• KROP Aprova Tetu Fiskál Proposta OJE 2022 ho montante billaun $1,675

Home » Anúncios » Notícias » KROP Aprova Tetu Fiskál Proposta OJE 2022 ho montante billaun $1,675 Imprimir a página

KROP Aprova Tetu Fiskál Proposta OJE 2022 ho montante billaun $1,675

Díli 16 setembru 2021 – Komité Revizaun Orsamentu Polítiku (koñesidu ho akrónimu KROP), ne’ebé lidera husi Sua Exelénsia Primeiru-Ministru, Jenerál Taur Matan Ruak, ohin, aprova ona Tetu Fiskál ba Orsamentu Jerál Estadu (OJE) tinan 2022 ho montante hamutuk billaun $1,675.

Pontu importante sira ne’ebé mak KROP uza hodi halo diskusaun no apresiasaun ba Proposta Orsamentu husi Ministériu, Servisus Fundu Autónoma, Instituisaun Estadu no Munisípiu sira maka:

  1. Sustentabilidade Fiskál katak kada Entidades Estadu tenke garantia Tetu Fiskál ne’ebé sei opta ba OJE 2022 tenke sukat ho kapasidade finansiamentu Timor-Leste nian hodi sustenta finansiamentu OJE ba iha mediu to’o longu prazu.
  2. Istória Ezekusaun no Kapasidade Ezekusaun katak hola referénsia ba Entidades Estadu sira-nia dezempeñu ezekusaun tinan 2021 no anteriór, kapasidade rekursu ne’ebé Entidades Estadu sira iha no prioridades ne’ebé atu implementa hodi kontribui ba metas polítika Oitavu Governu Konstitusionál.
  3. Kualidade Orsamentu laós kuantidade orsamentu, katak proposta orsamentu tenke asegura funsionamentu mákina Estadu hodi serbí populasaun no fó benefísiu direta ba povu.
  4. Tetu Agregadu ba OJE 2022 aprovadu husi Konsellu Ministrus iha loron 14 fulan-jullu tinan 2021 ho montante billaun $1,571.6 hodi finansia prioridade nasionál 6 ne’ebé mak Governu deside ona iha Jornada Orsamentál liubá.

 

Tetu fiskál aprovadu husi KROP ho montante billaun $1,675 ne’e sei uza hodi implementa Programas 43 iha perímetru OJE tinan 2022 liuhusi prioridade nasionál neen: 1) Dezenvolvimentu Kapitál Umanu (Edukasaun, Formasaun Profisionál no Saúde); 2) Abitasaun no Inkluzaun Sosiál; 3) Setór Produtivu (Agrikultura no Turizmu), Ambiente no Konektividade; 4) Dezenvolvimentu Setór Privadu no Kooperativa; 5) Dezenvolvimentu Rurál; no 6) Boa Governasaun – ho objetivu atu atinji dezenvolvimentu ida ne’ebé kualidade ho kresimentu ekonómiku ne’ebé inkluzivu no sustentável.

MF sei aprezenta Tetu Fiskál Proposta OJE 2022 ba Konsellu Ministrus iha Setembru 2021

Ba oin, ekipa tékniku sira sei prepara redasaun finál atu Ministériu Finansas bele aprezenta ba Konsellu Ministrus iha semana hirak tuir-mai hodi hetan deliberasaun no aprovasaun nu’udar proposta OJE 2022. Hafoin hetan aprovasaun, Ministériu Finansas sei hahú prepara Livru I to’o Livru VI Proposta OJE 2022 inklui dokumentu adisionál sira no Governu sei entrega ba Parlamentu Nasionál, iha fulan-outubru nia laran. ***