• “Ministériu Finansas distribui Tetu Fiskal Orsamentu Jeral Estadu 2019 ba Linha Ministériu, Servisu Fundu Autonomas, Munisipais no Instituisaun Estadu hotu”

Home » Anúnsiu » “Ministériu Finansas distribui Tetu Fiskal Orsamentu Jeral Estadu 2019 ba Linha Ministériu, Servisu Fundu Autonomas, Munisipais no Instituisaun Estadu hotu” Imprime pájina

“Ministériu Finansas distribui Tetu Fiskal Orsamentu Jeral Estadu 2019 ba Linha Ministériu, Servisu Fundu Autonomas, Munisipais no Instituisaun Estadu hotu”

Ohin dia, 25 Setembru 2018 Ministériu Finansas konvoka sesaun trabalhu metade dia ho objetivu atu halo dizeminasaun kona-ba Prosesu no Prosedimentu preparasaun OJE 2019 no halo Distribuisaun Tetu disagregadu ba Linha Ministériu, Servisu Fundu Autonomas, Munisipais no Instituisaun Estadu hotu.

Distribuisaun Tetu disagregadu nee halo tuir dezisaun Konsellu Ministrus iha dia 21 Setembru 2018 ne’ebe aprova ona tetu fiscal agregadu ho motante $ 1,350,000,000 (la – inklui Imprestimu) hodi finansia despezas Estadu iha tinan 2019 ho Distribuisaun tuir kategoria :
1) Saláriu Vensimentu aloka hamutuk $199.57 miloens
2) Bens Servisus aloka hamutuk $305.2 miloens inklui FDCH
3) Tranferensias Públikas aloka hamutuk $622.36 miloens
4) Kapital Minor aloka hamutuk $4 miloens no restu aloka ba
5) Kapital Desenvolvimentu hamutuk $218.87 miloens *)
6) Iha tinan 2019 aloka mos montante balun ba Kapital Desenvolvimentu – Emprestimo hamutuk $87.0 miloens

Husi distribuisaun tetu disagregadu ida ne’e Linha Ministériu, Servisu Fundu Autónomas, Munisipais no Instituisaun Estadu hotu sei halo diskusaun interna hodi re-aloka ba programa no atividade prioridades iha tinan 2019 hanesan a). Hasa’e produsaun agrikula hodi hametin seguransa aihan no hamenus malnutrisaun. b). Promove edukasaun no formasaun inklusivu ho kualidade no orientadu ba merkadu, c). Hametin servisu saude ne’ebe kualidade no inklusivu hodi – kontinua programa saude na familia, d). Dezenvolve infrastruturas basikas ba: Be’e mos (agua potavel) no sanemanentu, estradas (nasional no rurais), eletrisidade, telekomunikasaun (fibra optika), portu no aeroportu, e). Hemetin institusoens ba desentralizasaun administrative, f). Promove dezenvolvimentu setor turismu, g). Promove ambiente negosiu hodi haburas investimentu setor privadu .

Linha Ministériu, Servisu Fundu Autónomas, Munisipais no Instituisaun Estadu hotu ho kalendáriu ne’ebe aprova ona husi Konsellu Ministrus sei submete proposta orsamentu hamutuk ho Planu Asaun Annual mai Ministériu Finansas no UPMA- GPM iha dia 12 Outubru 2018 hodi bele halo analize klean kona ba lojika no rasionalizasaun ba programa no despezas husi kada orgaun Governamental.

Hodi bele asegura alinhamentu orsamentu no programa no determinasaun prioridades iha tinan 2019, Governu sei estabele Komite Revizaun Polítika hodi halo diskusaun fundamentu ba proposta orsamentu no programa ba seitores save sira nune’e bele promove diak liu tan rasionalizasaun no kualidade Orsamentu Jeral Estadu tinan 2019.

Remata.