• Ministériu Finansas Lansa Sistema Administrasaun Tributária SIGTAS Versaun 3 – Dalan ida atu permite Timor-Leste diversifika ninia ekonomia

Home » Announcements » Ministériu Finansas Lansa Sistema Administrasaun Tributária SIGTAS Versaun 3 – Dalan ida atu permite Timor-Leste diversifika ninia ekonomia Print Page

Ministériu Finansas Lansa Sistema Administrasaun Tributária SIGTAS Versaun 3 – Dalan ida atu permite Timor-Leste diversifika ninia ekonomia

Díli, 29 Novembru 2021 – Ministru Finansas, Rui A. Gomes, Vise-Ministra Finansas, Dra. Sara Lobo Brites, Ministru Turizmu, Komérsiu no Indústria, José Lucas do Carmo da Silva, Ministru Administrasaun Estatál, Miguel Pereira de Carvalho, iha sábadu semana kotuk, lansa ona sistema administrasaun Tributária SIGTAS Versaun 3. Lansamentu sistema informátika versaun avansadu ne’e realiza iha ámbitu selebrasaun loron Proklamasaun Independénsia, Repúblika Demokrátika Timor-Leste ba dala-46.

Lansamentu plataforma eletróniku ba administrasaun tributária ne’e, hanesan pasu importante ida ba Autoridade Tributária, Ministériu Finansas iha ámbitu Reforma Fiskál no Jestaun Finansas Públikas. Ajenda reforma ida ne’ebé inisia ona iha tinan 2015 husi Kintu Governu Konstitusionál no Oitavu Governu Konstitusionál komprometidu atu kontinua implementa ajenda reforma refere.

“Ita hotu hatene katak Estadu Timor-Leste ninia fontes finansiamentu prinsipál ba despeza públiku mak osan sira iha Fundu Minarai. Fontes ida-ne’e ladún hetan ona reseitas petrolíferas tanba folin minarai tun makaas iha merkadu internasionál no volume produsaun mina no gás mós hahú menus ba daudaun,” hateten Rui A. Gomes, Ministru Finansas Timor-Leste. “Ida-ne’e hatudu mai Ita katak Estadu Timor-Leste labele kontinua depende de’it ba osan sira husi Fundu Minarai, liu-liu ba tempu naruk. Tanba ne’e maka tempu ona atu Ita hanoin ho seriedade polítika atu diversifika Ita-nia ekonomia atu nune’e bele sustentável no reziliente hodi bele hasoru xoke-sira tantu husi liur (pandemia Covid-19) no xoke-sira husi laran (kalamidade públiku, dezastre naturál, inundasaun),” Ministru Rui Gomes konklui.

Iha tempu ne’ebé hanesan, Governante nain haat ne’e mós lansa Sistema Janela Únika Nasionál ASYCUDA World ne’ebé sei liga Autoridade Aduaneira ho liña ministériu, ajénsia no institutu públiku Governu ne’ebé mak trata movimentu ema no sásan-sira hanesan Diresaun Jerál Komérsiu, SAMES, E.P., APORTIL, I.P., no Kuarantena.

Sistema koneksaun online ne’ebé mak aplika iha servisu administrasaun públiku hirak ne’e, sei redus atrazu, kustu tranzasaun, inklui tempu libertasaun sásan iha fronteira terrestres, portu no aeroportu. Koneksaun online ne’e sei fasilita liután empreza-sira hodi hala’o sira-nia atividade komérsiu no ajuda Governu liuhusi Ministériu Finánsas atu kolekta reseitas ho maneira ida ne’ebé justu, transparente no efisiente. Reseitas domestikas ne’e rasik bele sai nu’udar fontes finansiamentu alternativu ba despeza Estadu iha tempu naruk.

Hafoin lansamentu plataforma online ne’e, Ministru Rui Gomes no Ministru José Lucas mós sai sasin ba asinatura Protokolu Kooperasaun Tékniku entre Autoridade Aduaneira ho Diresaun Jerál Komérsiu, SAMES, E.P., APORTIL, I.P., no Kuarantena. Objetivu husi protokolu ne’e maka atu estabelese liña komunikasaun formál hodi bele fasilita servisu administrasaun públiku ida ne’ebé mak efisiente no efikaz liután.

Iha tinan 2015, Kintu Governu Konstitusionál introdus ona polítika Reforma Fiskál no Jestaun Finansas Públikas. Tanba ninia importansia, maka iha Programa Oitavu Governu Konstitusionál, Reforma Fiskal no Jestaun Finansas Públikas kontinua sai nu’udar prioridade.

Iha área Reforma Fiskál, Oitavu Governu Konstitusionál kompromete atu halo medidas tolu durante ninia mandatu: 1) Reforma administrativa hodi aloka rekursu umanu ne’ebé própriu iha fatin própriu;
2) Moderniza sistema administrasaun Autoridade Tributária liuhusi utilizasaun sistema informátika ne’ebé atualizada; purizemplu, atualiza sistema SIGTAS husi Versaun 1 ba Versaun 3 (avansadu liu); 3) Fasilita kontribuinte-sira atu aloka rekursu ho efisiente no efikáz nune’e bele enkoraja disiplina konformidade tuir Lei, hodi ikus mai bele kontribui ba aumentu reseitas ba Estadu, liu-liu impostu la’ós-minarai. ***