• Lansamentu Tématiku Kona-ba Monografia Edukasaun 2015.

Home » Anúncios » Lansamentu Tématiku Kona-ba Monografia Edukasaun 2015. Imprimir a página

Lansamentu Tématiku Kona-ba Monografia Edukasaun 2015.

20180301_Lansamentu Tématiku Kona-ba Monografia Edukasaun 2015.

Ministériu Planu no Finansas liuhosi Diresaun Jerál Estatístika hala’o Lansamentu Tématiku Monografia Tinan 2015 ho objetivu hodi garante edukasaun inkluzivu ho kualidade ba ema hotu. Lansamentu ne’e realiza iha Salaun Konferensia REHA Estatístika,1 Marsu 2018.

Tuir Ministru Planu no Finansas, Rui A. Gomes, lansamentu ne’e, bele fornése ba governu no parseirus dezenvolvimentu sira evidensia xave hodi dezenvolve seitór edukasaun, liu-liu ba labarik no joven sira.

“Relatóriu Temátiku ida ne’e, Governu hamutuk ho parseirus dezenvolvimentu iha ona baze konkreta ida atu oinsá bele avansa ba oin iha área edukasaun, liu-liu ba labarik no ema foin-sa’e sira. Ho dadus ne’ebé iha, ita bele halo ona estimativa kona-ba salas de aula hira mak ita presija no eskola hira mak tenke hari’i iha fatin ida ne’ebé, no mós populasaun foin sa’e husi ne’ebé mak presija liu ita nia atensaun”, hateten Ministru Planu no Finansas.

Iha biban ne’e mós Ministru Planu no Finansas, Rui A. Gomes hato’o agradese ba funsionáriu ida-idak iha Diresaun Jerál Estatístika, parseiru dezenvolvimentu, UNFPA ba apoiu tékniku no finanseiru ne’ebé fó ba Sensus. Inklui Ajensia UNICEF sira nian apoiu ba Relatóriu Temátiku ida ne’e.

Iha parte seluk, reprezentante UNICEF ba Timor-Leste, Valeria Taton hateten, resensiamentu 2015 oferese dadus risku ba edukasaun. Dadus ne’ebé uza hodi komprende situasaun atual ne’e, importante liutan dadus no informasaun ne’e bele uza hanesan evidénsia no referensia ba polítiku hodi foti desizaun.

“Relatóriu ida ne’e fó ba ita imajen kona-ba tendénsia edukasaun, inklui projesaun populasaun ne’ebé Ministériu ne’e presiza, liu-liu kona-ba prosesu planeamentu no orsamentu” informa Valeria Taton.

Relatóriu ne’e sei tulun Timor-Leste kona-ba Objetivu Dezenvolvimentu Sustentavel (ODS) sira bazeia ba dadus resenseamentu uma kain nian.

Iha fatin hanesan Diretór Jerál Estatístika, Elias dos Santos Ferreira reforsa liutan prosesu elaborasaun relatóriu monografia edukasaun hahu’u husi sensus populasaun 2010 hamosu temátiku 12 nune’e mós iha sensus populasaun 2015 iha temátiku 12.

Relatoriu ne’e mós kobre indikadores barak iha ODS objetivu 4 “Edukasaun no Kualidade”. Exemplu maka indikador 4.2.2 Taxa Partisipasaun aprendizajen organizadu, tinan ida antes idade ofisial atu tama eskola tuir sexu maka Mane 44.7 %, Feto 47.1 % no Total maka 45.9 %.

“Relatoriu Monografia Edukasaun 2015 finaliza tanba hetan servisu hamutuk entre Diresaun Jerál Estatístika husi Ministériu Planu no Finansas hamutuk ho ekipa husi Ministériu Edukasaun no hetan suporta tékniku husi UNICEF no UNFPA”, tenik Diretór Jerál Estatístika, Elias dos Santos Ferreira.

Lansamentu ne’e hetan partisipasaun másimu husi, Vice-Ministru Edukasaun, José Neves “Samalarua”, reprezentante UNFPA, UNICEF, Parseirus Dezenvolvimentu, Sosiedade Sivil, Setór Privadu, Estudante no Estrutura husi Dirasaun Jerál Estatístika rasik.

Atu hare diskursu Ministru Planu no Finansas iha seremonia lansamentu ne’e, favor klik iha: Diskursu MPF iha Lansamentu Relatoriu Monografia Edukasaun iha DGE