• Mensajen Ministra Finansas En Ezersisiu no Vise Ministra Finansas, Sara Lobo Brites relasiona Sensus Agríkola dahuluk iha Timor-Leste 2019.

Home » Anúnsiu » Mensajen Ministra Finansas En Ezersisiu no Vise Ministra Finansas, Sara Lobo Brites relasiona Sensus Agríkola dahuluk iha Timor-Leste 2019. Imprime pájina

Mensajen Ministra Finansas En Ezersisiu no Vise Ministra Finansas, Sara Lobo Brites relasiona Sensus Agríkola dahuluk iha Timor-Leste 2019.

20190813_Mensajen Ministra Finansas En Ezersisiu no Vise Ministra Finansas Foto

Ohin, Ha’u haksolok tebes tanba Sensus Agríkola 2019 sei hahú implementa ba dahuluk iha ita nia rai doben ida ne’e.

Ministériu Finansas ho Ministériu Agrikultura no Peskas liu-hosi Diresaun Jerál Estatístika servisu durante tinan rua-ona hodi halo preparativus. Ne’e duni ha’u fiar katak Sensus agríkola sei implementa ho susesu iha tinan ida ne’e.

Ita presiza hatene sé se de’it maka hala’o vida nudár agrikultór?
Ita presiza hatene kompozisaun populasaun Agrikultór sira?
Sira maioria ema foin sa’e?
Mane no Feto hira mak hala’o serbisu agrikultura?
Sira hela iha ne’ebé? Iha sidades?. Iha área rural ou urbana?
Oinsa sira nia nível edukasaun ka koñesimentu kona-bá agrikultór?
Atividade agríkola saida mak sira iha?
No kondisaun uma-kain agríkultur sira?
Oinsa mak agrikultór sira asesu ba sira nia to’os, natar no seluk tan?
Oinsa mak agrikultór sira asesu ba merkadu?

Sensus Agríkolas mak instrumentu úniku ba halibur informasaun hotu-hotu hodi hetan dadus lolos kona-bá karáteristika ita-nia Populasaun Agríkola. Maibé dadus ne’e bele hetan liu hosi ita-boot sira nia tulun. Ho ita HOTU-HOTU iha Timor-Leste nia tulun: husi área rurais to’o iha áreas urbanas, ITA HOTU-HOTU TENKE HOLA PARTE IHA SENSUS AGRÍKOLA 2019!

Ita-nia partisipasaun ne’e esensiál; ita hotu-hotu hanesan xavi ba susesu Sensus agríkola!
Ne’e hanesan parte hosi responsabilidade sívika ema idak-idak ninian.

ITA NIA ALIN KA OAN ENUMERADÓR SENSUS AGRÍKOLAS SIRA SEI VIZITA IDAK-IDAK NIA UMA-KAIN IHA LORON 13 FULAN AGUSTU TO’O FALI LORON 13 FULAN OUTUBRU 2019.

Enumeradór sira sei ba ita-nia uma-kain atu husu perguntas importantes ne’ebé ita presiza responde ho lolós. Ita-nia resposta sei rai ho seguru no konfidensiál: “ HANOIN DIDI’AK BA NO DEKLARA HOTU BA SIRA, TAMBA SIRA MAK SEI HALIBUR ITA HOTU-HOTU NIA INFORMASAUN!

Enumerasaun sei lori ita-nia tempu minutu balun de’it. Tan ne’e simu ho didi’ak ba ita-nia enumeradór sira ba ita-nia uma-kain no favor fó informasaun ne’ebé lolós ba perguntas ne’ebé enumeradór sira sei husu ba ita. Perguntas sira ne’e purezemplu kona-bá idade, edukasaun, empregu, relijiaun, kondisaun uma, hela fatin, atividade agrikultura no seluk-seluk tan.

Susesu husi Sensus Agríkola ne’e, depende ba servisu maka’as husi enumeradór sira, maibé depende liu ba ita-boot sira ne’ebé fó informasaun.

Servisu hamutuk no partisipa iha Sensus Agríkolas 2019 sei tulun mos governu define politika no programa ne’ebe apropriadu ba dezenvolvimentu setór agrikula no partikularmente ba ita nia maluk agrikultór sira.

Ha’u hatene katak, ha’u bele konta ho ita, hodi ita mós bele hetan kontajen!
“HAU NIA RESPOSTA; HAU NIA FUTURU”
HOLA PARTE BA! SENSUS AGRIKULA 2019 YES!