• KOMUNIKADU BA IMPRENSA “Jornada Orsamental ba Orsamentu Jeral Estadu 2020 hahu’u aban, 27 Juñu 2019”

Home » Anúnsiu » KOMUNIKADU BA IMPRENSA “Jornada Orsamental ba Orsamentu Jeral Estadu 2020 hahu’u aban, 27 Juñu 2019” Imprime pájina

KOMUNIKADU BA IMPRENSA “Jornada Orsamental ba Orsamentu Jeral Estadu 2020 hahu’u aban, 27 Juñu 2019”

20190626_KOMUNIKADU BA IMPRENSA OJE 2020

Governu Timor-Leste liuhosi Ministériu Finansas iha loron 27 Juñu 2019 hahu’u konvoka Sesaun Traballu loron ida kona-ba Jornada Orsamental ba Orsamentu Jeral Estadu (OJE) 2020 nian. Jornada Orsamental nu’udar faze inisiu iha ámbitu preparasaun OJE tinan-tinan hodi bele diskuti prioridade sira ne’ebé hola reflesaun hosi Planu Estratejiku Dezenvolvimentu no Programa 5 anos VIII Governu Konstitusional 2018 – 2023 no halo mos diskusaun kona-ba Senáriu ba Tetu Fiskal Orsamentu Jeral Estadu tinan 2020 nian nune’e bele hatan nesesidade komún nian liuhosi programa no atividade setoral iha Ministériu no Instituisaun sira hotu.

Jornada Orsamental ne’e sei hetan partisipasaun hosi Membru Governu VIII Governu Konstitusionál, Membru Parlamentu Nasionál hosi Komisaun C, Dirijentes Instituisaun Estadu sira, Dirijente Ajensia Autonoma, Presidente no Administrador Munisípiu sira inklui reprezentante hosi RAEOA – ZEESM no Diretur Jeral no Diretur Nasionál ne’ebé responsavel ba area Planeamentu no Orsamentu nian.

Durante Sesaun Traballu ne’e Ministériu Finansas, Gabinete Primeiru Ministru no Banco Central Timor Leste (BNCTL) sei hala’o aprezentasaun materia ne’ebé sei halo kobertura ba:

  1. Diretivas no objetivu Dezenvolvimentu Nasionál ne’ebé kompostu hosi sub materia sira : a). Faze Implementasaun PED 2011 – 2030, 2). Aliñamentu entre PED no ODS, 3). Liña Orientasaun 2020 – 2023, 4). Prioridades no Metas Prinsipal, 5). Alinhamentu programa ho entidade sira nia funsaun
  2. Avaliasaun ba Dezempeñu Dezenvolvimentu sosial ne’ebé sei kobre : 1). Total Populasaun iha Timor-Leste, 2). Nivel Kiak iha TL, 3). Indise dezenvolvimentu Humanu, 4). Balansu Jéneru, 5). Taxa alfabetizasaun, 6). Matrikula Eskolar, 7). Kuantidade no Kualidade despezas iha Edukasaun no Saude ne’ebé kontribui ba dezenvolvimentu Humanu, 8) . Resultadu Peskiza Demográfiku Saude iha Timor Leste (Taxa Fertilidade, mortalidade, saude reprodutiva, vasinasaun no situasaun anemia labarik no feto, violensia domestika no asesu ba be’e mos.
  3. Avaliasaun ba Dezempeñu Dezenvolvimentu Ekonomiku kobre : 1). Kresimentu Ekonómiku, 2). Inflasaun, 3) Desempregu, 4). Kondisaun Fiskal, 5). Kustu de Vida, 6). Kondisaun ambiente iha TL.
  4. Orsamentasaun sei kobre materia sira hanesan : 1). Enkuadramentu Fiskal no Fatores determinante ba definisaun Tetu Fiskal, 2). Kapasidade Ezekusaun tinan 5 hosi 2014 – 2019, 3). Balansu no Reseitas Fundu Petrolíferu no dezempeñu investimentu, 4) Enkuadramentu no Politika Imprestimu, 4). Komitmentu Fundu Externa, 5). Senáriu Tetu Fiskal 2020 nian.

Hafoin Jornada Orsamental ne’e sei konklui ho apresiasaun ba Prioridades hosi Programa sira ne’ebé sei konsidera iha ámbitu OJE 2020 no Tetu Fiskal adekuada ne’ebe bele responde prioridade sira hodi kontinua asegura dezenvolvimentu nasionál iha Timor-Leste. Prioridades no Tetu Fiskal sei kontinua aprezenta ba Konsellu Ministru atu bele aprova nune’e bele gia Ministériu Finansas atu halo disagregasaun Pakote Fiskal ba Ministériu, Instituisaun Estadu no Ajensia Autonoma sira.

Remata.