• MF Simu Ona Dadus Pagamentu Subsidiu Uma Kain Husi MSSI

Home » Announcements » MF Simu Ona Dadus Pagamentu Subsidiu Uma Kain Husi MSSI Print Page

MF Simu Ona Dadus Pagamentu Subsidiu Uma Kain Husi MSSI

20200528_MF Simu Ona Dadus Pagamentu Subsidiu Uma Kain Husi MSSI-edited by DGuterres

Ministériu Finansas liuhusi Sekretariadu Tékniku Jestaun Fundu Covid-19 simu ona dadus pagamentu subsidiu Uma Kain husi Ministériu Solidaridade Sosiál no Inkluzaun (MSSI) hodi bele inisia ona nia prosesu pagamentu sira.

Tuir Ministra Finansas interina i Atual Vise-Ministra Sara Lobo Brites hateten, loos duni Ministériu Finansas simu ona dokumentu husi Ministériu Solidaridade Sosiál no Inkluzaun (MSSI) iha loron 26 Fulan Maiu 2020. I hato’o kedas ona ba Sekretariadu Tékniku Jestaun Fundu Covid-19 para bele hahú nia prosesu pagamentu sira. Hanesan ita hotu hatene, pagamentu ne’e involve osan bo’ot, i perkorre teritoriu tomak, entaun ita sei halo faze lubuk ida. Primeiru ita presiza halo kabimentu orsamentu pur-munisipiu tanba distribuisaun ne’e pur-munisipiu, i segundu sei halo transferénsia ba konta bankária kada suku ida-idak. Ita iha 452 sukus, quer dizer pagamentu transasaun mós sei halo ba 452 sukus.

“Prosesu ida ne’e kompleksu oituan maibé, Sekretariadu Tékniku Jestaun Fundu Covid-19 esforsu loos desde kedas horseik, sira servisu hamutuk ho MSSI hahú ona nia prosesu. I ita espera iha fim de semana ida ne’e bele konklui ona ho nune’e MSSI bele hasai orariu mekanismu pagamentu nian”,informa Ministra Finansas interina i Atual Vise-Ministra Sara Lobo Brites iha Ministériu Finansas, loron 28 Fulan-Maiu 2020.
Prosesu sira ne’e la’os de’it selu ba ita nia benifisiariu sira, mais ita mós presiza aloka kustus operasionais. Ita hatene katak, Ministériu Solidaridade Sosiál no Inkluzaun (MSSI) sei mobiliza ekipa 452 hodi perkorre hotu kedas suku iha teritoriu no entaun envolve kustu ne’ebé signifikante oituan.

“Maibé hanesan ita hotu-hotu akompaña iha loron rua liu ba ita hetan mós apoiu husi ILO ne’ebé maka apoiu 748 mil dólares bele tulun ita iha implementasaun programa ida ne’e”, hateten Ministra Finansas interina.

Ministra Finansas interina i Atual Vise-Ministra Sara Lobo Brites aproveita mós atu informa ba públiku: “Tanba iha loron rua liu ba pur-lapsu loloos ne’e Hau atu dehan apoiu ILO ne’e iha 748 mil, maibé Hau temi ba méida sira iha 700 itál milhoens. Purtantu ida ne’e erru ida pur-lapsu, Hau ko’alia sala tiha iha momentu ne’eba. Iha biban ida ne’e, aproveita atu halo koresaun kedas katak, apoiu husi ILO 748 mil. ita mós hetan apoiu husi Governu Australia ba kustu operasionál ne’ebé maka fó ba MSSI purvolta 389 mil”.

“Purtantu husi parte fundu tenki buka tan 546 mill para bele adisiona ba iha kustu operasionál ne’ebé MSSI aprezenta hodi fó apoiu ba nia tékniku sira tun hodi halo pagamentu”, esplika Ministra.
Governante ne’e mós reforsa tan katak, dadus ne’ebé maka MSSI hato’o mai Ministériu Finansas ida ne’e finál ona. Tanba ita hotu-hotu akompaña mudansa de dadus ne’e maka lori prosesu ne’e dada bei-beik, mais ami asumi katak dehan dadus ne’e finál ona. Se no kazu iha tan mudansa de dadus mós ita lable atende ona i presiza supende lai. Tanba ita presiza atende lai pedidu pagamentu ida ne’e, ita hotu-hotu akompaña publiku kuaze lorloron hein hela subsidiu uma kain ne’e bainhira maka bele selu.

Apoiu diretu ba benefisiariu ho nia totál montante hamutuk $ 65 milhoens itál. Se ita adisiona tan ho nia kustu operasionál sa’e ba $ 67 milhoens itál. Ida ne’e maka dadus ida ita hetan husi MSSI, liuhusi sira nia proposta. Enkuantu nia benifisiariu totál ne’ebé agora daudaun ami simu uma kain hamutuk 326.739 ida ne’e maka ita hetan bazeia ba dokumentu ne’ebé ami simu.

Pagamentu ida ne’e assosiadu ho estadu emergência maibé haree ba limitasaun iha fundu nomós desizaun ne’ebé maka halo tiha ona pagamentu ne’ebé MSSI atu halo ba fulan rua nian. Embora estadu emergência estende maibé pagamentu ba fulan rua nian de’it tanba seidauk iha desizaun ida.