• Ministeriu Finansas Dissemina Regras no Prosedimentus Elaborasaun OGE 2021 ba Instituisoens Estadu

Home » Announcements » Ministeriu Finansas Dissemina Regras no Prosedimentus Elaborasaun OGE 2021 ba Instituisoens Estadu Print Page

Ministeriu Finansas Dissemina Regras no Prosedimentus Elaborasaun OGE 2021 ba Instituisoens Estadu

Ministériu Finansas liuhusi Diresaun Jeral Planeamentu no Orsamentu (DGPO) en kolaborasaun ho Unidade Planeamento Monitorizasaun no Avaliasaun (UPMA) konvoka sesaun trabalhu hodi disemina Regras no Prosedimentus Elaborasaun OJE 2021 no mós ditribui tetu agregadu OJE ba Ministériu no Instituisoens Estadu.

Diretór Geral Planeamento no Orsamento (DGPO) Januário da Gama hatete katak sesaun ida ne’e halo ho baze ba aprovasaun husi Konsellu Ministru iha loron 2 Fulan Setembru ne’ebé mak aprova ona tetu agregadu Orsamentu Jerál Estadu (OJE) tinan 2021 nian ho montante bilaun $ 1,6. Tetu bilaun $ 1,6 ida ne’e hanesan tetu ida ne’ebé Governu deside baseia ba verifikasaun no mapeamentu husi Ministériu Finansas no UPMA ba medida rekuperasaun ekonómika nebee aprezenta husi Komisaun Planu Rekuperasaun Ekonómika iha loron hirak liu ba

“Nune’e tetu bilaun $ 1,6 halo ona kobertura ba despezas adisionál sira relativas ba medidas atividade rekuperasaun ekonómika ne’ebé kontribui husi ministériu no institusaun sira sei prioritiza iha tinan 2021 nian. Nunee, bele fasilita Governu atu atinje objetivu no alvu hirak nebee VIII Governu hatur tiha ona iha tinan oin mai”, informa DGPO Januario da Gama iha Auditorium Ministériu Finansan iha loron 04 Fulan Setembru 2020.

Alende ida ne’e Konsellu Ministru mós aprova ka apresia proposta prioridades nasionais sira ne’ebé sei implementa iha OJE 2021. Prioridade nasionais sira ne’e hetan apresiasaun ho alinhamentu ba livru mean ne’ebé hanesan gia ba prosesu elaborasaun OJE 2021 nian.

Januario esplika liu tan katak, iha tinan oin mai setór kapitál desenvolvimento hanesan prorioridade numeru un, setór dezenvolvimentu ekonómiku mak prioridade numeru dois, setor ida nee enkuadra mós atividade sira ne’ebé alinha ho rekuperasaun ekonómia. Setór terseiru maka infraestrutrua bazika no konektividade sira. Prioridade numeru kuartu maka dezenvolvimentu ambiental, relasiona ho aspetu kuidadu no konservasaun ita nia ambiente no Ikus-liu maka setór instituisaun nebee importante mos ba ita.

“Proposta prioridade sira ne’ebé hetan apresiasaun ho nia alokasaun bilaun $ 1,6 aloka ba iha kategoria salariu vensimentu millaun $ 216,2, beins e servisu millaun $ 451,1, transferência públika millaun $ 480,7, kapitál dezenvolvimentu millaun $ 235,8, kapitál minor halo de’it kontinuasaun ba akizasaun ekipamentu ne’ebé projeta ona, katak, se iha tinan nia rohan la konsege, mak sei lori orsamentu ba iha tinan oin mai”, informa DGPO Janaurio da Gama.

Husi bilaun $ 1,6 ida ne’e inklui mós despezas ba RAEOA-ZEESM millaun $ 127 ne’ebé maka iha proposta 2020 nian xumba iha Parlamentu Nasionál. Nune’e rekonsidera fali iha tetu OJE 2021 ninian para bele kontinua implementa nia programa no projetu foun sira tuir planu estratéjiku RAEOA-ZEESM ninian.

“Tinan ida ne’e Ministériu Finansas prepara orsamentu rua, proposta orsamentu jerál estadu ba tinan 2020 no proposta orsamentu jerál estadu ba 2021 ninian”, informa DGPO Januario da Gama.

Progresu ba preparasaun OJE 2020 to’o ohin tama ona ba iha faze tradusaun no kontrolu kualidade ba livru orsamentu sira no semana oin komesa imprimi ona no iha loron 15 Fulan Setembru 2020 bele aprezenta ona ba Parlamentu Nasionál.

“Iha tempu hanesan Governu liuhusi Ministériu Finansas mós tenki prepara OJE 2021 ninian ne’ebé maka nia tetu orsamental atu distribui ba ministériu no instituisaun sira iha tempu badak. Tuir kalendariu Governu tenki apresenta Proposta OGE 2021 ba Parlamentu Nasional iha loron 15 Outobru 2020 esplika DGPO Januário da Gama.

Signifika katak, haree ba tempu ne’ebé maka iha, Governu liuhusi Ministériu Finansas nota katak, tamba tempu ne’ebé limitadu tebes, ministériu no instituisaun sira hotu iha obrigasaun atu tenki buka tempu extra hodi bele konklui orsamentu ne’e ho diak hodi kumpri ba kalendariu submisaun ba iha Parlamentu Nasionál.