• Ministériu Finansas Lansa Sistema Informasaun Ofisina Nasionál

Home » Anúnsiu » Ministériu Finansas Lansa Sistema Informasaun Ofisina Nasionál Imprime pájina

Ministériu Finansas Lansa Sistema Informasaun Ofisina Nasionál

20191010_Ministériu Finansas Lansa Sistema Informasaun Ofisina Nasionál 1

Hodi hatan ba servisu ofisina nasionál ne’ebé mak durante ne’e aplika sistema servisu manual wainhira halo konfirmasaun ba relatóriu manutensaun liuhosi rekonsiliasaun manual ne’ebé dalabarak la refleta ba nesesidade ne’ebé maka iha, Ministériu Finansas liuhosi Diresaun Nasionál Monitorizasaun Jestaun Patrimoniu Estadu (DNMGPE), ofisialmente iha loron 9 Outubru 2019 lansa Sistema Informasaun Ofisina Nasionál (SION) nu’udar parte importante kona-ba promove transparénsia iha prosesu ezekusaun manutensaun viatura estadu ho integridade iha servisu ofisina nasionál. Lansamentu ne’e mos koinsidi ho festa aniversriu Ofisinal Nasionál ba dala lima.

“Sistema ne’e introdus komponente lubuk ida para depois ita bele hetan informasaun hahu’u hosi prosesu administrasaun, inspesaun ba kareta, manutensaun, reparasaun to hasai sparepart (pesa kareta) hosi ita nia armajen no finalmente halo validasaun ba ita nia manutensaun no reparasaun”, hateten Januario da Gama Diretór Jerál Finansas Estadu Ministériu Finansas.

Vantajen hosi aplikasoens sistema online ne’e bele produs fatura ou invoice ba servisu manutensaun ne’ebé akontese hodi bele kontrolu gastus manutensaun hosi viatura estadu sira ho efisiensia liuhosi kontrola ba Sistema Informasaun Ofisina nian. Iha parte seluk, aplikasoens sistema ne’e mos bele ajuda Governu hodi halo kontrolu despezas ba gastus viatura estadu antes ofisina nasionál rekomenda viatura hirak ne’e ba ofisina privadu hodi halo manutensaun bazeia ba rekomendasaun ne’ebé fo sai hosi Sistema Informasaun Ofisina Nasionál nian.

Diretor Jeral Finansas Estadu salienta liutan katak wainhira ofisina privadu sira halo manutensaun no reparasaun hotu ona, tenke lori viatura mai fali ofisina nasionál hodi halo inspesaun final bazeia ba rekomendasaun hosi ofisina nasionál antes halo reparasaun.

“Ho nune’e ita bele komprova katak sasan ne’ebé ita rekomenda hadia duni no hatudu iha nia kualidade manutensaun no reparasaun, inklui despezas sira ne’ebé halo iha duni rasionalidade ka la’e” dehan Januario da Gama.
Oras ne’e, ekipamentus ofisinal nasionál atinji ona pursentu 85 hodi halo manutensaun no reparasaun ba viaturas estadu. Ba tinan 2020, Ministériu Finansas sei kontinua koloka orsamentu balun hodi bele kompleta ekipamentus ne’ebé atualmente ofisina nasionál seidauk iha.