• Komunikadu Imprensa: CNA realiza ona prosesu konkursu aprovizionamentu projetu hamutuk 107 ho totál orsamentu $565.446.270,37

Home » Anúnsiu » Komunikadu Imprensa: CNA realiza ona prosesu konkursu aprovizionamentu projetu hamutuk 107 ho totál orsamentu $565.446.270,37 Imprime pájina

Komunikadu Imprensa: CNA realiza ona prosesu konkursu aprovizionamentu projetu hamutuk 107 ho totál orsamentu $565.446.270,37

Díli, 10 maiu 2021 – Ministériu Finansas liuhusi Komisaun Nasional Aprovizionamentu (CNA, sigla Portugés), hahú husi Janeiru 2020 to’o iha 7 maiu 2021, realiza ona prosesu konkursu aprovizionamentu projetu hamutuk 107 ho totál orsamentu $565.446.270,37. Projetu-sira ne’e maioria ninia prosesu aprovizionamentu hahu tiha ona no balun iha ona faze finál aprovizionamentu ne’ebé tuir kalendáriu sei konklui iha tinan ne’e nia laran.

Fontes finansiamentu orsamentu ba projetu pakote 107 ne’e mai husi fontes tolu: (i) Fundu Infraestrutura ho montante $328.387.809,65, (ii) Fundu La’ós Infraestrutura $21.058.460,72 no (iii) Imprestimu husi Ajénsia Internasionál; Banku Dezenvolvementu Aziátiku (ADB), Banku Mundiál no Ajénsia Kooperasaun Internasionál Japaun (JICA) ho montante $216.000.000.

Projetu pakote 107 ne’e nia modalidade konkursu mak hanesan tuir-mai ne’e: (i) Konkursu Internasionál (ICB, sigla Inglés) iha pakote 13, (ii) Konkursu Nasional (NCB, sigla Inglés) ba servisu fornesimentu bens no konstrusaun estrada nasionál no rural, iha pakote 62, (iii) Konkursu Restritu (RT) iha pakote 23 no (iv) Konkursu Servisu Konsultadoria (RFP, sigla Inglés) iha pakote 9.

Husi pakote 107 ne’e, modalidade ba aprovizionamentu barak liu mak Konstrusaun Sivíl ne’ebé nia objetivu atu konstrui infraestrutura prinsipál-sira hanesan estrada nasionál, ponte, konstrusaun no estensaun ba Aeroportu Internasionál Prezidente Nicolau Lobato nomós kontinuasaun ba rehabilitasaun no manutensaun ba estrada rurál iha munisípiu-sira hanesan Lautem, Baucau, Covalima, Manatuto, Viqueque, Manufahi, Ainaro, Ermera, Bobonaro no Liquiça.

Aleinde ne’e, iha mós modalidade Servisu Konsultadoria ba dezeña konstrusaun foun sira no supervizaun ba servisu konstrusaun sivíl. Modalidade seluk ida ne’ebé importante mós mak servisus akizisaun no fornesimentu Bens no Servisu hanesan fornesimentu no instalasaun sistema kabu submarinu iha parte sul Timor-Leste, protesaun barreira mota-sira, protesaun torre eletrisidade ne’ebé ninia pakote balun kompletu no atu tama ona iha faze implementasaun.

Ho implementasaun projetu hirak ne’e bele fó benefísiu ba dezenvolvementu nasionál no kontribui hasa’e kresimentu ekonomia iha rai-laran inklui kriasaun empregu ba Timoroan sira.

Hafoin Prezidente Repúblika Sua Eselénsia Dr. Francisco Guterres Lú Olo promulga Lei OJE Refitikativu 2021 no públika iha Jornal da República semana kotuk, ekipa tékniku husi Ministériu Finansas hahú halo ajustamentu Orsamentu Retifikativu iha sistema Dalan Ba Futuru Timor-Leste (DBTL) no DGT. Servisu ajustamentu ne’e kompleta ona iha kinta-feira semana kotuk no daudaun ne’e sistema online fila-fali ona.

Iha tinan-2021, Ministériu Finansas haruka ona pedidu levantamentu osan husi Fundu Petróleu ba Banku Sentrál Timor-Leste ho montante totál $350.000.000. Levantamentu dahuluk iha fevereiru 2021 ho montante $200.000.000, no levantamentu daruak iha 28 abril 2021 ho montante $150.000.000.

Atu hetan informasaun detalla kona-ba Regras no Prosedimentu Aprovizionamentu nomós oportunidade ba konkursu-sira, bele vizita portál CNA nian www.cna.gov.tl.