• KM Aprova Ona Regra No Prosedimentu Ezekusuan Fundu Covid-19

Home » Announcements » KM Aprova Ona Regra No Prosedimentu Ezekusuan Fundu Covid-19 Print Page

KM Aprova Ona Regra No Prosedimentu Ezekusuan Fundu Covid-19

Governu liuhusi reuniaun Konsellu Minsitru (KM) aprova ona dekretu ezekusaun fundu Covid-19 ne’ebé aprezenta husi Ministra Finansas em exercíciu i Atuál Vise-Ministra Sara Lobo Brites ho objetivu atu bele estabelese regra no prosedimentu ba iha ezekusaun husi atividade ne’ebé maka mai husi Ministériu.

Tuir Ministra Finansas em exercíciu i Atuál Vise-Ministra Sara Lobo Brites hateten, objetivu husi dekretu ezekusaun ida ohin atu bele estabelese regras no prosedimentu ba iha ezekusaun husi atividades ne’ebé maka mai husi Ministériu sira iha ambitu prevensaun no konbate Covid-19. Entaun regras ne’ebé hatu’ur iha ne’ebá maka proposta hotu-hotu husi ministériu sira sei kanaliza ba iha konsellu interministériál hodi hetan apresiasaun. Hafoin husi konsellu interministériál komisaun fundu Covid-19 hodi bele reve no prepara nia kabementu orsamentu nomós prepara nia pagamentu depende ba pedidu husi ministériu ida-idak.

“Bazikamente dekretu ne’e ohin ko’alia liu-liu kona-ba ninia oinsa atu operasionaliza fundu ne’e rasik no dekretu ezekusaun ne’e ko’alia lo’os de’it ba fundu Covid-19”, informa Ministra Finansas em exercíciu i Atuál Vise-Ministra Sara Lobo Brites iha Centru Convenção Dili (CCD) hafoin enkontru Konsellu Ministru loron 15 Fulan-Abril 2020.

Governante ne’e esplika, dekretu ne’e ohin hetan aprovasaun no sujeitu ba iha alterasaun ki’ik balun liu-liu durasaun tempu ne’ebé maka komisaun konsumu presiza para bele prosesa pedidu ruma husi ministériu sira. Saida maka komisaun fundu Covid-19 halo servisu hamutuk ho sentru intergradu jestaun krizi ho mós komisaun interministériál sei estabelese prosesu ida ho forma transparente. Hanesan ita hotu akompaña embora fundu ne’e nia prosesu sei la’o hela ba nia aprovasaun kuadrus legais, maibé akizasaun ba kompras sira ita realiza ona antes. Tanba ita tenki duni tuir tempu atu bele hetan sasan sira ho lalais.

“Iha despezas lubuk ida maka realiza ona liuhusi fundu rezerva kontizensia. Uainhira fundu ida ne’e tama ona iha operasaun ka operasionaliza ona ita sei reazusta fila-fali despezas ne’ebé akontese tiha ona ba hotu iha fundu ligadu ho despezas ne’ebé fundu Covid-19 iha” hateten Ministra Finansas em exercíciu i Atuál Vise-Ministra Sara Lobo Brites.

Ministra Finansas em exercíciu i Atuál Vise-Ministra Sara Lobo Brites mós reforsa tan, purtantu nia prosesu ita sei tenta halo ho trasparansia para ema hotu-hotu bele asesu ba informasaun. Tanba fundu ne’e distinadu para atu ba de’it Covid-19 nian. Ministériu Finansas hare’e hela forma saida maka bele divulga informasaun sira ne’e ho forma ida mais trasparante la’os de’it ba públiku maibé mós ba Parlamentu Nasionál liu-liu komisaun finansas públika sira mós bele halo akompañamentu oinsa ita ezekuta fundu Covid-19. Manéira publika hanesan forma ida portál governu ida ne’e hanesan opsaun ida ne’ebé ami hare’e hela. Mais tanba iha portal tarasparensia ne’e fó de’it númeru, ita hakarak liu fó informasaun la’os de’it númeru maibé nia atividade ho nia impaktu ba iha nia ezekusaun.

“Purtantu ita la’os hare’e de’it husi parte nia númeru maibé hakarak hare’e lolos ninia atividade sira hotu, ami hare’e hela forma ida oinsa maka ami bele publika ida ne’e”. hateten Ministra Finansas em exercíciu i Atuál Vise-Ministra Sara Lobo Brites.

Fundu ne’e kria liuhusi dekretu lei n0 2/2020 loron 6 Fulan-Abril no regulamenta husi dekretu-Lei n0 12/2020 loron 14 Fulan-Abril ho ojetivu atu finansia despezas sira ne’ebé relasiona ho prevensaun no komvate Covid-19.