• Ministériu Finansas dezimina “New Deal” no “g7+” iha munisípiu Suai no Oé-Cusse

Home » Announcements » Ministériu Finansas dezimina “New Deal” no “g7+” iha munisípiu Suai no Oé-Cusse Print Page

Ministériu Finansas dezimina “New Deal” no “g7+” iha munisípiu Suai no Oé-Cusse

Dili, 18 Maiu 2015

Ekipa konjunta inter-ministerial ida kompostu husi Ministériu Finansas (Sekretariadu g7+, Unidade Jestaun Parseiru Dezenvolvimentu, Unidade Fundu Petrolíferu, Direisaun Jeral Álfandega, Direisaun Jeral Estatístika) no Ministériu Negósiu Estranjeiru, foin lalais ne’e halao vizita ba munisípiu Kovalima iha loron 5 Abríl 2015 no zona espesial ekonomia sosial merkadu (ZEESM) Oé-Cusse iha loron 7 Abril 2015. Sosializasaun ida ne’e hanesan kontinuasaun husi tinan kotuk ne’ebé halao iha munisípu Viqueque no Manatuto.

Objetivu husi vizita sira ne’e maka hodi dezimina informasaun konaba “g7+” no “New Deal” no ninia implementasaun iha Timor-Leste no Timor-Leste-nia esperiénsia iha nivel internasional ho estadu post-konflitu sira.

Ho New Deal, estadu frajíl sira ne’ebé hamahon aan iha g7+ konkorda katak “atu asisténsia esterna sai efikás liu, maka presiza dezenvolvimentu no formatu implementasaun ida foun, ne’ebé adapta ba situasaun no dezafiu estadu frajil sira nian”. Dr. Helder da Costa, Sekretáriu Jeral Sekretáriadu g7+, haktuir katak New Deal ida ne’e bazeia ba prinsípiu importante tolu – “PSG, FOCUS no TRUST”.

Estadu frajíl sira hatuur diálogu maka dalan diak liu hodi konsolida paz no harii estadu hanesan baze importante ba dezenvolvimentu. Sira konkorda hodi desidi objetivu prinsipal lima – lejitimidade polítika, siguransa, justisa, baze ekonómika, reseita no servisu. Ho FOCUS (ENFOQUE), estadu frajíl sira ejiji prosesu envolvimentu ida ne’ebé foun ba apoiu sira iha prosesu tranzisaun inklusiva no lidera husi nasaun sira iha estadu frajíl. Ho New Deal, estadu frajíl sira kompromete TRUST (KONFIANSA) mútua liu husi ajuda no jestaun ba rekursu ho efikás no orientasaun ba hetan rezultadu no uza ho transparente ajuda hotu ne’ebé hetan husi doador sira.

Aprezentadór sira moos koalia konaba influénsia Timor-Leste nian iha nivel internasional liu husi g7+ no ninia solidaridade ba estadu frajíl sira tuir prinsípiu koperasaun “F ba F” – (Frajíl ba Frajíl).

Liu husi g7+, Timor-Leste fahe ninia esperiensia oinsa jere rekursu natural, finansa públika, no reforma siguransa. Liu husi g7+, Timor-Leste “joga nia polítika iha mundu internasional” liu-liu iha determinasaun objetivu sira post-MDG 2015. Iha ne’ebá estadu frajíl sira ejiji atu inklui “paz no estabilidade” hanesan objetivu ida MDG tuir mai. Laiha paz laiha dezenvolvimentu, laiha dezenvolvimentu sem paz. Estadu frajíl sira kaer metin ba prinsípiu “nada sobre nós sem nós” atu involve sira iha prosesu debate tomak ba post-MDG 2015.

Dr. Helder moos hatutan katak “maske Timor-Leste nasaun kiik, maibe hatudu ona ninia solidaridade hodi tulun nasaun frajíl sira” hanesan prosesu resensiamentu iha Giné-Bisau no tulun seluk ba nasaun sira ne’ebé hasoru gripe moras ébola.

Ekipa Ministériu Finansas nian moos halo aprezentasaun ba tópiku relevante no importante sira seluk hanesan polítika Governu nian hodi aumenta reseita doméstika, importansia no jestaun Fundu Petrolíferu no rezultadu sensus 2010.

Partisipante sira apresia tebes ho esforsu ne’ebé Ministériu rua ne’e halo hodi sosializa informasaun importante hirak ne’e direitamente. Sira moos senti orgullu ho Timor-Leste, “maske nasaun kiik maibe bele ona foo tulun ba nasaun sira seluk, liu-liu estadu frajil sira”. Maibe sira moos husu atu Governu no Estadu Timor-Leste “la bele taka matan no tau moos atensaun ba situasaun rai-laran ne’ebé sei hasoru difikuldade barak”.