• Liafuan Ministru Planu no Finansas iha Okaziaun Despedida ho Funsionárius Sira 18 Juñu 2018

Home » Anúncios » Liafuan Ministru Planu no Finansas iha Okaziaun Despedida ho Funsionárius Sira 18 Juñu 2018 Imprimir a página

Liafuan Ministru Planu no Finansas iha Okaziaun Despedida ho Funsionárius Sira 18 Juñu 2018

20180619_FAREWELL SPEECH. SR. Rui Gomes

Obrigadu wa’in ba ita bo’ot sira nian prezensa iha serimónia despedida ida ne’e.

Loron atu Vise-Ministra Sara Lobo Brites no ha’u atu husik Ministériu Planu no Finansas besik lós ona.

Durasaun serbisu iha Ministériu ida ne’e badak hela—fulan sia deit. Serbisu ne’ebé ami na’in rua oferese ba ita bo’ot sira no Estadu ida ne’e hanesan pasu dahuluk ida atu lori ita lao iha dalan ida seguru ba rigor no kontensaun despezas públikas.

Ha’u hakarak uza biban ida ne’e hodi agradese wa’in servisu Vice-Ministra Sara nian; nia hatudu dunik kapasidade, kompetensia, pasiensia no liuliu lealdade ás iha ninian knaar. Obrigadu wa’in.

Ba Diretór sira husi Diresaun-Jerál mós ha’u nian agradesimentu bo’ot. Diresaun-Jerál Finansas Estadu ne’ebé fera ulun hodi oinsá jere orsamentu ida hodi atende pedidu oioin; ita bo’ot sira hatudu kompetensia no sensibilidade ás ba interese Estadu. Estadu ida ne’e la tama iha krize tamba ita bo’ot sira ninian dedikasaun no lideransa. Obrigadu wa’in Diretor-Jerál Januário Gama no ekipa tomak.

Ba Diresaun-Jerál Tezouru ne’ebé hatudu kuidadu no sempre atentu wainhira halo pagamentus atu evita Estadu lakon osan. Ita bo’ot sira hatudu ona kapasidade no kompetensia kontabilistiku ne’ebé di’ak tebes hodi asegura likidez iha kofre Estadu. Obrigadu wa’in Diretor-Jerál Rui Magno no ekipa tomak.

Ba Diresau-Jerál Alfandega no Tributária ita bo’ot nain rua konsegue hatama reseitas ba kofre Estadu, maski lei investimentu ladun fó margin atu hetan reseitas bo’ot liu. Ita bo’ot sira konsegue resolve rekursu ierárkiku lubun ida ho di’ak no evita ona penalizasaun ba Estadu. Obrigadu wa’in ba Diretora Mónica Rangel no ekipa tomak no Diretor José Abílio ho ekipa tomak ba ita bo’ot sira nian persistensia no konsistensia iha aplikasaun lei sira.

Ba Diresaun-Jerál Estatistika, hori uluk kedas ita bo’ot sira nian serbisu hetan apresiasaun di’ak husi utilizador informasaun ne’ebé imparsial, ekilibradu no bazeia ba evidensia. Estudus sira ne’ebé foin lalais publika sai ne’e hatudu prova ita bo’ot sira nian kompetensia no dedikasaun. Obrigadu wa’in Diretor-Jerál Elias Ferreira no ekipa tomak ninian servisu ba Estadu no públiku sira.

Ba Diresaun-Jerál Servisus Korporativus, ha’u hakarak agradese wa’in ba ita bo’ot sira nian preokupasaun hodi tau matan ba bem-estar funsionárius tomak, asegura ambiente de trabalho ida di’ak atu permite funsionamentu servisus iha Ministériu ida ne’e lao hotu. Ha’u preokupa wainhira ita hetan problema bo’ot ida ho ligasaun eletrika mai edifísiu ida ne’e, maibe konsegue resolve iha tempu badak. Manutensaun edifisiu ida ne’e no servisus sira seluk relasiona ho Alfandega no Impostu nian mós hetan solusaun imediata. Ida ne’e tamba lideransa di’ak Diretor-Jerál Martinho Lopes no kolaborasaun ekipa tomak. Obrigadu wa’in.

