• KOMISAUN REFORMA FISKAL HALAO KONSULTA HO SEITOR PRIVADU

Home » Announcements » KOMISAUN REFORMA FISKAL HALAO KONSULTA HO SEITOR PRIVADU Print Page

KOMISAUN REFORMA FISKAL HALAO KONSULTA HO SEITOR PRIVADU

Sorumutu ida ne’e partisipa husi Prezidente CCI-TL no emprezario/a sira hodi fó sira-nia hanoin konaba esbosu lei lubun ida hanesan – Kódigu Aduaneiru, Impostu no IVA ne’ebé sei aprezenta ba Konsellu Ministru iha tempu badak nia laran.

Dili – Komisaun Reforma Fiskal (KRF), reprezenta Ministériu Finansas, halao konsulta ba dala-ikus ho seitor privadu hodi rona sira-nia hanoin konaba esbosu lei importante tolu hanesan Kódigu Aduaneiru, Impostu no IVA (Impostu Valor Akresentadu). Sorumutu ida ne’e halo iha loron kinta, 29 Setembru 2016 iha Knowledge Centre, edifísiu Ministériu Finansas.

Vice Ministru Finansas, Sr. Helder Lopes, iha ninia intervensaun hateten “Governu harii KRF ho objetivu rua. Atu aumenta reseitas doméstikas ba ita-nia Estadu no atu hadia efisiénsia no efikasia iha despezas públikas”. Nia mós hatutan katak liu tiha tinan ida hafoin KRF hahú ninia servisu, rezultadu servisu balun prontu-ona atu aprezenta ba Konsellu Ministru, liu-liu, esbosu lei konaba Kódigu Aduaeiru, Impostu no IVA. Lei tolu ne’e, tenik Vice Ministru, sei aprezenta ba KM iha fulan Outubru nia laran no lei rua seluk sei presiza diskute iha Parlamentu Nasional no hafoin hato’o ba Prezidente Rupúblika hodi hetan promulgasaun.

Vice Ministru mós hatutan tan katak tan lei hirak ne’e sei fó impaktu ba seitor privadu wainhira implementa, nune’e KRF hakarak halao konsulta ikus ho seitor privadu, liu-liu CCI-TL hodi rona sira-nia hanoin no akomoda ba iha finalizasan lei hirak ne’e. Nune’e wainhira lei hirak ne’e implementa bele fasilita seitor privadu ninia investimentu hodi hamutuk ho governu dezenvolve ekonomia nasaun ida ne’e nian ba nivel ida sustentável. Antes remata ninia intervensaun badak, Vice Ministru informa katak prinsípiu importante ida ne’ebé Governu opta wainhira implementa reforma hirak ne’e maka proteje povu kiak ho rendimentu ki’ik.
Iha biban hanesan mós Koordenadora KRF, Sra. Fernanda Borges, hateten KRF hamutuk ho Vise Ministru Finansas hakarak hato’o ba emprezariu sira informasaun konaba programa reforma fiskal nian ne’ebé atu fó apoiu ba emprezariu sira iha rai-laran, em termus de benefísius no impaktus no mós inisiativas no polítikas Governu nian hamutuk ho KRF bele halo ba komérsiu no emprezariu sira, liu-liu timor-oan sira hodi sai buras liu tan iha Timor-Leste.

Nia mós hatutan tan katak informasaun ne’e importante ba seitor privadu sira atu nune’e emprezariu sira bele fó sira-nia opiniaun atu nune’e servisu hamutuk apoia malu em termus kria baze-ekonómika ida ne’ebé bele fó servisu ba ema halo lukru bo’ot hodi bele kompete ho rai seluk no iha kresimentu ekonómiku no aumenta reseitas doméstikas ba Estadu, atu nune’e Governu bele iha osan barak hodi selu prestasaun de servisus no fó biban ba Estadu atu investe ba dezenvolvimentu nasional.

Husi parte CC-ITL nian, ne’ebé reprezenta husi Sr.Oscar Lima, hateten sorumutu ida ne’e importante tebes, tamba CCI-TL rasik maka husu atu konvoka reuniaun ida ne’e ho Koordenadora ba KRF hodi bele hato’o ho klean liu tan informasaun konaba reforma refere. Nia tenik katak “tanba ami mak sei implementa, liu-liu emprezariu sira no CCI-TL atu nune’e sira fila ba munisípiu hodi hato’o ba emprezariu sira seluk bainhira selu impostu kma’an no la-todan hanesan Koordenadora KRF Dra. Fernanda hateten ona no iha mós benefisiu liu husi retornu ne’ebé emprezariu sira selu”.

Iha fatin hanesan Sr. Clarisa Lay husi kompañia Jacinto Group fó mós nia komentáriu katak hanesan emprezariu sira laiha difikuldade tanba ne’e lei ne’ebé entidades hotu deside, emprezaria mós esforsu oinsá atu halo investimentu ne’ebé sei hetan lukru hodi responde ba governu nia presiza hodi kontribui ba dezenvolvimentu nasaun nian no fó oportunidade ba investidór sira atu investe no selu taxa tuir lei ne’ebé maka vigora.