• MF Hasa’e Koñesimentu Ofisial Finansas Iha Área Kontabilidade No Relatóriu Finanseiru Setor Públiku

Home » Anúnsiu » MF Hasa’e Koñesimentu Ofisial Finansas Iha Área Kontabilidade No Relatóriu Finanseiru Setor Públiku Imprime pájina

MF Hasa’e Koñesimentu Ofisial Finansas Iha Área Kontabilidade No Relatóriu Finanseiru Setor Públiku

1

Ministériu Finansas liuhosi Diresaun Jerál Tizouru (DJT) kontinua hasa’e koñesimentu iha Área Kontabilidade no Relatóriu Finanseiru Setor Públiku ba ofisial finansas sira iha Munisípiu Baucau, Lautem, Viqueque no Manatuto atu nune’e sira bele prepara rasik sira nia ezekusaun trimestral no relatóriu finanseiru anuál. Treinamentu ne’e sei hahu’u hosi loron 10 -14 Juñu 2019 iha salaun ESTAE Munisípiu Baucau.

Treinamentu hirak ne’e foka liu oinsa atu hasa’e koñesimentu ofisial finanças munisípiu iha área Kontabilidade no Relatóriu Finanseiru Setor Públiku bazeia ba rekomendasoens hosi Tribunal de Kontas katak, kada instituisaun estadu hotu ne’ebé mak finansiadu hosi orsamentu estadu tenke prepara rasik sira nia relatóriu finanseiru anuál.

Tuir Diretór Nasionál Kontabilidade no Regulasaun Finanseiru, Ministériu Finansas (MF) Ernesto da Conceição Silva hateten ofisial finansas iha 12 munisípiu sira hotu tenke hetan koñesimentu ida klean atu nune’e sira bele prepara relatóriu ezekusaun trimestral no relatóriu finanseira anuál.


“Espektativa ne’ebé Ministériu Finansas hakarak hosi treinamentu ida ne’e munisípiu ida-idak sei prepara rasik sira nia relatóriu rekonsiliasaun bankaria, relatóriu fluksu de kaixa nomós relatóriu ezekusaun trimestral”. Haktuir Ernesto da Conceição Silva

Faze dahuluk hosi treinamentu ne’e sei konsentra liu ba komponentes 3 hanesan Rekonsiliasaun Bankaria, Fluksu de Kaixa no Relatóriu Ezekusaun Trimestral ba Munisipal sira.

Wainhira faze dahuluk ne’e remata, Ministériu Finansas liuhosi DJT sei kuntinua ho treinamentu faze daruak entre fulan Agostu no Setembru 2019. Treinamentu faze daruak sei konsentra liu ba oinsa prepara relatóriu finanseiru anual ba munisípiu sira tuir padraun kontabilidade internasionál hodi nune’e bele submete ba Tribunal de Kontas no Parlamentu Nasionál.

Diretor ne’e mós subliña liutan katak, treinamentu ida ne’e sei valoriza partisipante sira ho sertifikadu ida nivel nasionál iha jestaun finansas publika. Treinamentu ida ne’e hetan suposta hosi Uniaun Europeia no Ministériu Finansas servisu hamotuk ho Ministériu Administrasaun Estatal (MAE) iha munisípiu sira hodi realiza treinamentu refere. Treinamentu ne’e nia durasaun loron 5 no envolve direitamente hosi ofisial finansas sira hanesan Munisípiu Baucau, Viqueque, Lautem no Manatutu ho total partisipantes ema nain 16 ho metodu treinamentu uza slide show, kria livru manual no video tutorial.


Iha sorin seluk tuir Sekretáriu Munisipal Viqueque José da Costa de Sousa hateten treinamentu ida ne’e diak tebes hodi aumenta ofisial finansas munisípiu sira nia kapasidade atu bele jere servisu finansas ho diak. Tanba durante ne’e ofisial finansas sira iha vontade atu servisu, maibé sira nia koñesimentu maka la to’o. Agradese ho prezensa Ministériu Finansas nia bele reforsa tan ofisial finansas sira nia koñesimentu liuhusi treinamentu atu nune’e sira bele jere rasik orsamentu ne’ebé alokadu ba munisípiu.