• Ministériu Finansas no Uniaun Européia Diskute Progresu, Dezafiu no Diresaun ba Futuru, Reforma Jestaun Finansas Públikas

Home » Anúnsiu » Ministériu Finansas no Uniaun Européia Diskute Progresu, Dezafiu no Diresaun ba Futuru, Reforma Jestaun Finansas Públikas Imprime pájina

Ministériu Finansas no Uniaun Européia Diskute Progresu, Dezafiu no Diresaun ba Futuru, Reforma Jestaun Finansas Públikas

Díli, 17 setembru 2021 – Ministru Finansas Rui Augusto Gomes no Vise-Ministra Finansas, Sara Lobo Brites hamutuk ho dirijentes relevante husi Ministériu Finansas partisipa iha Diálogu Polítika kona-ba Jestaun Finansas Públikas ne’ebé mak prezide husi Embaixadór Uniaun Européia mai Timor-Leste, Andrew Jacobs.

Diálogu polítika ne’e hanesan forum ida ba Governu, Parlamentu Nasionál, Kámara Konta, Uniaun Européia, Sosiedade Sivíl, Parseirus Dezenvolvimentu no parte interesada sira seluk hodi diskute kona-ba estatutu, progresu, diresaun no dezafiu sira husi implementasaun Reforma Jestaun Finansas Públikas.

Diálogu ne’e mós kobre Governu ninia estratéjia Jestaun Finansas Públikas iha tempu badak no tempu mediu, apoiu Jestaun Finansas Públikas ne’ebé mak fornese husi Uniaun Européia no Parseirus Dezenvolvimentu sira seluk.

Ministru Finansas, Rui Augusto Gomes hateten “Apoiu Orsamentu Direta ne’ebé mak Uniaun Européia fornese espesifikamente ba Ministériu Finansas, sei signifikativamente kontribui ba área sira krítiku husi Reforma Jestaun Finansas Públikas ne’ebé mak sei presiza asisténsia, inklui fortalesimentu efetividade, integridade, orientasaun sidadaun, ezekusaun no kontrolu finansas públikas. Diálogu Polítika ohinloron mak forum ida ne’ebé própriu atu diskute progresu iha implementasaun polítika no, iha tempu ne’ebé hanesan, identifika lakunas ne’ebé mak sei eziste iha Ita-nia servisu parseria, ho objetivu atu hametin liután koordenasaun entre parte interesada sira hotu relasiona ho programas finansiadu husi Uniaun Européia, buka atu haforsa liután ami-nia jestaun finansas públikas no supervizaun”.

Uniaun Européia nia kontribuisaun finanseira ba Reforma Jestaun Finansas Públikas (Apoiu Direta no Asisténsia Tékniku) hamutuk millaun $35. Apoiu ne’e aliña ho PEDN 2011-2030 ba fornesimentu servisus públiku ida ne’ebé di’ak no justu ba povu Timor-Leste. Uniaun Européia nia apoiu ne’e transfere diretamente ba iha Konta Tezouru no hanesan kontribuisaun ida ba Timor-Leste nia orsamentu. Uniaun Européia hanesan úniku fornesedór Apoiu Orsamentu ne’ebé diretamente ba iha Tezouru Timor-Leste. Ida-ne’e hatudu sinál konfiansa husi Uniaun Européia ba iha sistema no Instituisaun Governu no Timor-Leste apresia tebes ba konfiansa ida-ne’e.