• Ministériu Finansas distribui pakote OJE 2017 no halo dizeminasaun regras no prosedimentu Ezekusaun ba Ministeriu, Instituisaun Estadu hotu inklui Munisipiu 12

Home » Announcements » Ministériu Finansas distribui pakote OJE 2017 no halo dizeminasaun regras no prosedimentu Ezekusaun ba Ministeriu, Instituisaun Estadu hotu inklui Munisipiu 12 Print Page

Ministériu Finansas distribui pakote OJE 2017 no halo dizeminasaun regras no prosedimentu Ezekusaun ba Ministeriu, Instituisaun Estadu hotu inklui Munisipiu 12

Dili, 11 Janeiru 2017, relasiona ho Orsamentu Jeral Estadu (OJE) 2017, ne’ebe mak aprova husi Parlamentu Nasional iha loron 9 Dezembru 2016 no promulga husi Presidente da República iha loron 28 Dezembru 2016 ho nune’e Ministériu Finansas (MF) realiza sesaun trabalhu ida iha Salaun Ministériu Solidariedade Sosial (MSS) hodi distribui ofisialmente pakote Orsamentu Jeral Estadu (OJE) 2017 aprovadu ba kada instituisaun estadu inklui Munisipiu 12 hodi ezekuta tuir idak-idak nia planu no programa ne’ebe determina ona ba tinan 2017 nian.
“Ohin Ministériu Finansas distribui pakote Orsamentu 2017 nian ne’ebe mak promulga ona ba liñas Ministériu no Instituisaun Estadu idak-idak inklui Munisipiu 12 atu nune’e sira bele hahu halo Ezekusaun ba sira nia orsamentu ne’ebe aprova ona”, haktuir Vice Ministru, Sr. Helder Lopes.
Nia mos subliña, alem de ne’e iha sesaun trabalhu ne’e halo mos dizeminasaun ba regras no prosedimentu ezekusaun ne’ebe mak estabelese ona hodi bele regulariza prosesu lalaok ezekusaun Orsamentu 2017 nian. Iha mos aprezentasaun konaba orsamentu no mos husi Gabinete Primeiru Ministru ne’ebe liga liu ba oinsa atu halo aliñamentu entre orsamentu ho planeamentu karik halo mudansa orsamentu oituan oinsa nia efetu ba planu ne’ebe iha. Nune’e mos iha apresentasaun husi Ministériu Planeamentu no Investimentu Estratéjiku liu-liu sobre oinsa ou prosesu atu ezekuta orsamentu ne’ebe ke iha fundu infrastruktura no fundu kapital humanu.
Iha orsamentu 2017 Governu aloka orsamentu tuir prioridades ne’ebe defini tiha ona, tau orsamentu ne’ebe bo’ot ba Ministériu Obras Públika, Transporte no Komunikasaun (MOPTK) tamba kustu ba manutensaun no operasaun ba sentru eletrisidade Hera no Betano no Ministériu Solidariedade Sosial (MSS) hodi hare ba programa asisténsia sosial hanesan bolsa da mãe, idiozus no veteranus.
Nia subliña liu tan, Governu liu husi Ministériu Finansas iha ona regras ezekusaun hanesan Lei orsamentu, Lei jestaun finansas públika, Lei aprovizionamentu no dekretu Governu konaba ezekusaun orsamentu. Ita sei uza regras no lei sira ne’e hotu hodi halo ezekusaun. Nia mos husu atu instituisaun hotu bele ezekuta ho diak no lolos hodi bele atinji metas no objetivu tuir povu nia nesesidade ba nasaun ne’e nia dezenvolvimentu.
Em termus prátika iha servisu balun ne’ebe durante ne’e mak sentraliza iha Diresaun Jeral Tezouro, Ministériu Finansas, sei dezentraliza ba Ministériu/ instituisaun estadu idak-idak para sira mak prosesa pagamentus no Ministériu Finansas sei simu pedidu pagamentu hodi halo verifikasaun no validasaun no haruka ba Banku Central hodi halo pagamentu.
Iha fatin hanesan, governante ne’e informa mos ba partisipantes hotu katak “husi ezekusaun ba tinan 2016 nian, VI Governu Konstituisional konsege ezekuta Orsamentu Jeral kuaze 82% husi OJE 2016 hamutuk bilaun husi $1.952,9 inklui orsamentu retifikativu.
Hola parte iha sesaun trabalhu ne’e mai husi Directores Jerais ba assuntus Finansas Públikas, Directores Administrasaun no Finansas, Pontu Fokais Orsamentu no Planeamentu husi Ministériu/ Agensia Autonómia/ Instituisaun Estadu no Presidente autoridade no Administrador Munisipius.
Sesaun Trabalhu idane’e mos hola parte nudar reuniaun regular entre Ministeriu Finansas ne’ebe lidera husi Diretur Jeral Finansas Estadu no Diretur Jeral Tesouro ho linhas DG no DN sira relativa issue no dezafius ezekusaun Orsamentu nian.