• MF Konklui Ona Pagamentu Subsidiu Remuneratóriu Ba PNTL no F-FDTL

Home » Announcements » MF Konklui Ona Pagamentu Subsidiu Remuneratóriu Ba PNTL no F-FDTL Print Page

MF Konklui Ona Pagamentu Subsidiu Remuneratóriu Ba PNTL no F-FDTL

20200618_Pagamentu Subsidiu Remuneratóriu Ba PNTL no F-edit OB

Ministériu Finansas liu husi Sekretariadu Tékniku Fundu Covid-19 konklui ona pagamentu subsidiu remuneratóriu ba PNTL no F-FDTL ho montante US$ 5,395,905.00 no totál benifisiáriu hamutuk 6.011.

Relasiona ho ida neé, Vice-Cordenador Interino Sekretariadu Tékniku Fundu Covid-19, Ernesto da Conceição Silva hateten katak Transfêrencia ba PNTL no F-FDTL hala’o tiha ona, no kuaze sira hotu-hotu simu ona, no iha balun maka hetan naran dobru, maibe horseik konsege rezolve ona. Sira ne’ebé maka simu dobru ne’e, sekretariadu Covid-19 kontakta ona para sira bele ba redeposita fali osan ne’e mai konta Covid-19 nian, no balun konsege intrega ona iha fundu.

“Entaun horseik ekipa Sekretáriadu Tékniku Fundu Covid tu’un diretamente ba Banku sira no halo ona konfirmasaun hodi bele hadia failansu sira”, informa Vice-Cordenador Interino Sekretariádu Tékniku Fundu Covid-19, Ernesto da Conceição Silva iha nia servisu fatin Ministériu Finansas iha loron 18 Fulan Junho 2020.

Nuneé totál orsamentu ne’ebé maka halo ona transfêrencia iha loron 15 Fulan Junho 2020 ba benifisiáriu sira ho montante US$ 5,395,905.00, corresponde ba totál benifisiariu husi membru PNTL no F-FDTL hamotuk 6.011. Husi montante total refere maka orsamentu alokadu no transferidu ba Policia Nacional de Timor-Leste (PNTL) hamutuk US$3,599,055.00, ne’ebé corresponde ba totál benifisiáriu 4.011, enkuantu orsamentu alokadu no transferidu ba Falintil-Forsa DefezaTimor-Leste (F-FDTL) hamutuk US$1,796,550.00 ne’ebé corresponde ba totál benifisiáriu 2000.

Vice-Cordenador Interino Sekretariádu Tékniku Fundu Covid-19, Ernesto da Conceição Silva esplika liutan katak, prosesu pagamentu subsidiu remuneratóriu ba membru Policia Nacional de Timor-Leste (PNTL) no Falintil-Forsa DefezaTimor-Leste (F-FDTL) devia tuir dadus konta bankaria bai-bain ou normal estabelisidu ona iha sistema Ministériu Finansas nian. Maibe tanba sira balun hakarak uza konta bankaria seluk la’os konta bankaria ne’ebé ezisti ona iha sistema, mak resulta diferença ou naran dobru hanesan temi iha leten. Nota katak sira balu dalaruma submete konta bankaria sira nia kaben, karik tanba sira halo joint account, entaun identifika dobru.