Ba Koordenador sira Unidades Espesiais, ha’u sei la temi ida pur ida, maibe ita bo’ot sira nian empeñamentu, matenek, no resposta imediata, ha’u agradese wa’in.

Ha’u hakarak apresia mós Staff sira ne’ebé serbisu nonok, la hatudu-an, maibe kontribue ba ita hotu nian susesu. Liu-liu Staff sira ne’ebé iha payroll, IT, servisus manutensaun edifísiu, limpeza, seguransa, nst ne’ebé ha’u la temi ida pur ida. Obrigadu wa’in ba ita bo’ot sira nian servisu, dedikasaun no pasiensia.

Nune’e mós, ha’u hakarak agradese eskoltu sira ne’ebé la hatene kolen, serbisu liu oras. Dala ruma la han tuir oras. Obrigadu wa’in ba komandante Celestino no ekipa tomak.

Liafuan gratidaun ha’u hakarak dirije ba ha’u nian Xefe Gabinete Executive, D. Balbina no Staff sira hotu, inklui Asesór sira iha Gabinete Ezekutivu Ministru no Vise-Ministra nian ne’ebé fó sira nian kontribuisaun signifikativu hodi apoiu ami na’in rua nian serbisu durante fulan sia nia laran. Ha’u apresia tebes kapasidade no kompetensia ita bo’ot sira nian iha ita bo’ot sira nian knaar. Ha’u fiar katak wainhira oportunidade iha, maka ita nian jovem sira hanesan Dr. Isac Menezes mós bele ba koalia no defende proposta-lei iha Konsellu Ministru ne’ebá—orgaun másimu ezekutivu nian.

Ema sira ne’ebé seidauk fuk mutin hanesan ha’u ka Dr. Carlos Burgo ka Dr. Jorge Graça, mós hatudu dunik sira nian kapasidade no kompetensia ás iha matéria espesialidade sira nian. Ema sira ne’e mak hanesan Dr. Jonianto Monteiro, Dr. David Guterres no Dra. Isabel Ximenes. D. Balbina Soares, obrigadu ba tratamentu VIP ne’ebé fó mai ha’u. Ha’u sei la haluha. Obrigadu wa’in.

Ita bo’ot sira defaktu hatudu ona kompetensia no kapasidade iha ita bo’ot sira nian knaar durante fulan sia ne’e nia laran. Maski ho orsamentu limitadu, ita bo’ot hatudu ona rigor no jestaun di’ak. Ha’u la imajina karik laiha dedikasaun husi parte ita bo’ot sira nian, maka ita sei la konsegue responde obrigasoes no nesesidades Estadu ida ne’e nian.

Fiar bá katak ha’u sei lori sai esperiensia lubun ida husi fatin ida ne’e.

Husi ita nian interasaun, ha’u aprende loke-an, fó valor ba ema seluk ninian hanoin no ho nune’e ita hamutuk konsegue alkansa rezultadu ne’ebé di’ak, ne’ebé ema barak louva.

Atu fó ejemplu, ha’u hakarak temi rezultadu balun ne’ebé ita alkansa iha fulan sia nia laran:

Ida, ita konsegue asegura implementasaun rejime duodesimal lao ho di’ak durante fulan neen. Ha’u temi liafuan “di’ak” tamba defaktu ezekusaun orsamentál lao ho efisiente no transparente. Laiha atrazu iha pagamentus no tusan balun mós ita konsegue selu. Rejime duodesimal halo dala hat ona iha tinan lima nia laran. Maibe, ida ne’e nia tempu naruk liu kompara ho rejime duodesimal iha tinan sira liubá.

Rua, ita fó pasu ida metin iha prosesu modernizasaun fontes reseitas, liu husi servisu Komisaun Reforma Fiskál iha Dra. Fernandas Borges nian koordenasaun, ne’ebé Diresaun-Jerál rua nakfilak-an sai Autoridade mak Alfandega no Tributária. Ida ne’e alinha ho Ministériu ninian objetivu mak hodi alkansa transparensia no funu hasoru ameasa korupsaun.

