• Komunikadu Imprensa

Home » Announcements » Komunikadu Imprensa Print Page

Komunikadu Imprensa

Ministériu Finansas halo ona Pagamentu Cesta Básica ba kompaña 11 ho totál US$ 3.316.500

Dili, Timor-Leste – Iha sesta-feira, 18 marsu 2021, Ministériu Finansas hahú halo ona pagamentu Cesta Básica ba kompaña lokál hamutuk sanulu-resin-ida (11) ho montante totál US$ 3.316.500

Pagamentu ne’e halo hafoin Sekretariadu Tékniku Fundu COVID-19 simu pedidu pagamentu Cesta Básica hamutuk haat-nulu-resin-hitu (47) husi Ministériu Turizmu, Komérsiu no Indústria (MTCI).

Iha semana ida-ne’e nia laran, Ministériu Finansas liuhusi Sekretariadu Tékniku Fundu COVID-19 mós sei halo tan pagamentu ba kompaña lokál hamutuk rua-nulu-resin-neen (26). Kompaña lokál 26 ne’e mós kumpre ona sira nia dever hodi ba selu sira nia Impostu Rendimentu (Income Tax) 0,5% husi sira nia totál rendimentu.

Aleinde ne’e, iha mós pedidu pagamentu hamutuk sanulu (10) ne’ebé Ministériu Finansas sei hein hela MTCI atu kompleta dokumentus hodi aneksu iha Sistema Government Resouce Planning (GRP) molok realiza pagamentu.

Iha 22 marsu 2021, Sekretariadu Tékniku Fundu COVID-19 mós simu ona pedidu pagamentu hamutuk lima (5) husi Sekretaria Estadu Kooperativa (SeKoop). Daudaun ne’e, Ministériu Finansas sei verifika hela dokumentus hirak ne’e molok realiza pagamentu.

Ministériu Finansas liuhusi Sekretariadu Tékniku Fundu COVID-19 kontinua nafatin kolabora ho Ministériu impelementadór sira seluk hanesan Ministériu Agrikultura no Peskas (MAP), Sekretaria Estadu Kooperativa (SeKoop), no Sentru Lojístiku Nasionál atu aselera prosesu pagamentu ba kompaña sira ne’ebé mak fornese ona ai-han ba programa Cesta Básica.

Bainhira dokumentu pedidu pagamentu hirak ne’e kompletu, loos no prienxe ona rekezitus pagamentu tuir Lei haruka, Ministériu Implementadór sira sei submete ba Sekretariadu Tékniku Fundu COVID-19. Hafoin simu pedidu pagamentu husi ministériu implementadór, Sekretariadu Tékniku Fundu COVID-19 sei prosesa dokumentu sira hotu no sei realiza pagamentu ba pedidu pagamentu hirak ne’ebé mak prienxe ona rekezitus tuir regras ne’ebé vigora.

Maibé, molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia totál rendimentu konforme Lei Tributária haruka. Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.

Karik kompaña fornesedór-sira iha pergunta ruma no/ka presiza informasaun liután kona-ba asuntu impostu, bele dirije diretamente ba Autoridade Tributária, Ministériu Finansas ka bele vizita portál Autoridade Tributária nian iha www.attl.gov.tl relasiona ho (i) pagamentu impostu, (ii) submisaun relatóriu mensál/anuál no (iii) pedidu emisaun ba Certidao de Dividas. Informa mós katak pagamentu impostu sira ne’e bele halo liuhusi mákina ATM P24. Kontribuinte sira la-presiza ba forma tan iha banku komersiál sira hanesan uluk.

Ba pedidu pagamentu Cesta Básica ne’ebé mak la-prienxe ka seidauk prienxe rekezitus, konforme Lei haruka, Sekretariadu Tékniku Fundu COVID-19 sei devolve ba ministériu implementadór hodi kompleta no submete fila-fali.

-RAMATA-