• KM Aprova Ona Proposta Lei OJE 2020

Home » Anúnsiu » KM Aprova Ona Proposta Lei OJE 2020 Imprime pájina

KM Aprova Ona Proposta Lei OJE 2020

20191223_KM Aprova Ona Proposta Lei OJE 2020

Palásiu Governu-Díli 19 Dezembru 2019– Konsellu Ministru aprova ona Proposta Lei Orsamentu Jerál Estadu (OJE) 2020 ho montante $ 1.668 ne’ebé aprezenta hosi Ministra Finansas en ezersísiu, Sara Lobo Brites.

Liuhosi Komunikadu Imprensa, Konsellu Ministru aprova ona proposta Orsamentu Jerál Estadu nian ba tinan 2020 ne’ebé ho despeza públika estimada ho montante $ 1.668. Inklui reseita ne’ebé mai hosi RAEOA-ZEEMS, UE no Empréstimu, hodi kobre ba nesesidade tomak programa no prioridade nasionál sira ne’ebé VIII Governu Konstitusionál defini ona.

“OJE 2020 prepara haktuir ba prinsípiu fundamentál lima maka hanesan; Sustentabilidade fiskál iha tempu médiu no longu prazu, aliñamentu ho prioridade nasionál sira, kapasidade ezekusaun orsamentál, kapasidade halo absorsaun ba ekonómia lokál no kualidade orsamentu nian”. Haktuir komunikadu.

Relasiona ho preparasaun OJE 2020, Primeiru-Ministru agradese tebes ba ekipa traballu ne’ebé halo revizaun ba OJE 2020, ne’ebé kria iha loron-4 Dezembru. Lidera hosi Ministru Estadu Prezidénsia Konsellu Ministrus, Agio Pereira, Ministra Finansas, Sara Lobo Brites, Ministru Transporte no Komunikasaun, José Agustinho da Silva no Ministra Edukasaun, Juventude no Desportu, Dulce de Jesus Freitas.

Proposta foun ba OJE 2020 ne’e sei haruka fila-fali ba Parlamentu Nasionál iha loron- 19 fulan Dezembru tinan 2019 oras 5:30 loro-kraik.