasaun, publikasaun hodi evita akuzasaun arbiru no passa informasaun inkorretu atravez media. Ho informasaun hanesan ne’e julga no iha tendénsia estraga naran Ministériu Finansas Timor-Leste.

Hein katak informasaun ne’ebé Ministériu Finansas Timor-Leste passa agora bele fó klareza ona ba publikasaun husi media online inklui publikasaun media internasional hanesan PosKupang.Com no husu ba media refere hodi hatun/muda informasaun refere.

Mak ne’e deit klarikfikasaun husi Ministériu Finansas Timor-Leste, ba ita-boot sira nia atensaun no kolaborasaun la haluha hato’o agradese wain.

Diresaun-Jeral Servisus Koorporativus – Ministériu Finansas.