• Komunikadu Imprensa

Home » Anúnsiu » Komunikadu Imprensa Imprime pájina

Komunikadu Imprensa

Sexta-feira, 5 Fevereiru 2021.

Dili, Timor-Leste – Ministériu Finánsas hakarak atu halo klarifikasaun atu fó informasaun lolós ba públiku relasiona ho Pagamentu Saláriu fulan-Janeiru ba Funsionáriu Administrasaun Públiku no PNTL ne’ebé selu husi Payroll. Totál funsionáriu ne’ebé mak saláriu selu ona iha fulan-Janieru hamutuk 43.351 iha 25 Janeiru 2021. Funsionáriu ne’ebé seidauk simu saláriu fulan-Janeiru hamutuk 144 (0,3%).

Razaun funsionáriu 144 seidauk simu tanbá:
1.Imprensa Nasionál Timor-Leste, I.P. – totál funsionáriu hamutuk 46 pessoas mak seidauk simu sira nia saláriu ba fulan-Janeiru 2021. Razaun tanbá submisaun pedidu husi Imprensa Nasionál rasik hodi loke sira nia konta bankaria rasik (treasury bank account) tarde. Nota katak Imprensa Nasionál hanesan Ajénsia Autónomu foun ho autónomia administrativa no finanseira rasik.

2. Konsellu Imprensa – ho totál funsionáriu ne’ebé seidauk simu saláriu hamutuk 30 ho razaun tanbá kontratu mate iha 31 Dezembru 2020. To’o 12 Janeiru 2021, Payroll seidauk simu kontratu foun husi Konsellu Imprensa no mós notifikasaun husi Komisaun Funsaun Públika atu bele prosesa saláriu ba 30 pessoas.

3. Ministériu Assuntu Parlamentár no Komunikasaun Sosiál (MAPKOMS). Iha funsionáriu hamutuk 11 mak destaka iha PDHJ. Maibé, laiha konfirmasaun husi MAPKOMS atu selu sira nia saláriu husi orsamentu MAPKOMS.

Ministériu Finánsas komunika ona ba MAPKOMS no PDHJ atu fó konfirmasaun fontes orsamentu hodi selu funsionáriu 11 refere. To’o ohin loron, Ministériu Finánsas sei hein hela resposta husi instituisaun rua ne’e.

4. SEFOPE – Iha funsionáriu 57 pessoas mak nia saláriu atrazu ho razaun tanbá iha problema ho mapeamentu ba kodigu orsamentál foun ne’eduni iha hela prosesu nia laran atu finaliza ba banku, ohin loron ka tarde liu Segunda-feira semana oin.

5. Ba professionais saúde sira nia saláriu fulan-Janeiru selu hotu ona inklui mós retroativu, oras extra, turno. Ne’eduni, karik pesoál balun reklama seidauk simu, husu favór atu kontaktu Unidade Rekursus Umanu no ida-idak nia Banku.

6. Saláriu Desimu Terseiru (Gaji 13) ba PNTL selu hotu ona. Atu esplika de’it katak Desimu Terseiru (Gaji 13) tuir Dekretu Lei Númeru 63/2020, 10 Dezembru 2020, selu de’it saláriu baze, esklui subsídiu alimentasaun no transporte.

7. UNTL nu’udar ajénsia autonómu iha autonómia rasik atu jere sira nia orsamentu no realiza pagamentu direta ba banku. Ne’eduni ba Dosente konvidadu no Dosente part-time ne’ebé seidauk simu sira nia saláriu husi fulan-Outubru 2020 to’o Janeiru 2021, UNTL rasik mak sei responde ba sira nia problema interna.

Ikus-liu, Ministériu Finánsas hakarak informa ba públiku katak mudansa-sira iha baze de dadus iha inisiu kada tinan, normál tanbá tenke atualiza tuir orsamentu aprovadu iha Parlamentu Nasionál.

Husu Ministériu ida-idak atu esplika ba sira nia funsionáriu kontratadu katak bainhira sira nia kontratu ramata iha 31 Dezembru 2020. Kada instituisaun mak iha responsabilidade atu renova ka lae kontratu ba funsionáriu kontratadu sira. Sistema payroll Ministériu Finánsas sei rejeita automatikamente kontratu ne’ebé mak mate.

RAMATA.