- Ministériu Finansas Kuntinua Realiza Sesaun Treinamentu ba Munisípiu
Home » Anúnsiu » Ministériu Finansas Kuntinua Realiza Sesaun Treinamentu ba Munisípiu Imprime pájina
Ministériu Finansas Kuntinua Realiza Sesaun Treinamentu ba Munisípiu
Ministériu Finansas liuhosi Diresaun Jerál Tezouru (DJT) iha loron 21 Maiu 2019 Kuntinua realiza treinamentu faze daruak kona-bá Kontibilidades no Relatóriu Finanseiru Setor Públiku ba nível Munisípiu parte Oeste depois remata faze dahuluk iha parte rai klaran nian. Treinamentu ne’ebe realiza iha Salaun Treinamentu Munisípiu Liquica hetan prezensa hosi ofisiais finanças munisípiu Liquica, Ermera, Bobonaro no Dili.
Amandio Paulino Gastão de Sousa, Diretór Jeral Desentralizasaun Administrativa Ministériu Administrasaun Estatal iha sesaun abertura konsidera katak liuhosi treinamentu ne’e sei aumenta kapasidade offisiais finanseiru husi 12 Munisípius.
“Liuhosi treinamentu ne’e sira bele ezerse sira nia funsaun ho diak, liu-liu iha area relatóriu finansa munisípius nian no atu hatan mos ba rekomendasaun hosi tribunal das kontas kona-ba relatóriu ezekusaun” hateten Amandio Paulino.
Treinamentu ne’e nudar faze estájiu daruak ho tipo informasaun ne’ebe hanesan, ne’ebe hala’o tiha ona iha parte rai klaran semana kotuk liu ba. Refere ba treinamenu ne’e, Administradór Munisípiu Liquica senti orgullu ba esforsu hosi Ministériu Finansas hodi organiza treinamentu hirak ne’e.
“Treinamentu ida ne’e essensial tebes, tamba ita hakarak haforsa prosesu kona-ba koñesementu, hodi prepara relatóriu ne’ebe mak propiu no dignu no fornese informasaun ba rekursu ne’ebe iha hodi priense qualidade relatóriu” konfesa Domingos da Conseição dos Santos, Administradór Municípiu Liquica.
Treinamentu sei hala’o durante semana ida hahu’u hosi 21 – 25 Maiu 2019, ho total partisipantes hamutuk ema nain 13 ho ninia kompozisaun hosi Munisípiu Dili nain 3, Liquica nain 4, Ermera nain 3 no Bobonaru nain 3.
Ministériu Finansas através hosi DJT sei Kuntinua empenha formasaun refere ba Munisípiu seluk nu’udar parte Kuntinuasaun ba faze daruak ne’ebe sei realiza semana oin ba parte Leste iha Munisípiu Baucau ho ninia kompozisaun partisipantes sei mai hosi Munisípiu Manatuto, Lautem, Viqueque inklui partisipantes hosi Baucau rasik.