• MF Dissemina Regras no Procedimentu Tetu Agregadu OJE 2020

Home » Announcements » MF Dissemina Regras no Procedimentu Tetu Agregadu OJE 2020 Print Page

MF Dissemina Regras no Procedimentu Tetu Agregadu OJE 2020

Ministériu Finansas liu husi Diresaun Jerál Planeamentu no Orsamentu (DJPO) konvoka sesaun trabalho ida hodi dissemina regras no procedimentu tetu agregadu Orsamentu Jerál Estadu 2020 ba Linha ministériu, instituisaun servisu, fundu autónomu nomós municípiu atu bele hahú prepara sira nian orsamentu 2020.

“Tetu agregadu ba Orsamentu Jerál Estadu 2020 mak hamutuk US$ 1,492.3m ne’ebé distribui ba Salários no Vencimentos $ 204,5m, Bens no Servisus $ 558.6m, Transferências Públikas $ 407.3m, Kapitál Menor $ 6.7m no Kapitál Dezenvolvimentu $ 315.2m. Tetu agregadu iha leten halo kobertura ba despezas Fundu Covid-19 ho totál $ 220m, Empréstimu $ 60m, RAEOA-ZEESM $ 76m no Apoiu husi EU (DBS) hamutuk $ 7.5m”, tuir komunikadu ne’ebé asesu husi DJPO iha loron 2/07/2020.

Determinasaun tetu agregadu no desagregadu halo refleksaun ba kapasidade ezekusaun iha períodu regime duodecimál husi fulan Janeiru-Maiu. Projesaun alokasaun rejime duodecimál husi Junhu-Outobru no alokasaun foun inklui medidas essenciais sira entre fulan Novembru-Dezembru 2020.

Iha komunikadu ne’e informa katak, enquantu mundu tomak no liu-liu Estadu no Governu Timor-Leste enfrenta situasaun pandemia Covid-19 no aplikasaun regime duodecimál iha tempu ne’ebé naruk liu. Governu decide atu la opta prioridade ne’ebé ho alvu ás liu no konsentra ba de’it programa prioridade governu nian iha OJE 2020. Programa sira mak hanesan atu kontribui ba atividade husi tinan 2019 nian ba medidas essensiais ho obrigações legais no kontratuais nomós konsentra ba prevensaun no mitigasaun pandemia Covid-19.

Nune’e mós haktuir kalendáriu ne’ebé maka iha Governu sei submete Proposta OJE 2020 ba Parlamentu Nacionál iha loron 15 Fulan Setembru 2020. “Tanba ne’e husi Distribuisaun Tetu Orsamentu ne’ebé realiza ona Ministériu no Intituisaun sira iha de’it períodu fulan ida atu prepara no konklui preparasaun planu atividade ho alokasaun orsamentu tuir tetu ne’ebé atribui ona”, haktuir komunikadu.

Finalmente Ministériu Finansas no Gabinete Primeiru Ministru liu husi Unidade Planeamentu Monitorizasuan no Avaliasaun atu bele konklui ninia verifikasaun no analiza finál hodi hetan aprovasuan finál husi Conselho de Ministros antes procede ba finalizasaun dokumentu suplementar ba OJE 2020.