• Komunikadu ba Imprensa Governu Timor-Leste Lansa Polítika Asistensia Esterna

Home » Anúnsiu » Komunikadu ba Imprensa Governu Timor-Leste Lansa Polítika Asistensia Esterna Imprime pájina

Komunikadu ba Imprensa Governu Timor-Leste Lansa Polítika Asistensia Esterna

For news

Dili, 1 Jullu 2019

Governu Timor-Leste sei lansa dokumentu foun konaba “Polítika Asistensia Esterna” iha loron 4 Jullu 2019, ne’ebe sei realiza iha Auditorium Xanana Gusmão Ministériu Finansas. Politika Asistensia Esterna ida ne’e bazeia ba prinsipius ne’ebe hetan konkordansia hamutuk iha Deklarasaun París 2005 no reafirma hikas fali hosi Ajenda Accra kona-ba asaun 2008 nian no mos Deklarasaun Busan 2011.

Ho dokumentu ne’e, Governu pretende hodi aliña atividades hotu hosi parseiru dezenvolvimentu sira ho prioridades Governu nian, defini mata dalan foun kona-ba aprovasaun hodi mellora koordenasaun atividades hotu no integra portfóliu projetus ne’ebe finansia hosi doadores sira iha planu nasional ho sistema orsamentu nian.

Lansamentu konaba dokumentu hosi politika ne’e sei realiza iha ámbitu Reuniaun Parseiru Dezenvolvimentu Timor-Leste nian (Timor-Leste Development Partners Meeting) ne’ebe sei prezidi hamutuk hosi Ministériu Finansas no Ministériu Negósius Estranjeirus no Kooperasaun hahu’u hosi loron 2-4 Jullu 2019.

Reuniaun Parseirus Dezenvolvimentu Timor-Leste nian tinan 2019 adota tema “Haklean Koordenasaun ba Finansiamentu Dezenvolvimentu” nu’udar tópiku prínsipal hosi reuniaun ne’e. Objetivu hosi reuniaun ne’e hodi alkansa efisiênsia no efikásia ne’ebé diak liu iha prestasaun asistensia atraves hosi koordenasaun no alinamentu klean entre prioridades Governu nian hanesan konsagra ona iha Planu Estratéjiku Dezenvolvimentu Nasional (PEDN), atividades Parseiru Dezenvolvimentu sira.

Reuniaun Parseiru Dezenvolvimentu Timor-Leste nian sei hahu’u ho Reuniaun bilateral iha loron 2-3 Jullu 2019 iha Salaun Ministériu Negósius Estranjeirus no Kooperasaun, Rua Praía dos Coqueiros, Dili.

Reuniaun Parseiru Dezenvolvimentu Timor-Leste nian sei hetan prezensa hosi ofisiais nível altu Timor–Leste nian ne’ebé sei inklui Prezidente Repúblika Timor-Leste Francisco Guterres Lu Olo, Primeiru Ministru Taur Matan Ruak, Prezidente Parlamentu Nasional, Arão Noé Amaral. Embaixadores no Reprezentante hosi organizasaun internasional nivel rejional no multilateral sira ne’ebé sai hanesan parseirus dezenvolvimentu Timor-Leste nian.

Espiritu no kompromisus ne’ebé hato’o hosi parte interesada durante Reuniaun sei konsagra iha dokumentu ne’ebé sei emite iha reta final prosesu Reuniaun nee nu’udar “Kompromisu Dili ba Asaun”.