• Ministeriu Finansas Konsellu Konsultativu nia soromutu ba dalahuluk ho Ekipa lideransa no jestaun foun

Home » Anúnsiu » Ministeriu Finansas Konsellu Konsultativu nia soromutu ba dalahuluk ho Ekipa lideransa no jestaun foun Imprime pájina

Ministeriu Finansas Konsellu Konsultativu nia soromutu ba dalahuluk ho Ekipa lideransa no jestaun foun

Konsellu Konsultativu Ministeriu Finansas (KKMF) hasoru malu hamutuk iha loron 18 to’o 19 Jullu 2016 hodi konfirma protokolo ba operasaun enkontru KKMF no finaliza proposta orsamentu ministeriu finnsas nian ba tinan 2017.
Enkontru KKMF ida ne’e hanesan enkontru ba dalahuluk ekipa lideransa no jestaun foun ne’ebe hetan tomada de pose iha loton 1 Jullu 2016 liu ba.
Enkontru loron rua ne’e ho ekipa lideransa no jestaun foun hodi enkoraja sira konese malu, dezenvolve espiritu ekipa no kompreende kona ba regras servisu nian iha Ministeriu Finansas nia laran. Jestor hirak ne’e hili liu husi prosesu rigorosu ida ne’ebe bazeia ba meritu. Kandidatus ba kargu xefia hotu liu husi testes konesimentu lubuk ida, ne’ebe inklui mos ministeriu nia standard kompetensia ba Lideransa no Jestaun; hakerek aplikasaun ne’ebe tenki responde ba kriteriu selesaun estabelesidu ba kada Deskrisaun Servisu, no partisipa iha entrevista pesoal ne’ebe analiza sira nia kompreensaun kona ba agenda reforma jestaun dezempenu no valoriza buat hirak ne’ebe sira alkansa ona no kbit ne’ebe iha.
S.E. Ministra no Vise Ministru kongratula no fo bemvindu ba Ekipa Lideransa no Jestaun founne’ebe mai tama iha Familia Boot Finansas nian, no fo hanoin fali ba sira katak nudar lider, sei reker sira mak estabelese standard/padraun aas no sae hanesan ezemplu model ba staff sira.
Ministra no Vise explika papel Ministeriu nian hanesan ajensia sentral ne’ebe responsavel ba jestaun finansas publika. Responsabilidade importante ida ne’e obriga lori no suporta lina ministeriu sira no lidera iha areas hanesan responsibilidade finanseira no transparensia.
S.E. Ministra fahe mensagen lubuk ida ho ekipa lideransa no jestaun foun no enkoraja diskusaun no husu perguntas. Mensagem hirak ne’e inklui mos:
• Sistema foun jestaun dokumentus hatudu boa governasaun no responsibilidade. Jestaun dokumentus ne’ebe diak sei aumenta transparensia ba prosesu foti desizaun no asaun.
• Patrimoniu estadu nudar patrimoniu estadu duni, laos patrimoniu pesoal ka individual. Tenki rejista, halu manutensaun regular no uza ho responsibilidade.
• Apresia diskusaun no debate iha kontextu reforma. Tenki enkorage ideias diak. Tenki simu feedback pozitivu no mos negativu tamba ida ne’e maka sei apoia ita hodi hadia ita nia instituisaun nia dezempenu.
• Integra planu ho orsamentu sei aumenta efetividade alokasaun rekursus no fasilita prosesu “produz barak ho uituan”.
• Foti desizaun, jere risku no rezolve problemas hanesan responsibilidade kada jestor nian.
• Planu forsa de traballu, analiza tarefa no deskrisaun servisu ne’ebe loos sae hanesan mata dalan ba Ministeriu atu implementa politika ‘hili ema loos ba fatin loos iha tempu loos’
Agenda boot segundu iha enkontru KKMF hanesan MF mini Komisaun Revizaun Orsamentu (mini-KRO) atu diskute prioridades orsamentu MF nia ba tinan 2017. Ekipa lideransa no jestaun foun sei finaliza Planu Asaun Anual ba 2017 hasai husi MF Planu Tinan Lima nian. Jestor ida-idak aprezenta no defende planu atividade ba tinan 2017 ne’ebe hasai husi Planu Tinan Lima nian. Tamba buat hotuhotu ne’ebe iha planu sei la konsegue hetan finansiamentu husi orsamentu 2017, presiza negosiasaun ba prioridade MF nian. Bainhira halao ezersisiu ida ne’e hamutuk, nia rezultadu make jestores hotu informadu no kompreende objetivu final.
Liu husi loron rua ne’e, Ministra no Vise Ministru fo hanoin hikas fali ba Jestor sira katak objetivu agenda reforma atu alkansa rezultadu ne’ebe diak ba nasaun tomak, laos deit ba Ministeriu Finansas.
‘Ministeiru Finansas atu servi ministeriu sira seluk, no ita aumenta ita nia fokus ba servisu ba kliente (customer service) no padraun servisu (service standards), konvida feedback hodi nune’e ita bele hadiaan’, Ministra hatete. ‘Bainhira ita simu keixa ka feedback, ita haruka mensagem katak ita hakarak hadia ita nia sistema no ita nia servisu hodi alkansa rezultadu ne’ebe diak liu tan’

‘Ita tenki servisu tuir Kodigu Etika Funsaun Publika nian no mos Kodigo Hahalok Jestaun Finansas Publikas nian. Ne’e mak ita nia kompromisu no obrigasaun ba Povu Timor-Leste tomak. Planeamentu, komunikasaun, etika, transparensia no responsibilidade hanesan fundasi ba ita nia reforma’ Ministra hatete. ‘La iha ema ida ne’ebe bele halo servisu ne’e mesak. Ita hotu sei presiza malu. Tamba ne’e mak ita sei labele kompromete ita nia prinsipius kona ba servisu ekipa, komunikasaun, responsibilidade no kualidade’.