• Konstrusaun Portu Baía Tibar to’o fulan-jullu atinji 62,26%

Home » Anúnsiu » Konstrusaun Portu Baía Tibar to’o fulan-jullu atinji 62,26% Imprime pájina

Konstrusaun Portu Baía Tibar to’o fulan-jullu atinji 62,26%

Díli, 8 setembru 2021 – Progresu kumulativu ba konstrusaun Portu Baía Tibar to’o iha loron 31 fulan-jullu tinan 2021 atinji ona 62,26% no tuir planu sei ramata iha fulan-maiu 2022 no hahú halo operasaun iha fulan-juñu 2022. Governu Timor-Leste liuhusi Escrow Account Fundu Viabilidade ne’ebé jere husi Ministériu Finansas, hahú husi fulan-agostu 2019 to’o fulan-maiu 2021, dezembolsa ona pagamentu Viability Gap Fund ho valór millaun $64,7 ba kompaña Timor Port S.A, ne’ebé mak hanesan konsesionáriu projetu Parseria Públiku-Privada (PPP, sigla Inglés) Portu Baía Tibar.

Bainhira ramata no hahú halo operasaun, Portu Baía Tibar sei troka Portu Díli hodi fasilita movimentu importasaun no esportasaun sasán ho kapasidade karga kontentór hamutuk millaun ida kada tinan. Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia iha servisu alfandegáriu no atividade komérsiu.

Efisiénsia hirak ne’e konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públiku. Efisiénsia hirak ne’e mós sei ajuda Governu liuhusi Ministériu Finansas nomós utilizadór Portu sira atu kolekta reseitas ho maneira ida ne’ebé lailais, justu no transparente.

Portu foun modernu ne’e sei fasilita Timor-Leste ninia konektividade marítima iha rejiaun Ázia, liga Timor-Leste ba merkadu komérsiu globál no hasa’e liután Timor-Leste ninia asesu komérsiu ba merkadoria sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun.

Konstrusaun Portu Baía Tibar ho modalidade PPP husi parseria entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

Daudaun ne’e, totál traballadór-sira ne’ebé mak servisu iha projetu konstrusaun Portu Baía Tibar hamutuk ema 1,240. Husi númeru ne’e, traballadór Timoroan hamutuk ema 792 (63%).

Relasiona ho dezenvolvimentu konteúdu lokál, to’o iha fulan-jullu 2021, kompaña konstrusaun China Harbour sub-kontrata ona servisu balun ba kompaña lokál hamutuk 65 ho montante millaun $20 resin no Timoroan ne’ebé servisu indereita ho kontratór hirak ne’e hamutuk ema 378.

Projetu Portu Baía Tibar hanesan projetu interese públiku ne’ebé lidera husi Komisaun Interministeriál ho nia membru atuál mak Ministru Finansas, Ministru Obras Públikas, Ministru Planu no Ordenamentu no Ministru Transporte no Komunikasaun.

Portu Díli Sei Transforma ba Pontu Turizmu no Komersiál

Enkuantu Portu Díli sei transforma ba pontu Turizmu no Komersiál. Projetu re-Dezenvolvimentu no Komersializasaun Portu Díli ne’e hetan ona aprovasaun husi Konsellu Ministrus iha 28 jullu 2021.

Iha loron 8 fulan-setembru 2021, Konsellu Ministrus análiza filafali planu dezenvolvimentu ba reestruturasaun no modernizasaun Portu Díli, ne’ebé hetan ona deliberasaun iha Sorumutuk Konsellu Ministrus iha loron 28 fulan-jullu tinan 2021. Maibé, tanba iha alterasaun balun iha faze redasaun finál, presiza submete filafali ba deliberasaun foun.

Konsellu Ministrus manifesta ona ninia preferénsia hodi adopta modalidade finansiamentu Parseria Públiku-Privada (PPP), atu dezenvolve tuir kuadru legál no regulamentu iha vigór. Planu dezenvolvimentu ba reestruturasaun no modernizasaun Portu Díli prevee katak hafoin transferénsia funsaun husi portu karga ba portu foun Tibar, sei halo ninia konversaun ba mariña no portu kruzeiru sira. Ida-ne’e projetu nasionál importante, lokalizadu iha área estratéjika sentrál no importante iha sidade Díli, ninia funsaun iha ligasaun marítima ba populasaun sira husi Oekusi no Ataúru, no potensiál atu sai polu dinamizadór turizmu marítima iha Timor-Leste.

Projetu re-Dezenvolvimentu no Komersializasaun Portu Díli sei administra husi Autoridade Portuária Timor-Leste (APORTIL) ne’ebé tutela iha Ministériu Transporte no Komunikasaun ho asisténsia tékniku husi USAID’s Tourism For All Project. Projetu ne’e ho modalidade Parseria Públiku-Privada ho kustu estimativu millaun $50 resin, atu transforma Portu Díli sai hanesan pontu Turizmu ne’ebé sei inklui fasilidade kulturál, rekreativu no rezidensiál. Projetu ne’e sei kria empregu no fornese oportunidade komersiál ba rezidente sira iha Díli, halo kapitál Timor-Leste sai furak liután hodi bele atrai turista doméstiku no turista internasionál iha futuru. ***