• Ministeriu Finansas entrega Sertifikadu ba formadus Broker’s nain 31 iha edifisio Alfândega

Home » Anúnsiu » Ministeriu Finansas entrega Sertifikadu ba formadus Broker’s nain 31 iha edifisio Alfândega Imprime pájina

Ministeriu Finansas entrega Sertifikadu ba formadus Broker’s nain 31 iha edifisio Alfândega

Dili, 15 Novembro 2016.
Vice Ministru Finansas Sr. Helder Lopes, hamutuk ho Diretur Jeral Alfândegas Sr. José António F. Abílio entrega sertifikadu ba formandus – Broker’s ne’ebé mak tuir treinamentu intensivu, passa exame, no hetan lisensa hanesan broker ofisial iha loron 15 Novembro 2016 iha Edifisiu Alfândegas nia Sala Treinamentu Dili. Formasaun ne’e rasik fahe ba faze 3, faze primeiru no Segundu halao iha tinan 2015 no faze ikus halao iha tinan 2016 ho partisipante Broker hamutuk nain 40 (hat nulu) no passa exame nain 31 (tolu nulu rasin ida).
Iha seremonia ne’e, Diretur Jeral Alfândegas Sr. José A. F. Abílio, fo kongratula ba formandus Broker sira ne’ebé mak tuir ona formasaun no ikus mai hetan ona sertifikadu husi Ministério Finansas – Diresaun Jeral Alfândegas nian, nia espera katak ho formasaun ne’ebé mak broker sira hetan bele aumenta sira nia kuiñesimentu no kapasidade atu servisu diak liu tan tamba ita atu tama ona ba faze digitalizadu ou servisu ho sistema online. Ne’e duni husu ba broker sira atu servisu ho responsabilidade, honestidade, integridade no kopera hamutuk ho Alfândegas sira hodi labele halo komplikasaun ba Importadores sira. Klaru iha kompetisaun entre ita boot sira katak semak halo servisu diak no lais nia hetan konfiansa no kliente barak sei ba buka sira. Iha futuru broker sira ne’ebé mak la tuir formasaun no la hetan sertifikadu husi Ministerio Finansa Diresaun Jeral Alfândegas nian sei labele halo atendimentu. Ne’e duni ba Broker sira ne’ebé mak la tuir formasaun no sira tuir exame maibé la passa no lahetan sertifikadu keta laran taridu tamba sei iha oportunidade iha tinan oin atu ita boot sira bele kompete.
Iha fatin hanesan Presidente Asosiasaun Broker Sr. Hilário C. Barros, sente kontenti no orguilu ho formasaun ne’ebé mak Ministerio Finansas liu husi Diresaun Jeral Alfândegas fó, tamba ne’e ajuda teb-tebes hodi hasae kapasidade broker nian. Nia mós realsa liutan katak agora ami sente nakloke ona, ho kuinesimentu no sertifikadu ne’ebé mak ami simu husi Ministeriu Finansas liu husi Diresaun Alfândegas ami mós bele aprezenta ami nia kompanhia ba iha rai liur.
Nia mós apela ba maluk Broker sira hotu atu servisu ho onestu no responsabilidade, no tenki tuir lei no prosedimentu ne’ebé mak governu fo no husu ba Governo (Ministériu Finansas liu-liu Diresaun Jeral Alfâdengas) atu labele para halo akompainamentu nafatin Broker sira núdar parseiru atu nune’e bele sai diak liutan iha futuru.
Nune’e mos Vice Ministru Finansas Sr. Helder Lopes, iha diskursu molok fahe sertifikadu hateten katak Alfândegas nudar autoridade estadu ho kna’ar servisu fundamental ne’ebé mak defini iha lei mak; Primeiru fasilita komersiu, no Segundu mak halo kontrolu ba sasan sira ne’ebé mak tama sai iha fronteira. E Atu halo kna’ar rua ne’e, Alfândegas presiza servisu hamutuk ho entidades hotu, liu-liu broker ne’ebé sai parseiru importante hodi halao servisu ho importador no exportador sira. Nia hatutan tan katak agora dadaun konseilu Ministrus aprova ona Costum Code ou hanaran Kódigu Aduaneiru iha ne’ebá define lolos kna’ar direitu no dever saida deit mak Alfândegas tenkiser halo no broker sira tenkiser hatene mos Alfândegas sira nia kna’ar nomós husu ba Broker sira atu labele para update nafatin imi an ho informasaun no politika Governu nian ne’ebé mak sei halo mudansa tuir mai hanesan, lei organika Alfândegas ho Impostus presiza hadia hodi koresponde ba objetivu Reforma Fiscal nian, nomós sei adopta ho deklarasaun Arusa ou Arusa Declaration ne’ebé haktuir katak tenki iha boa governasaun no integridade iha servisu Alfândegas signifika katak, governu la tolera korupsaun mósu iha Alfândegas, ne’e Governu kopremetudu tebes atu kombate korupsaun iha Alfândegas.
No ida tan mak prosesu atu tama ba organizasaun komersiu mundial ka hanaran WTO, objetivu fundamental mak oinsa promove investimentu iha rai laran hodi nune’e bele promove exportasaun. Wainhira iha ona produsaun iha rai laran ita mós promove exportasaun, signifika knar Broker ne’e laos fokus deit ba importasaun maibé mós iha exportasaun.
Tuir fali Governu sei implementa Single Window ou Hanaran Janela Uniku, wainhira tama ba ASEAN katak ita partisipa iha Single Window ASEAN nian. Liu husi Reforma Fiskal hanoin hela atu implementa single window ka janela unika ba iha CPLP nian. Ida ne’e atu dehan, wainhira ba ho politika ida ne’e no implementa duni, Broker sira tenki komprieende prosedimentu legais no regulamentu sira intermus de implementasaun janela unika iha nivel rejiaun nomós iha nivel koperasaun CPLP ne’e importante, intesaun ida deit atu fasilita komersiu, tamba ne’e nudar Broker ou intermediariu entre Governu ho importador exportador broker tenki hatene politika Diresaun sira ne’ebé mak estadu halo ou agora dadaun halo hela hodi nune’e wainhira buat sasan sira iha ona fatin borker sira bele ejekuta ou bele implementa ho lolos tuir dalan ne’ebé ke iha. Nia mos hatutan tan katak Broker nia papel importante teb-tebes, ho reforma ne’ebé ke governo halo. Hahu ohin ba oin Broker sira tenki iha mos sertifikadu, mak servisu ho Alfândegas sira ne’ebé la iha sertifikadu la bele servisu tamba ida ne’e defini iha lei. Sira ne’ebé mak iha sertifikadu ne’e ita hatene tuir ona formasaun hatene prosedimentus no nia kna’ar ho lolos.
Nia mós husu ba Presidente Assosiasaun Broker katak hahu ohin ba oin Broker sira tenki uza ona uniforme ho Kartaun Identidade (ID) karik laiha kartaun Identidade ho Uniforme, Diresaun Jeral Alfândegas sei foti sansaun no kansela temporáriu nia lisensa hodi bele preenxe rekesitus hirak ne’e tamba ho Uniforme hatudu identidade instituisaun ida-idak nian atu nune’e públiku bele identifika nomós hodi evita desintendimentu antre Broker ho funsionárius Alfândegas, iha prosesu atendementu.