• Ministériu Finansas Finaliza Treinamentu Iha Rejiaun Leste Ho Susesu

Home » Anúnsiu » Ministériu Finansas Finaliza Treinamentu Iha Rejiaun Leste Ho Susesu Imprime pájina

Ministériu Finansas Finaliza Treinamentu Iha Rejiaun Leste Ho Susesu

20190617_Ministériu Finansas Finaliza Treinamentu Iha Rejiaun Leste Ho Susesu 1

Ministériu Finansas (MF) liuhosi Diresaun Jerál Tezouru (DJT) ho Sentru Kapasitasaun Jestaun Finansas Públika (SKJFP) iha loron 14 Juñu 2019, finaliza ona treinamentu iha Área Kontabilidade no Relatóriu Finanseiru Setor Públiku ba ofisial finansas hosi Munisípiu Baucau, Lautem, Viqueque no Manatuto.
Sesaun treinamentu ne’ebe halo durante loron lima hahu’u 10 – 14 Juñu 2019 nu’udar programa kuntinuasaun hosi tipu atividade hanesan ne’ebe antes ne’e halao tiha ona ba parte rai klaran no Oeste.

“Hau senti kontenti ba treinamentu ida ne’e, tanba ami ofisial finansas Baucau durante ne’e seidauk hetan treinamentu ida spesifiku iha área Kontabilidade no Finanseiru. Treinamentu durante semana ida, bele responde ona ami nian difikuldade ne’ebé maka ami infrenta maske la barak maibé bele responde ona” hateten Ana da Gloria Freitas,ofisial finansas Munisípiu Baucau

Ho fundus hosi Uniaun Europeia, Ministériu Finansas liuhosi Sentru Kapasitasaun Jestaun Finansas Públika (SKJFP) no Diresaun Jerál Tezouru servisu hamutuk ho Ministériu Administrasaun Estatal (MAE) remata ona treinamentu faze dahuluk ba munisípiu hotu.

Diretor Finansas Munisípiu Lautem Hilariu Rui Manuel orgullu ho treinamentu ida ne’e tanba bele responde difikuldade sira ne’ebé durante sira infrenta iha terenu no husu atu disponibilidade hodi aumenta loron treinamentu.

“ Treinamentu loron 5 ne’e seidauk sufisiente no ami husu nafatin asistensia no suporta sebele treinamentu hanesan ida ne’e bele realiza dala ida tan. atu nune’e ami bele iha koñesimentu diak liu iha área kontabilidade no finanseiru nian”. Dehan Hilariu Rui Manuel

Treinamentu ida ne’e sei valoriza partisipante sira ho sertifikadu nivel nasionál iha jestaun finansas públika. Treinamentu ne’e hetan partisipasaun hosi ofisial finansas sira hanesan Munisípiu Baucau, Viqueque, Lautem no Manatutu ho total partisipantes ema nain 16 ho metodu treinamentu uza slide show, kria livru manual no video tutorial.

“Treinamentu ida ne’e la’os hotu deit iha ne’e, faze tuir mai sei iha liu-liu liga ho área jestaun finanseiru nian. Ami hosi ekipa SKJFP sei halo monitorizaun nafatin ba ita bo’ot sira nia servisu hodi hatene progresu to ona iha ne’ebé depois hetan tiha treinamentu. Espera simu tiha trenamentu ne’e ita bo’ot sira nia viazen ba Dili ne’e menus ona no nomós ita bo’ot sira nia dezempeñu servisu bele halo relatóriu kada kuarter bazeia ba regras sira ne’ebé hetan hosi treinamentu” salienta reprezentante Sentru Kapasitasaun Jestaun Finansas Públika (SKJFP) Ministériu Finansas Valdomar Lopes iha ninia mensajen enseramentu hosi treinamentu ne’e.