- Liña Koordenasaun diak Garante Kualidade Servisu Autoridade Aduaneira Maliana
Home » Anúnsiu » Liña Koordenasaun diak Garante Kualidade Servisu Autoridade Aduaneira Maliana Imprime pájina
Liña Koordenasaun diak Garante Kualidade Servisu Autoridade Aduaneira Maliana
Autoridade Aduaneira Maliana hala’o enkotru liña koordenasaun servisu ho Diresaun Nasionál Transportes Terrestres (DNTT) no Diresaun Nasionál Comersiu Externo (DNCE) ho objetivu atu bele partilla informasaun ba malu relasiona ho kna’ar no regras ne’ebé estabelese hodi regula atividade importadóres no esportadóres iha fronteiras, atividade refere realiza iha salaun enkontru Maliana, 11 Abril 2018.
Tuir Diretór Nasionál Operasaun Aduaneiru AA, Julião Jose Ximenes hateten, ita nia enkontru ida ohin foka liu ba iha atividade importasaun no esportasaun viaturas ne’ebé liga ho ita nia Dekretu Lei No 30/2011. Tanba iha informasaun balun katak problemas ki’ik oan sira ne’ebé sempre akontese iha fronteiras. Ho situasaun sira ne’e, maka iha inkontru ida ohin atu bele transforma informasaun ba malu, oinsa maka ita bele kria liña koordenasaun servisu ida ne’ebé diak ba atendimentu kliente sira iha fronteiras.
“Fizikamente institusaun AA, DNTT no DNCE halo kna’ar tuir ida-idak nian, maibé administrativamente bele kompletu no la kompletu. Ho situasaun sira ne’e maka ba prosesu administrativu ita presiza hare’e no kompleta malu diak liu tan”, katak nia.
Relasiona ho enkontru refere tuir Diretór Autoridade Aduaneira Maliana, Alberto Seixas hateten agradese tebes ba enkontru ida ohin, maibé iha difikuldade barak maka instituisaun relevantes hasoru iha área kontrolu fronteiras. Iha problema ne’ebé ita hasoru maka ne’e falta informasaun no laiha liña koordenasaun ida ne’ebé imediatu bainhira mosu problema nune’e mós ita la partilla lei sira ba malu atu bele kria pasu amizade ida ne’ebé diak.
“Hanesan servidór estudu buka atu bele halo koordenasaun servisu ida ne’ebé diak ho parte relevantes sira, karik iha problema ki’ik o’an ruma buka para atu bele resolve no labele direitamente divulga uluk ba nasionál”, katak Alberto.
Iha sorin seluk mós tuir Representante DNTT, Xefe Departamento Viaturas, Nelson S. Martins hateten katak iha oportunidade ida ne’e agradese ba ekipa Autoridade Aduaneira tanba bele kria ona enkontru ne’ebé inklui parte relevantes sira. Inisiativa ida ne’e diak tebes, tanba durante ne’e ami rekoñese katak ami la iha ligasaun direita ho munisípiu sira, dala barak ami nia diretór kontaktu direta ho Diretór Nasionál Autoridade Aduaneira. DNTT mos rekomenda ba alfandega atu proseu dokumentus importasaun no exportasaun presiza uniforma hanesan utiliza iha porto Dili, e importantes mos ba karimbo, se lae ema balun bele falsifika.
Durante enkontru ida ne’e iha mós preokupasaun balun hosi reprezentante Diresaun Nasionál Comersiu Externo (DNCE) Autoridade Munisipio Maliana Henrique M. Leite relasiona ho atitude importadóres balun hetan lisensa importadór bainhira halo importasaun sasan no fa’an direita hosi nai nain rasik, dala ruma kareta tama husi fronteira mai direta faan iha merkadu. Ho ámbitu situasaun sira hanesan ne’e bele afeita ba ita nia negosiante ki’ik sira iha Timor-Leste. Tanba ne’e husu karik iha mudansa ba sistema ruma ita bele regula mós atitude importadór fa’an direita sira.
Iha inkontru ida ne’e hetan partisipasaun másimu hosi funsionáriu Autoridade Aduaneira Maliana no Batugede, nune’e mós hetan partisipasaun hosi reprezentante Diresaun Nasionál Transporte Terrestres (DNTT) no Diresaun Nasionál Comersiu Esterno (DNCE).