• Komunikadu Imprensa

Home » Anúnsiu » Komunikadu Imprensa Imprime pájina

Komunikadu Imprensa

Tersa-feira, 2 marsu 2021.

Dili, Timor-Leste – Relasiona ho publikasaun husi Agência Noticiosa de Timor-Leste Tatoli, iha loron-23, fulan-fevereiru, tinan-2021 ho títulu “MF planeia integra konta seguransa sosiál ba konta jerál Estadu,” Ministériu Finánsas hakarak atu konfirma no esklarese katak deklarasaun Ministru Finansas, S.E. Rui Augusto Gomes iha publikasaun Tatoli iha leten refere ba aprezentasaun relatóriu finanseiru anuál husi entidade hotu-hotu setór administrasaun públiku inklui RAEOA no INSS. Liafuan “Conta” refere ba “relatório das contas” la’ós konta bankária.

Deklarasaun ne’e refere ba planu Ministériu Finansas atu responde ba rekomendasaun husi Câmara de Contas ba relatóriu Konta Jerál Estadu (KJE) tinan-2019 ne’ebé rekomenda atu Servisus Fundu Autónomu (SFA) hotu-hotu presiza aprezenta relatóriu konta anuál iha 31 maiu kada tinan no iha tempu ne’ebé hanesan konsolida sira nia relatóriu refere iha relatóriu Konta Jerál Estadu tinan-2020.

Rekomendasaun ne’e bazeia ba Lei Orsamentu no Jestaun Finansas Númeru 13/2009 no mós prinsípiu universálidade ne’ebé prevé ona iha Lei ba entidade hotu-hotu iha ámbitu perimetru orsamentál.

Atu bele viabiliza planu aprezentasaun Relatorio das Contas tinan-2020 husi Servisus Fundu Autómu (SFA) sira, VIII Governu Konstitusionál liuhusi Ministériu Finansas sei halo formasaun intensivu iha fulan-marsu, tinan-2021 ba SFA hamutuk sanulu (10), sei inklui mós Autoridade RAEOA atu bele iha koñesimentu prepara Relatorio das Contas ba ezekusaun tinan-2020 iha 31 maiu 2021.

Iha Orsamentu Jerál Estadu (OJE) tinan-2020 no OJE tinan-2021, Governu mós halo ona pasu importante balun hodi halo inskrisaun ba saldo de gerência husi Tezouru RAEOA, no mós INSS iha OJE no doasaun husi Uniaun Européia.

Ba oin, VIII Governu Konstitusionál liuhusi Ministériu Finansas planu hahú integra Autoridade Nasionál Petróleu no Minerál (ANPM) no Instituto do Petróleu e Geologia (IPG) iha proposta OJE tinan-2022 hodi kumpre prinsípiu universalidade. Atu nune’e, OJE no KJE sei abranje entidade Setór Administrasaun Públiku tomak tuir rekezitus ne’ebé defini ona iha Lei Orsamentu no Jestaun Finansas.

RAMATA