• KM Aprova Ona Orsamentu Duodésimu Fulan-Abril Nian

Home » Announcements » KM Aprova Ona Orsamentu Duodésimu Fulan-Abril Nian Print Page

KM Aprova Ona Orsamentu Duodésimu Fulan-Abril Nian

Governu liuhusi enkontru Konsellu Ministru aprova ona deliberasaun Governu kona-ba tetu Orsamentu Duodesimu ba Fulan-Abril nian ho montante $ 114.887.000 la inklui imprestimu.

“Konsellu Ministru aprova prozetu deliberasaun Governu ne’ebé aprezenta husi Ministra Finansas interina i Atuál Vise-Ministra, Sara Lobo Brites, kona-bá tetu orsamentu ba Fulan-Abril iha ambitu rejime duodésimu ho valor totál $ 114.887.000 la inklui imprestimu”. Deliberasaun ida-ne’e preve despeza relasiona ho akizisaun ba aimoruk no ekipamentu sira hodi hatan ba Covid-19, pagamentu ba pensaun, no arrendamentu ba instalasaun misaun diplomatika sira”, haktuir Komunikadu Imprensa ne’ebé distribui iha Centru Convenção Dili (CCD) hafoin enkontru Konsellu Ministru iha loron 01 Fulan-Abril 2020.

Ida-ne’e prevista iha deliberasaun suspensaun ba despeza durante vijénsia estadu emerjénsia hodi halo redusaun mak hanesan, despezas ne’ebé relasiona ho viajen lokál sira no viajen estranjeiru, organiza formasaun, semináriu no mantensaun ba veikulus sira.

Konsellu Ministru mós aprova projetu dekretu governu ne’ebé aprezenta husi Ministra Finansas interina kona-ba alterasaun dahuluk ba dekretu Governu N0 1/2020 loron 15 Fulan-Janeiru kona-ba ezekusaun iha rejime duodesimu iha tinan finanséiru 2020 nian. Alterasaun ida atu fó dalan hodi realiza atividade normál ba estadu nian. No iha mós posibilidade ezekusaun husi despezas publikas sira too limiti ne’ebé fiksa ona iha Orsamentu Jerál Estadu uluk nian no estabelese kunjuntu ida hodi salva guarda no garantia jestaun ida-ne’ebé prudente ba dotasaun orsamentu.

“Dekretu Governu aprovadu ona no preve konjuntu hosi ezekusaun ba rejime duodesimál no iha posibilidade hodi rejolve konjuntu husi konstranjimentu ne’ebé impede estadu hodi kumpri integralmente nia obrigasaun. Mak hanesan resposta ba situasaun atuál husi emerjénsia provoka husi pendemia Covid-19 no krize ekonómia relasiona ho situasaun sira”, tuir Komunikadu Imprensa.

Iha fatin hanesan, Ministra Finansas interina i atuál Vise-Ministra, Sara Lobo Brites, aprezenta mós projetu dekretu Governu ida-ne’ebé aprova hosi Konsellu Ministru refere ba alterasaun dahuluk hosi dekretu Governu No 3/2019 loron 27 Fulan-Marsu kona-ba ezekusaun Orsamentu Jerál Estadu tinan 2019. Alterasaun ne’e atu fó dalan hodi realiza despezas ne’ebé iha relasaun ho prevensaun no kombate Covid-19 ho urgência no ho ajilidade mak hanesan despezas ne’ebé relasiona ho servisu aviasaun no ho kontribuisaun sira hodi organiza internasionais antes verifika ba efetiva prestasaun servisu ka entrega ba beins sira.