• Ministériu Finansas kuntinua Lansa Sistema Sigtas No Asycuda World

Home » Anúnsiu » Ministériu Finansas kuntinua Lansa Sistema Sigtas No Asycuda World Imprime pájina

Ministériu Finansas kuntinua Lansa Sistema Sigtas No Asycuda World

Ministériu Finansas liuhosi Autoridade Tributária no Aduaneira halo lansamentu ba sistema Sigtas (Standard Integrated Government Tax Administration) no Asycuda World iha Munisípiu Bobonaro ho objetivu atu fasilita atendimentu publiku ba nivel Munisípiu hodi bele promove sustentabilidade fiscal. Lansamentu refere realiza iha Munisípiu Bobonaro, 24 maiu 2019.

VIII Governu Konstitusionál liuhosi Ministériu Finansas rekoñese katak, kobransa reseitas ho efisiente no efikaz nu’udar fator xave hodi dezenvolve no hametin sistema finanseiru hodi fortalese aplikasaun politika boa governasaun.

“Agora dau-dauk ita iha faze ba prosesu modernizasaun ba sistema impostu sigtas ba versaun três. Purexemplu pagamentu mensal ne’ebé ita halo iha Banku Bobonaro sei iha interligasaun direita ho sigtas versaun tres”, informa Diretór Jerál Autoridade Auduaneira Monica Rangel iha lansamentu aplikasaun sistema SIGTAS ne’e.

Implementasaun SIGTAS nu’udar aparellu hodi apoia sistema operasional ho efetivu ho forma efikaz. Komponente ne’e sei apoia hasa’e kualidade dadus rejistu nian hodi bele iha dadus kunfiável hosi kontribuintes sira hanesan kálkulu automátiku impostus no multa. Identifikasaun ba errus ou omissoens ruma liuhosi prosesamentu deklarasaoen impostu no fornese avisus avaliasaun, kona-bá pagamentu liuhosi korrespondênsias kontribuinte ne’ebe automatika.

Iha parte seluk wainhira halo mos lansamentu ba aplikasaun sistema Asycuda World ne’ebé maka bazeia ba aplikasaun web-base, fasil atu asesu iha fatin ne’ebé deit importante iha Internet ho sistema sira seluk ne’ebé maka iha.

ASYCUDA nu’udar sistema informatizadu kona-bá jestaun aduaneira ne’ebé kobre prosedimentus komérsiu hosi rai liur nian. Sistema ne’e manifestu deklarasoens aduaneiras ho nia prosedimentus trânzitu no maneira kona-bá suspende nian. Programa ne’e rasik ASYCUDA desenvolve iha Genebra hosi UNCTAD.

“Iha Sestu Governu Konstituisional aprova ona Asycuda World hanesan plataforma elektrónika Timor-Leste nian hodi implementa janela unika (single window). Hodi fasilita atividades komersiu liu-liu ba importadores no exportadores nune’e bele halo kontrolu ba merkadorias sira efetivu liun lori fasilita komersiu internasional”. Konfesa Diretor Jerál Autoridade Aduaneira José António Fátima Abilio.


Timor Leste ofisialmente aplika sistema ne’e liuhosi aprovasaun Rezolusaun Governu iha âmbitu VI Governu Konstitusional iha loron 25 Abril 2017 liuhosi Reuniaun Konsellu Ministru ne’ebe hato’o hosi Eis Vice Ministru VI Governu Konstitusionál, Helder Lopes

“Ho instala sistema rua ne’e fiar metin katak sei fasilita kontribuentes sira iha reziaun Bobonaru hodi hetan atendimentu hosi servisu Impostu no Alfandega ho efisensia ho lalais nomós redus kustu balun hosi kontribuentes sira”, informa Ministra Finansas En Ezersisiu no atual Vise Ministra Finansas Sara Lobo Brites.

Iha sorin seluk, Prezidente Autoridade Munisípiu Bobonaro Zeferino Soares do Santos agradese ba polítika Governu hodi hamosu sistema ne’e hodi ajuda estadu liuliu emprezarius local nu’udar parseiru governu nian.

“Agradese ba politika governu hodi kria sistema ne’ebé diak hodi fó atendimentu ne’ebé diak ba ita nia emprezareiu no povu sira atu nune’e bele la’o tuir politika ne’ebé ita trasa ona”, hateten Prezidente Autoridade Munisípiu Bobonaro Zeferino Soares do Santos.

Aplikasaun kona-bá utilizasaun sistema SIGTAS antes ne’e lansa tiha ona iha Munisípiu Baucau iha loron 5 Fevereiru 2019 ne’ebé kobre Munisípiu Lautem, Viqueque no Manatuto.

Autoridade Aduaneira Timor Leste ezisti iha 28 Janeiru 2010 ho naran Diresaun Alfándegas no legalmente tama iha vigor no hahú halo nia funsaun iha 1 Outubru 2017 respetivamente hodi troka naran Diresaun Alfándegas ho naran Autoridade Aduaneira, haktuir hosi Dekretu Lei no 9/2017, 29 Marsu kona-ba Estatutu Organíku Autoridade Aduaneira.