• Ministériu Finansas ofisialmente ensera formasaun ba Ajensia Autonoma sira

Home » Anúnsiu » Ministériu Finansas ofisialmente ensera formasaun ba Ajensia Autonoma sira Imprime pájina

Ministériu Finansas ofisialmente ensera formasaun ba Ajensia Autonoma sira

20191014_Ministériu Finansas ofisialmente ensera formasaun ba Ajensia Autonoma sira

Iha loron 11 Outubru 2019, Ministériu Finansas ofisialmente liuhosi Diresaun Nasionál Tezouru ensera treinamentu ba ofisiál finansas ajensia autonoma sira kona-ba Relatóriu Rekonsiliasaun Bankária, Relatóriu Ezekusaun Orsamentu Trimestral nomós Relatóriu Fluksu de Kaixa. Enseramentu ne’e hala’o iha auditoriu Kay Rala Xanana Gusmao, Ministériu Finansas depois 36 pesoál oficiais finansas hosi Ajensia Autonoma sira tuir formasaun durante semana rua hahu’u hosi 30 Setembru – 11 Outubru 2019.

Ministra Finansas En Ezersisiu no atual Vise Minsitra Finansas Sara Lobo Brites iha sesaun enseramentu fo importânsia hosi formasaun hirak ne’e nu’udar parte hosi reforma jestaun finansas publikas ne’ebé governu hakarak promove desentralizasaun liuhosi formasaun oin-oin iha área finansas publikas ba ministériu no ajensia autonomas nomós munisípiu sira.

“Hanesan ita hotu-hotu akompaña iha 2016 kedas governu iha pasadu inisia ona programa desentralizasun no deskonsentrasaun ne’ebé maka fahe ona kna’ar lubuk ida iha Ministériu Finansas ba iha ajensia automas no munisípiu sira atu administra sira nia orsamentu no hala’o sira nia ezekusaun orsamentu” informa Vise Ministra Finansas iha ninia diskursus enseramentu formasaun pirante formador no participantes tomak.

Ministra Finansas Interina kuntinua realsa liu katak pesoál hirak ne’ebé servisu iha área finansas tenki iha koñesimentu mós ba iha orsamentu, aprovizionamentu, auditoria no rekolla reseitas .

“Liuhosi formasaun ne’e iha futuru sira bele kumpri ona lei jestaun finansas publiku. Aumesmu tempu kumpri ona rekomendasaun Camara de Contas ne’ebé husu atu ajensia no munisípiu sira prepara rasik sira nia relatóriu finanseiru anual”. Tenik Diretór Nasionál Kontabilidade No Regulasaun Finanseiru, Ministériu Finansas, Ernesto Da Conceição Silva.

Diresaun Jerál Tezouru hosi Ministériu Finansas iha mos planu hodi realiza formasaun hodi konklui komponente tolu hanesan Rekonsiliasaun Bankária, Prepara Relatóriu Ezekusaun Orsamentu Trimestral nomós Prepara Relatóriu Fluksu De Kaixa liuhosi formasaun ne’ebé planeada hala’o entre fulan Novembru no Dezembru tinan ne’e.

“Agradese tebes ba formadór sira tanba iha tempu ne’ebé badak ami hetan esperensia durante tuir formasaun semana rua nia laran. Ami hetan buat balun hosi formasaun ne’e no ajuda duni ami liu-liu iha rekonsiliasaun banku ba ajustamentu orsamentu no oinsa maka atu halo jornal no ajustamentu kona-ba cash flow” hateten reprezentante partispantes Aderito Soares.

Formasaun ne’ebé hetan suporta hosi Uniaun Europeia (EU) através hosi Diresaun Jerál Tezouru Ministériu Finansas ho ninia alvu hasa’e koñesimentu ba ofisiál finansas ajensia autonomu nomós munisípiu sira iha área kontabilidade, nu’udar formasaun kuntinuasaun hosi formasaun ne’ebé mak antes ne’e hala’o tiha ona ba munisípiu. Liuhosi formasaun ne’e pesoál responsável sira hosi ajensia autonomu no munisípiu bele prepara relatóriu ezekusaun orsamentu trimestralmente no relatóriu finanseiru anual ho diak tuir prosidementus ne’ebé mak iha.