• Ministériu Finansas halo leilaun viaturas estadu hodi salva despezas

Home » Announcements » Ministériu Finansas halo leilaun viaturas estadu hodi salva despezas Print Page

Ministériu Finansas halo leilaun viaturas estadu hodi salva despezas

IMG_3405

Vice Ministru Finansas, Helder Lopes hatete, Ministériu Finansas hala’o leilaun ba bens moveis Estadu nian tanba atu salva despezas la nesesariu ba manutensaun. Lia hirak ne’e hato’o husi Vice Ministru Finansas iha seremonia abertura ba leilaun bens moveis nian iha Oficina Balide, Diresaun Nasional Monitorizasaun de Jestaun Patrimóniu Estadu, Dili, Kinta-Feira, 03 de Agostu 2017.

Nia hatutan liu tan katak, iha objetivu rua hodi halo leilaun ba kareta no motorizadas refere mak hanesan oinsa salva despezas ba manutensaun no operasaun no oinsa hetan reseitas oituan hodi sosa fali beins e movies seluk ba instituisaun sira ne’ebé persija liu.

“Total formulariu ne’ebé espalha hamutuk 1975, barak liu sasan bens estadu maibe rekerente iha uma laran la to’o 200 entaun ha’u hare kompetisaun ladun maka’ás. Ita halo leilaun importante mak tenki halo transparante para rekerente sira labele kestiona sobre ninia valor,” dehan Vice Ministru ne’e.

Iha fatin hanesan Diretur Geral Finansa Estadu, Januario da Gama reforsa, apresia no fo agradese ba servisu tékniku husi Diresaun Patrimónia Estadu no ekipa tomak inklui diretores gerais no nasionais, ministeriu no institusiasun hamutuk 11 ne’ebe sai hanesan alvu ba implementasaun konkursu interna nian no konkursu públiku.

“Ba sira ne’ebe mak sai observador no komisaun leilaun ne’ebe durante ne’e involve-an maka’as iha prosesu leilaun ida ne’ebe tuir duni kriteria transparensia, kredibilidade no servisu professional signifika katak husi prosesu ida ne’e tenki iha fiar husi públiku no fiar husi rekerenti sira” haktuir Diretor Geral ne’e.

Iha fatin hanesan mós esplika husi Diretor Nasional Patrimóniu Estadu, Martinho Lopes afirma, kareta hirak ne’ebe mak leilaun ba públiku total hamutuk 58 no motorizadas atus ida liu, leilaun interna total kareta hamutuk 174 no motor atus tolu liu. Iha leilaun modalidade hamutuk 2 deit mak hanesan modalidade konkursu públiku no modalidade konkursu interna. Modalidade públiku konkursu ne’ebe foka liu ba hotu-hotu tantu funsiunariu públiku, komunidade no sosiedade civil maibe modalidade konkursu interna foka liu ba funsiunariu públiku sira deit ne’ebe tutela iha ministeriu idak-idak.