• MF Hala’o Hela Levantamentu Dadus Ba OJE 2020

Home » Announcements » MF Hala’o Hela Levantamentu Dadus Ba OJE 2020 Print Page

MF Hala’o Hela Levantamentu Dadus Ba OJE 2020

20200603_MF Hala'o Hela Levantamentu Dadus Ba OJE 2020 - Editado por DGuterres

Ministériu Finansas (MF) liuhusi Diresaun Jerál Planeamentu no Orsamentu (DJPO) oras ne’e dau-daun servisu hela ho ministériu sira komesa halo levantamentu dadus kona-ba Orsamentu Jerál Estadu 2020 nian.

Tuir Vice-Ministra Finansas Sara Lobo Brites hateten, kona-ba orsamentu jerál estadu 2020 hanesan ita hotu-hotu akompaña iha Fulan-Maiu nia laran ami aprezenta ona kalendáriu iha Konsellu Ministru no hetan tiha ona aprovasaun. Oras ne’e dau-daun Ministériu Finansas nia tékniku sira liu-liu sira Diresaun Jerál Planeamentu no Orsamentu (DJPO) sira servisu hela ho ministériu sira komesa halo levantamentu dadus. Tuir kalendáriu prátikamente ita prepara orsamentu ida ba de’it tinan ida ne’e nia laran, maibé ezekusaun kuaze la’o tiha ona ho duodésimu. Entaun ita sei habadak tiha nia prosesu barak, liu-liu prosesu sira hanesan jornada orsamentál no komité revisaun orsamentál sei la realiza.

“Ita simplifika nia prosesu para ita bele kumpri kalendáriu ne’ebé aprova iha Konselhu Ministru iha loron 30 Maiu”, informa Vice-Ministra Finansas Sara Lobo Brites iha Palásiu Governu hafoin enkontru iha Konsellu Ministru iha loron 03 Fulan-Juñu 2020.

Vice-Ministra Finansas Sara Lobo Brites mós reforsa tan kona-ba submisaun ba Parlamentu Nasionál (PN) depende koordenasaun entre Ministériu Assuntus Parlamentares no Parlamentu Nasionál atu haree kalendáriu Parlamentu ne’e rasik. Tanba ita hotu-hotu hatene Parlamentu Nasionál mós iha nia períodu resesaun ne’ebé maka obviamente akontese iha Jullu to’o Setembru. Entaun ami hein hela ordem husi Ministru Assuntus Parlamentares atu fó hatene, data ne’ebé maka Ministériu Finansas liuhusi Primeiru Ministru submete orsamentu ba iha Parlamentu Nasionál.

“Montante ba 2020 hau seidauk bele divulga agora iha faze inisiu mais o que é certo despezas sira ne’ebé akontese durante iha períodu duodésimu ita sei enkuadra hotu. I depois assegura mós despezas durante fulan 3 iha tinan rohan”, hateten Vice-Ministra Finansas.

Governante ne’e mós esplika liutan katak, purtantu ami seidauk iha nia dadus finál mais nia preparasaun ne’e ita prepara orsamentu 2020 no 2021 dala ida. Entaun agora dau-daun ami fokus hela ba orsamentu 2020. Enkuantu kalendáriu ba orsamentu 2021 sei hein lai membru Governu sira simu tiha lai posse hotu provavelmente semana oin maka foin aprezenta kalendáriu. Ne’e para Ministrus sira bele iha laran hotu kedas ita bele hahú nia prosesu. Ita halo prosesu simultânea rua dala ida maibé nia kalendáriu maka diferente. Kalendáriu submisaun Orsamentu Jerál Estadu 2021 nian tuir lei submete iha 15 Outobru.