• Ministériu Finánsas Hala’o Serimónia Termu Entrega Kargu Sefia Foun ba Diretór Jerál no Diretór Nasionál Sira

Home » Anúnsiu » Ministériu Finánsas Hala’o Serimónia Termu Entrega Kargu Sefia Foun ba Diretór Jerál no Diretór Nasionál Sira Imprime pájina

Ministériu Finánsas Hala’o Serimónia Termu Entrega Kargu Sefia Foun ba Diretór Jerál no Diretór Nasionál Sira

Ministériu Finánsas (MF) hala’o serimónia termu entrega servisu ba Diretór Jerál (DJ) no Diretór Nasionál (DN) sira husi kargu sefia sesante ba kargu sefia foun. Hodi bele kontinua ejerse funsaun sira iha Ministériu Finansas ne’ebé maka sai hanesan jornada foun iha kareira ida-idak nian. Serimónia ne’e hala’o iha Auditorium Ministériu Finánsas, iha loron 20 fulan-Janeiru tinan-2021.

Iha Diskursu S.E Vise-Ministra Finánsas Sara Lobo Brites informa, iha oportunidade ida ne’e hakarak kongratula dala ida tan ba DJ no DN sira ne’ebé hetan fiar hodi kontinua exerse funsaun iha kargu foun. Agradese mós ba hotu-hotu ninia dezempeñu durante tinan barak nia laran partikularmente iha tempu sira ne’ebé defisil mai MF iha 2018 to’o 2020.

“Iha periudu krusiál ita hotu fó liman ba malu hodi asegura idak-idak nia parte hodi kontribui ba desempeñu MF ne’ebé extraordináriu no hetan rekoñesimentu husi Publiku”, dehan Vise-Ministra Finánsas.

Vise-Ministra mós reforsa tan katak “Há’u hakarak enkoraja atu iha ambiente no equipa ne’ebé foun, ka’er ba prinsipiu no valores sira ne’ebé idak-idak iha durante exerze imi nia funsaun hanesan líder no jestór iha tinan barak nia laran. Mai ita hotu hateke ba oin, ita hotu presija tau hamutuk Visaun, ideias, enerjia, dedikasaun no paixaun tomak ba MF hodi hakat ba oin ho firme ho nune’e bele alkansa misaun komun ne’ebé ita hotu iha”.

“Promove nafatin ita nia prestaun servisu ba Estadu bele kontribui ba dezenvolvimentu ida sustentavel iha futuru”, reforsa S.E Vise-Ministra Finansas.

Iha sorin seluk enposadu Diretór Jerál Jestaun Patrimoniu Estadu (DJJPE) Januário da Gama hatutan, primeiru lugar há’u agradese no apresia ba S.E Ministru Finánsas Rui A. Gomes no S.E Vise-Ministra Finánsas, Sara Lobo Brites ne’ebé kontinua deposita konfiansa mai há’u atu asumi responsabilidade hanesan DJJPE.

“Ida ne’e hanesan bo’as praktika ida ba futuru ita kontinua implementa, la iha fatin ida maka iha DJ ida servisu to tinan 4 ka 5. Liu-liu ba fatin sira ne’ebé mais estratejiku no diak liu ita halo rotasaun”, reforsa DJJPE Januário da Gama.

Nomeasaun ba funsionáriu sira ne’e bazeia ba despaisu nº. 3971/2021.PCFP husi S.E Prezidenti Komisaun Funsaun Públika atu troka no exerse kargu servisu iha Ministériu Finánsas komesa husi loron 15 fulan-Janeiru tinan 2021 to 30 fulan-Junhu tinan 2021 tuir data lemitadu to praju atu konklui prosesu selesaun tuir meritu.

Naran sira hanesan: (Diretór-Jerál Jetaun Património Estadu, Januário da Gama), (Diretór-Jerál Planiamentu no Orsamentu, José Alexandre de Carvalho), (Diretór-Jerál Tejouru, Regina de Jesus de Sousa), (Inspeksaun Jerál, Ernesto da Conceição Silva), (Diretóra Nasionál Pagamentu Administrasaun i Dotasaun Todo Guvernu, Nenik Maria Imaculada Ximenes), (Diretór Nasionál Monitorijasaun Desentralizasaun Finanseiru, Ciríaco Jesus Piedade do Rego), Diretór Nasionál Unidade Jestaun Partisipasaun Publiku, Olavo Jorge Carvalho Guterres), Diretór Nasionál Rekursu Umanu, Cesário Martins).