• KM Aprova Ona DOT Fulan-Marsu Nian

Home » Anúnsiu » KM Aprova Ona DOT Fulan-Marsu Nian Imprime pájina

KM Aprova Ona DOT Fulan-Marsu Nian

Governu liuhusi reuniaun Konsellu Ministru aprova ona Dotasaun Orsamentál Temporária (DOT) ba Fulan-Marsu Tinan 2020 ho montante $ 116.449.057 millaun.

Tuir Ministra Finansas ezersisiu i Atual Vise-Ministra Finansas, Sara Lobo Brites hateten ita hotu-hotu akompaña atribuisaun DOT ba Fulan-Marsu hanesan loloos kedas montante ne’ebé atribui iha Fulan-Janeiru no Fevereiru ho montante $ 116.449.057. Nia distribuisaun ba kategoria mós nafatin hanesan saláriu i vensimentos $17.852.076, bens i servisu $ 38.640.980, transferénsia publika $ 26.591.048, kapitál dezenvolvimentu $ 33.390.953. Iha Dotasaun Orsamentál Temporária (DOT) ba Fulan-Marsu ita nafatin esklui kapitál minór.

“Purtantu ida-ne’e maka ohin Konsellu Ministru delibera, i osida loraik sei lansa ba sistema para ministériu ida-idak bele hahú halo sira-nia ezekusaun Fulan-Marsu nian. Informa Ministra Finansas ezersisiu i Atual Vise-Ministra Finansas, Sara Lobo Brites iha Palasiu Governu ohin Loron 04 Fulan-Marsu 2020.

Hatan kona-ba funsionáriu balun seidauk simu-nia saláriu Governante ne’e esplika katak, husi ministériu nia parte ita atribui DOT ne’e bazeia ba orsamentu 2019 maka sai nia sasukat. Entaun kategoria sira-ne’ebé maka hanesan saláriu i vensimentu liu-liu ida-ne’ebé selu mensál ne’e ita kobre ona nesesidade kada instituisaun nian. Ministériu Finansas presiza halo asaun ruma kona-ba ida-ne’e, tanba disitribusaun ba Ministériu idak-idak iha ona. Sira maka tenki hatene jerente sira-nia orsamentu, tanba DOT ne’e ita aplika ba fulan ida de’it, entaun to’o iha fulan ikus ita tenki taka.

“Ida-ne’e signifika ministériu sira tenki servisu i esforsa an liutan tanba servisu ho nia velosidade ne’e la normál hanesan ita-nia orsamentu baibain no tenki sukat tempu fulan-ida”.

Exemplu Fulan-Fervereiru nia loron ne’e menus liutan entaun tenki hakas-an servisu molok atu taka konta bele selu ema hotu-hotu nia saláriu.

A naun ser kontratu foun ne’e maka hau la iha informasaun. Atu kontratu husi saláriu i vensimentu ka bens i servisu nia distribusuan bazeia ba 2019 no laiha problema ruma maka loloos bele akontese.

Hatan kona-ba saldo kaixa estadu ne’ebé hahú menus Ministra Finansas i Atual Vise Ministra Finansas Sara Lobo Brites informa ba Fulan-Marsu ita-nia saldo sei naton hela, ita iha $ 215 millaun ne’ebé ita aprova tiha DOT Marsu ho montante $116.449.057 ida-ne’e sei naton hela ba fulan-Marsu. Ba oin saldo ba Fulan-Abril ida ne’e konformi desizaun ita-nia líder sira senukazu saldo la to’o ita iha mekanismu ida presiza aprezenta ba iha Konsellu Ministru i Aprezenta mós ba iha Parlamentu Nasionál kuandu saldo la to’o.