Tolu, ita konsegue integra sistema GRP ho sistema transferensia automátiku (R-Timor). Pagamentu sira agora akontese iha real time no ba resipiente iha fatin ne’ebé deit. Rezultadu ida ne’e hahú husi Vice-Ministra Sara nian empeñamentu wainhira sei iha Banku Sentral. Susesu lansamentu ida ne’e atribue mós ba dedikasaun, preparasaun no kompetensia Xefe IFMISU, Dr. Joanico no ekipa tomak.

Hat, ita konsegue asegura asinatura akordu ba konstrusaun Portu Tibar no ita rasik preside serimónia entrega sertifikadu ambiente. Ida obra husi Unidade PPP, Dra. Sitalina no ekipa hamutuk ho PIU, Dr. Rui Soares. Portu Tibar nu’udar parte ida husi Planu Estratéjiku Dezenvolvimentu ne’ebé buka atu fasilita komérsiu no promove dezenvolvimentu ekonómiku.

Lima, ita konsegue konklui no lansa estudus balun ne’ebé sei sai baze ba foti desizoes polítikas sira iha tempu tuir mai. Pur ejemplu, relatóriu konabá Avaliasaun PEFA konabá impaktu polítika fiskál ba redusaun ki’ak no desigualdade no mós estudu foun ida naran Demographic Health Survey hamutuk ho ita nian parseirus dezenvolvimentu ADB no USAID. Estudus sira ne’e halo iha ambitu promosaun valor sira hanesan responsabilidade, transparensia no desizaun bazeia ba evidensia.

Nen, ita mós konsegue mobiliza instituisoes sira Governu nian hodi halibur kareta (património do Estado) hodi fasilita Eleisaun Antesipada.

Buat lubuk ida tan ne’ebé hatudu katak Ministériu ida ne’e iha fulan sia nia laran la paradu ka halo deit jestaun. Ba sira ne’ebé sképtiku ka gosta gossip, ha’u hakarak afirma iha ne’e katak: Ita asegura dunik funsionamentu Estadu ida ne’e; pagamentus salariu, transferensias públikas, selu tusan, nst lao on-time; ida ne’e laós deit jestaun, maibe governasaun di’ak (good governance); ita hatudu rigor iha kontas Estadu nian; ita hatudu kontensaun iha despezas públikas no la sakrifika parte ruma; no ita konsegue responde nesesidade Estadu to’o ohin loron.

Ha’u konvida ita fó applause bo’ot ida ba Ministériu Planu no Finansas!

Maski ho difikuldades, ita konsegue hamutuk salvaguarda no asegura Estadu ida ne’e la tama iha krize nia laran.

Husu bo’ot atu ita bo’ot sira kontinua empeñadu hanesan ne’e ba oin, tamba ita konsegue hatudu ona katak team ida ne’e bele.

Ha’u hakarak aproveita oportunidade ida ne’e atu agradese konfiansa S.E. Señor Primeiru-Ministru Dr. Mari Alkatiri no korajen ne’ebé Primeiru-Ministru fó mai ami na’in rua atu kontinua serbisu nafatin maski kontestu polítiku la propísiu atu introduz mudansas.

Atu remata, ha’u hakarak husik konsellu ruma ba ita bo’ot sira ne’ebé hela: Hakoak bá TIRTrust, Integrity and Respect atu bele alkansa mehi ba Nasaun ida ne’e nian ne’ebé hatuur iha Planu Estratéjiku Ministériu ne’e nian mak “become financially independent”.

Trust—katak presija fiar malu no fiar ita nian kapasidade rasik atu nune’e ita rasik mak kaer sasan. Ho Trust mak ita sei bele hamenus dependensia.

Integrity—ejije onestidade husi ita nian parte. Admit mistakes and use mistakes as an opportunity for improvement. Onestidade di’ak liu duke sai “politically correct”.

Respect—hatudu dimensaun rua: Ida, lealdade ba instituisaun no ierarkia no la buka oin. Ida fali, maski hasoru kontra-argumentu, lalika hatudu prejudice ka hatudu liman ba ema seluk. Saida mak halo relasaun di’ak no metin to’o tempu naruk laós komunikasaun, ka hakoak malu, maibe respeitu.

Felisidades ba ita bo’ot hotu ho lideransa foun ne’ebé sei mai.

Obrigadu wa’in.
Rui A. Gomes