• Ministeriu Finansas Lansa Sistema SIGTAS iha Baucau

Home » Anúnsiu » Ministeriu Finansas Lansa Sistema SIGTAS iha Baucau Imprime pájina

Ministeriu Finansas Lansa Sistema SIGTAS iha Baucau

20190207_1

Ministériu Finansas liuhosi Autoridade Tributária hala’o lansamentu ba sistema Standard Integrated Government Tax Administration “SIGTAS iha Munisipiu Baucau ho objetivu atu bele fasilita setor privadu iha Munisipiu Lautem, Viqueque, Manatutu inklui Baucau hodi bele asesu ba servisu impostu nian, Lansamentu refere realiza iha edifisiu Autoridade Tributária Munisipiu Baucau, loron 5 Fevereiru 2019.

Lansamentu ne’e nu’udar programa kontinuasaun hosi planu Governu hodi bele aumenta servisu Autoridade Tributária ba munisipiu hodi fasilita setor privadu ou kontribuentes sira bele asesu ba sistema servisu Autoridade Tributária nian. Ho ninia objetivu hodi kria kondisaun ou promove ambiente negosiu atu fasilita kontribuintes selu sira nia direitu ba impostu.

“Ita nia esperansa bo’ot tebes atu bele estende sistemas, aumenta rekursu, hadia mekanismu to iha munisipiu sira seluk. Tanba Reseitas sira ne’ebé ita rekolla tama ba iha konta konsolidadu depois maka sei halo distribuisaun liuhosi Orsamentu Jerál Estadu”, informa Ministra en Ezersisiu no Vise Ministra Finansas Sara Lobo Brites iha lansamentu sistema SIGTAS.

Diresaun Jerál Impostu hamrik nu’udár Autoridade Tributária tuir Dekretu lei No 7/2017 loron 5 Fulan Abril. Autoridade Tributária fó kedas prioridade atu hare’e oinsa bele servi diak liutan no atende nesesidade kontribuientes ka kliente hotu iha munisipiu sira. Tuir relatoriu avaliasaun edifisiu repatriasaun Autoridade Tributária Rejional Munisipiu Baucau maka iha ona liña governu hodi bele asesu sistema impostu ka Sigtas, para bele halo atendimentu direta ba nesesidade kontribuientes sira nia iha Munisipiu Baucau, Manatutu, Viqueque no Lautem.

“Prosesu ida ne’e hanesan etapa importante ne’ebé Autoridade Tributária hahu’u implementa programa Ministériu Finansas nian hodi desentraliza servisu ba Munisipiu para bele presta servisu besik liutan ba komunidade”, hateten Diretora Jerál Autoridade Tributária Monica Rangel da Cruz.

Iha sorin seluk Prezidenti Cámara Comércio Industria (CCI) Munisipiu Baucau Estanislau Maria Quintas da Costa orgullu no agradese tebes ba governu bele instala ona Sistema Sigtas bele fasilita komersiu iha munisipiu sira.

Implementasaun SIGTAS nu’udar aparellu hodi apoia sistema operasional ho efetivu ho forma efikaz. Komponente ne’e sei apoia hasae kualidade dadus rejistu nian hodi bele iha dadus kunfiável hosi kontribuintes sira.

Ministériu Finansas mak órgaun sentral Governu nian ne’ebe responsável ba elaborasaun, ezekusaun, koordenasaun no avaliasaun polítikas aprovadu husi Konsellu Ministrus, iha área Planeamentu anual, monitorizasaun inklui orsamentu no finansas.