• MF Aprezenta Projetu Deliberasaun Selebra Akordu Entre Governu TLS Ho OIT

Home » Announcements » MF Aprezenta Projetu Deliberasaun Selebra Akordu Entre Governu TLS Ho OIT Print Page

MF Aprezenta Projetu Deliberasaun Selebra Akordu Entre Governu TLS Ho OIT

20200521_MF Aprezenta Projetu Deliberasaun Selebra Akordu Entre Governu TLS Ho OIT-edited by DGuterres

Governu liuhusi Ministra Finansas Interina i Atuál Vise-Ministra Sara Lobo Brites aprezenta ona projetu deliberasaun iha reuniaun Konsellu Ministru hodi selebra akordu ida entre Governu Timor-Leste ho Organizasaun Internasionál de Trabalho (OIT).

“Ministra Finansas em ezersísiu aprezenta mós projetu deliberasaun ne’ebé hetan aprovasaun husi Konsellu Ministrus, kona-ba autorizasaun selebrasaun akordu ida entre Governu Timor-Leste ho Organozasaun Internasionál de Trabalho (OIT). Nia ambitu kona-ba subvensaun programa katak, la husik ema ida ba kotuk iha Timor-Leste liu-liu iha kontestu esforsu Timor-Leste nian luta kontra Covid-19”, relata Ministru Fidelis Manuel Leite Magalhães liuhusi konferensia imprensa iha Auditórium Ministériu Finansas iha loron 21 Fulan-Maiu 2020.

Organizasaun Internasionál de Trabalho fó apoiu finanseiru ba implementasaun transferensia osan ba uma kain, liu-liu uma kain sira ne’ebé maka ho rendimentu ki’ik.

Governante ne’e esplika, apoiu finanseiru ne’e sei kontribui ba Governu ninian esforsu iha luta kontra Covid-19. Tuir akordu ne’e rasik, Organizasaun Internasionál de Trabalho sei entrega ba Governu Timor-Leste osan ho montante 748 mil dólar amerikanu hodi finansia kustu operasionál ba implementasaun apoiu agregadu família Timor oan sira ne’ebé hetan aprovasaun husi dekretu-lei n0 15/2020 loron 30 fulan-Abril.

“Osan 748 mil dólar amerikanu husi Organizasaun Internasionál de Trabalho sei fó mai iha Governu Timor-Leste, i sei kontribui ba iha ita nia implementasaun apoiu ne’ebé ita sei fó”, dehan Governante ne’e.
Iha reuniau Konsellu Ministrus ne’e fó mós plenus poderes ba Ministra Finansas Interina i Atuál Vise-Ministra Sara Lobo Brites reprezenta Governu Timor-Leste atu bele asina akordu ho Organizasaun Internasionál de Trabalho (OIT).