• Ministériu Finansas halo ona Pagamentu Cesta Básica ba kompaña lokál 102 ho montante totál $26.354.515

Home » Anúncios » Comunicados » Ministériu Finansas halo ona Pagamentu Cesta Básica ba kompaña lokál 102 ho montante totál $26.354.515 Imprimir a página

Ministériu Finansas halo ona Pagamentu Cesta Básica ba kompaña lokál 102 ho montante totál $26.354.515

Ministériu Finansas (MF) liuhusi Sekretariadu Tékniku Fundu COVID-19, hahú husi 18 marsu 2021 to’o iha 4 maiu 2021, halo ona pagamentu Cesta Básica ba kompaña lokál hamutuk 102 ho montante totál $26.354.515.

Husi pagamentu 102 ne’e, pedidu pagamentu husi MTCI hamutuk 50 ho totál $10.635.966. SeKoop hamutuk 24 ho totál $12.498.312. CLN hamutuk 21 ho totál $2.027.558, no pedidu pagamentu 7 mai husi Ministériu Agrikultura no Peskas (MAP) ho montante totál $1.192.678.

Sekretariadu Tékniku Fundu COVID-19, kontinua serbisu hamutuk ho Ministériu Implementadór atu konklui pagamentu ba kompaña sira ne’ebé mak fornese ona ai-han ba programa Cesta Básica. Ho promulgasaun Lei OJE Retifikativu husi Prezidente Repúblika, Sua Eselénsia Dr. Francisco Guterres Lú Olo lori mudansa iha dotasaun orsamentál lubun ida inklui dotasaun Fundu Covid-19.

Iha dotasaun Fundu Covid-19, ne’ebé ho montante inisiál $31.000.000 hetan ona reforsu $256.641.793 nune’e ninia totál hamutuk $287.641.793. Aumentu iha dotasaun Fundu Covid-19 fó biban ba Governu hodi aloka millaun $34,5 hodi sosa vasina ba Covid-19 atu nune’e bele kobre populasaun tomak, sosa materiál no ekipamentu ba protesaun individuál no materiál hodi halo teste no tratamentu ba pasiente Covid-19 iha internamentu, konstrusaun no aluga fatin izolamentu no kuarentena, no hadi’ak fasilidade sira iha fatin izolamentu iha teritóriu laran tomak.

Aleinde ne’e, ho alterasaun iha dotasaun Fundu Covid-19 fó biban ba Governu hodi finansia medida sira sosio-ekonómiku hanesan apoiu ba empregu (millaun $45,3), moratoria de crédito (millaun $2), izensaun pagamentu propinas ba estudante ensinu superiór (millaun $14) no subsídiu internet ba estudante ensinu superior (millaun $2,2), sosa produtu alimentár husi produtór lokál (millaun $12), subsidiu ba eletrisidade, finansia operasaun Sentru Integradu Jestaun Krize (millaun $16,7), finansia suplementu remuneratóriu ba traballadór sira iha liña-frente (millaun $51,9), no konklui ho pagamentu ba programa Cesta Básica (millaun $31).

Ministériu Finansas hakarak atu akresenta katak bainhira dokumentus pedidu pagamentu kompletu, loos no prienxe ona rekezitus pagamentu tuir Lei haruka, Sekretariadu Tékniku Fundu COVID-19 sei prosesa no sei realiza pagamentu tuir regras ne’ebé vigora.

Maibé, molok Sekretariadu Tékniku Fundu COVID-19 realiza pagamentu, kompaña sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia totál rendimentu konforme Lei Tributária haruka. Kompaña sira tenke aprezenta sira nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.

Karik kompaña fornesedór-sira iha pergunta ruma ka presiza informasaun liután kona-ba asuntu impostu, bele kontaktu Autoridade Tributária (AT) ka vizita portál AT www.attl.gov.tl relasiona ho pagamentu impostu, submisaun relatóriu mensál/anuál no pedidu emisaun ba Certidão de Dividas. Pagamentu impostu mós bele halo liuhusi mákina ATM P24 no kontribuinte sira la-presiza ba forma tan iha banku komersiál sira hanesan uluk. -RAMATA-