- Ministériu Finansas inisia diskusaun kona-ba preparasaun Orsamentu 2020 ho Primeiru Ministru.
Home » Anúnsiu » Ministériu Finansas inisia diskusaun kona-ba preparasaun Orsamentu 2020 ho Primeiru Ministru. Imprime pájina
Ministériu Finansas inisia diskusaun kona-ba preparasaun Orsamentu 2020 ho Primeiru Ministru.
Ministra Finansas en Ezersisiu no atual Vise Ministra Finansas Sara Lobo Brites iha loron 14 Marsu 2019, hamutuk ho ekipa tékniku hosi Ministériu Finansas hala’o enkontru informal ho Primeiru Ministru Taur Matan Ruak iha Palasiu Governu kona-ba polítika Ministériu Finansas ba preparasaun orsamentu 2020.
Antes ne’e Primeiru Ministru Taur Matan Ruak halo mos enkontru refere hodi rona direta preparasaun programas servisu hosi linha ministerias hotu ne’ebé atu ezekuta iha âmbitu VIII Governu Konstitusional ba tinan 2020.
“Depois orsamentu 2019 tama envigor no Ministériu Finansas nia parte planu ona atu hahu’u inisia preparasaun orsamentu 2020 iha Fulan Maiu nia laran no presiza preparativus, tanba ne’e aproveita tempu ohin hodi informa ba Primeiru Ministru”. Lia hirak ne’e hato’o hosi Ministra Finansas en Ezersisiu no atual Vise Ministra Finansas Sara Lobo Brites.
Ba tinan 2019, VIII Governu Konstitusional haktuir hosi Livru I, “Panorama Orsamental” iha prioridades prinsipais hosi Governu maka hanesan: Hasa’e produtividade iha setór agrikultura hodi hametin seguransa ai-han no reduz insidensia malnutrisaun; Hadia kualidade edukasaun (inklusivu, tuir padraun no orientadu ba merkadu); Hadia no hametin asesu ba servisu saúde, kontinua ho programa “Saúde na Familia”; Infrastruturas bázikas ba bé mós no saneamentu no estradas, inklui estradas rurais ; Hametin setór turismu, fokus liu ba dezenvolvimentu turizmu komunitáriu no ikus liu mak kontinua implementasaun programa desentralizasun administrativa.
Ministériu Finansas hanesan ministériu ne’ebé presta nia servisu ba ministériu sira seluk iha mós prioridade liu-liu iha área Jestaun Finansas Públikas inklui Autoridade Tributaria no Aduaneria.
“Presiza halo melloramentu hodi rekolla liutan reseitas no rasionaliza despezas liu-liu despezas rekorentes sira. Alende ida ne’e Ministériu Finansas hare’e katak presiza revizaun ba lei ne’ebé diak liutan, hanesan Lei Tributaria, Lei Orsamentu Jestaun Finanseira no sira seluk” hateten Ministra Finansas en Ezersisiu no atual Vise Ministra Finansas Sara Lobo Brites depois remata enkontru ho Primeiru Ministru.