• Ministériu Finansas ho Komisaun C – Parlamentu Nasional Konklui Ona

Home » Announcements » Ministériu Finansas ho Komisaun C – Parlamentu Nasional Konklui Ona Print Page

Ministériu Finansas ho Komisaun C – Parlamentu Nasional Konklui Ona

Ministériu Finansas representa husi Vise-Ministra Finansas, Sara Lobo Brites hamutuk ho Komisaun C ne’ebé trata asuntu Finansas Públikas no asuntu Ekonomia no Dezenvolvimentu, Parlamentu Nasionál (PN), konklui ona redasaun final Lei Enkuadramentu Orsamentu (LEO). Lei Enkuadramentu Orsamentu Jerál Estadu, hetan aprovasaun final global iha Parlamentu Nasional, loron 10 fulan-janeiru tinan 2022.

LEO hanesan rezultadu ida husi prosesu naruk iha ambitu Reforma Jestaun Finansas Publíka ne’ebé mak inisia ona desde tinan 2015 husi Governu Konstitusionál Da-6 no Governu anteriór sira halo ona melloramentu lubun ida liuhusi diskusaun iha tinan barak nia laran.

Liuhusi LEO ne’e, Governu propoin atu halo mós alterasaun substansiál iha aspeitu balun ne’ebé esensiál tebes ba enkuadramentu orsamentál no jestaun finansas públikas ho objetivu ida mak atu hametin liután relasaun entre planeamentu no orsamentu liuhosi orsamentasaun pur programas ne’ebé foku ba rezultadus.

Durante prosesu preparasaun, elaborasaun no diskusaun LEO, Governu Timor-Leste no Parlamentu Nasionál mós halo ona konsultasaun lubun ida ho setór ekonómiku no setór sosiál sira mak hanesan Banku Sentrál Timor-Leste, RAEOA, Seguransa Sosiál, Câmara de Contas, Konsellu Konsultivu Fundu Petrolíferu, FONGTIL, La’o Hamutuk no Fundu Monetáriu Internasionál. PPL-LEO ne’e rasik inklui ona rekomendasaun balun ne’ebé mak hato’o ona husi setór ekonómiku no setór sosiál no adere ba boas prátikas internasionáis ne’ebé mak hetan mos revisaun hosi tekniku sira hosi FMI no rekomendasaun sira hosi Relatóriu PEFA ou Public Expenditure and Financial Accountability 2018.

Governu Konstitusionál Daualuk komprometidu atu kontinua prepara diplomas relevantes  hodi bele implementa Reforma esensial sira. ne’e, ne’ebé mak tuir loloos akontese ona iha tinan hirak liubá. Liuhusi LEO sei permite melhoramento iha planeamentu, orsamentasaun, ezekusaun no prestasaun kontas ho efisiensia, promove Transparensia no promove boa governasaun.

Ho nune ohin  LEO hetan votasaun ba redasaun final afavor 9, abstensaun 0 no kontra 0, iha loron 12 fulan-janeiru tinan 2022 iha komisaun C no sei haruka ba Prezidente Parlamentu Nasional, Aniceto Longuinhos Guterres Lopes no sei promulga husi Prezidente Repúblika Francisco Guterres “Lu-Olo”

Sesaun redasaun final  LEO prezide husi Prezidente Komisaun C, Deputada Maria Angelica Rangel hamutuk ho Vice Ministra Finanças Sra. Sara Lobo Brites no Deputado husi komisaun C. REMATA