• Ministériu Finansas halo Planu Orsamentu Ratifikativu

Home » Announcements » Ministériu Finansas halo Planu Orsamentu Ratifikativu Print Page

Ministériu Finansas halo Planu Orsamentu Ratifikativu

MF Halo Planu Orsamentu Ratifikativu - Final

Dili – Vice Ministru Helder Lopes hatete, Ministériu Finansas hanesan Ministériu Tékniku ne’be agora daudaun prepara ona planu orasamentu ratifikativu ne’ebé maka sei ajusta ba governasaun foun, informa Vice Ministru iha nia servisu fatin Torre Minsitériu Finansas, Aitarak Laran, Tersa-Feira, 1 de Agostu de 2017.

Governu foun ne’ebé sei mai, tuir kalendariu e ita nia tékniku sira prepara ona atu servisu hamutuk ho governu foun ba orsamentu ratifikativu ka orsamentu ne’ebé ita ajusta ba governu foun ne’e sei hala’o iha fulan Agostu e Setembru.

Helder Lopes hatutan, sobre Orsamentu Jeral Estadu (OJE) 2018, tékniku sira mós perepara ona ninia planu asaun katak bainhira governu foun mai hetan orientasaun polítika husi governu foun sei hahu prepara orsamentu ida ne’e tuir prosedimentu ka regras ne’ebé iha. Sekarik buat hotu-hotu la’o lo’os tuir orientasaun polítika, entaun OJE 2018 nian mós sei hala’o diskusaun iha parlamentu, por volta de Novembru e ínisiu de Dezembru tinan ida ne’e.

“Kalkulasaun orsamentu sira téknikamente iha ona maibé, tanba orsamentu ne’e polítika ne’ebé governu foun mai fó orientasaun polítika maka sira bele ezekuta tuir orientasaun ne’ebé ke iha. Maibé tuir kalkulasaun tékniku hodi konsidera aspetu lubuk ida liu-liu aspetu sustentabilidade fiskal ne’e parte tékniku Ministériu Finansas nian maibé presija hein orientasaun polítika maka bele implementa”.

Tanba ne’e maka hau hakarak hateten katak Ministériu Finansas nu’udar Ministériu Tékniku no sira prepara ona kalendariu ba orsamentu ratifikativu no Orsamentu Geral Estadu (OJE) 2018 nian. Hein de’it governu foun mai para fó orientasaun polítika hodi nune’e sira bele ezekuta planu ne’ebe iha.