• Lansamentu “Sistema ASYCUDA WORLD” iha Aeroportu Internasionál Presidente Nicolau Lobato.

Home » Anúncios » Lansamentu “Sistema ASYCUDA WORLD” iha Aeroportu Internasionál Presidente Nicolau Lobato. Imprimir a página

Lansamentu “Sistema ASYCUDA WORLD” iha Aeroportu Internasionál Presidente Nicolau Lobato.

20180314_Lansamentu Sistema Asycuda World iha Aeroportu 12 Marsu 2018

Diresaun Jerál Autoridade Aduaneira (AA) halo lansamentu ba Sistema Asycuda World husi parte Hand Carry nian iha Aeroportu Intenasionál Presidente Nicolau Lobato Comoro, Dili Segunda-feira,12 Marsu 2018.

Tuir Diretór Jerál Interino Autoridade Aduaneira, Julião José Ximenes hateten, sistema ida ne’e hanesan sistema ida ne’ebé mak diak tebes no ho sistema ne’e bele asegura transparénsia iha akuntabilidade bainhira Broker ou importadór hakarak prosesu dokumentus bainhira sira mai. Sira lori nia merkadoria liuhosi Hand Carry hakarak ka lakohi sira tenki prosesu liuhosi sistema harmonizado ida ne’e para atu bele asegura ita nia transparénsia ho akuntabilidade.

Sistema Asycuda World ida ne’e ita lansa ona tinan 2017, iha Portu Dili no fronteiras hanesan Posto Integradu Batugade ho Salele-Suai e agora kontinua lansa iha Aeroportu Dili. Durante ne’e ita nia sistema ida ne’e halo ligasaun no koneksaun direitamente hosi parte Autoridade Aduaneira, agensia nomós ministériu relevante sira. Liu-liu sistema ne’e liga ho sistema Ministériu Planu no Finansas ninian ne’ebé diak teb-tebes ba ita atu bele halo prosesu des-alfandegamentu ba merkadorias iha area aduanéiro nian ho lais. Ne’e polítika governu nian liuhosi Ministériu Planu no Finansas parte ida husi programa Reforma Fiskál atu harmoniza sistema hodi fasilita komersiu ho lalais, tenik Diretór Interino ne’e.

Diretór ne’e hatutan liutan, sistema hand carry ida ne’e ita intruduz ba iha pasageirus sira bainhira sira lori merkadorias atraves liuhosi hand carry. Bainhira kuandu sira ninian merkadoria alfádegas ne’e hare’e katak ninia presu kuandu liu ou ultrapassa ona iha $300 dolares ba leten automatikamente sira halo prosesu selu taxa. Selu taxa mós karik depende ba merkadoria ne’ebé ke sira lori nune’e mós hare’e ba ninia faturas ka dokumentus ne’ebé mak nia lori tuir presu sasan ne’ebé maka iha hodi apresenta ba alfándega halo prosesu.

Hatan ba prosesamentu katak, “normalmente iha kargu bainhira kuandu sasan ne’e mai automatikamente sei prosesu Dokumentu Aduaneira Úniku (DAU) hanesan dokumentu legal ne’ebé tratadu ba importasaun no exportasaun liuhosi Broker mak halo prosesu. Maibé, ida ne’e infelizmente hakarak hato’o ba públiku katak, ida ne’e liuhosi hand carry katak hosi parte ofísial alfándegas mak sei halo prosesu dokumento DAU ba ida ne’e, bainhira halo prosesu remata sei entrega ba sasan nain depois nain bele halo prosesu kontinuasaun hodi selu iha banku ne’ebe disignadu” Diretór Julião José Ximenes subliña.

Iha lansamentu ida ne’e hetan partisipasaun másimu hosi funsionáriu Autoridade Aduaneira nian, imigrasaun, karantina e Bio-Seguransa, ajensia no instituisaun autonoma, UPF-PNTL, Polísia seguransa aeroporto ne’ebé maka hala’o sira nia kna’ar iha Aeroportu Internasionál Presidente Nicolau Lobato nomós ministériu relevantes sira seluk.