• Ministériu Finánsas Organiza Sesaun Traballu kona-bá Pakote Fiskál 2021

Home » Announcements » Ministériu Finánsas Organiza Sesaun Traballu kona-bá Pakote Fiskál 2021 Print Page

Ministériu Finánsas Organiza Sesaun Traballu kona-bá Pakote Fiskál 2021

Segunda-feira, 11 Janeiru 2021 – funsionariu tékniku husi liña ministeriál no institusaun autónoma Governu halibur hamutuk iha sesaun traballu loron ida hodi diskute pakote fiskál 2021 ne’ebé mak aprova ona. Sesaun traballu ida-ne’e organiza husi Diresaun Nasionál Planeamentu no Orsamentu, Ministériu Finánsas, Timor-Leste.

Sesaun traballu – ofisiálmente loke husi Minístru Finánsas, S.E. Dr. Rui A. Gomes – foku ba iha diseminasaun informasaun kona-bá Regras kona-ba ezekusaun Orsamentu Jerál Estadu 2021 ne’ebé mak aprova ona.

“Dekretu Governu ida-ne’e garante kontrolu orsamentál ida ne’ebé mak efikaz no rigorozu no simplika prosedimentu sira kona-ba ezekusaun orsamentál. Dekretu ne’e obriga ita atu disiplina liután iha ita-nia despeza públiku bazeia ba saída mak define ona iha Lei Orsamentu Jerál Estadu,” dehan Minístru Gomes iha nia diskursu abertura.

“Ida-ne’e signifika katak, kualker despeza públiku tenke fó benefisiu ba Timoroan sira, fornese prestasaun servisu ida ne’ebé efetivu, efikáz no justu ba ita-nia sosiedade hodi kontribui alkansa ita-nia metas planu anuál,” Minístru akresenta.

Minístru Finánsas mos enkoraja liña ministeriál no institusaun autónoma sira hotu atu kumpre regras aprovadu, evita alterasaun verbas ne’ebé la-nesesáriu no foku sira nia esforsu hodi implementa atividade no programa sira hotu ne’ebé mak planu ona. Minístru mós husu ofisiál sira hotu ne’ebé mak partisipa iha sesaun traballu ne’e, atu fó atensaun ba aprezentasaun sira husi funsionáriu tékniku tanbá informasan hirak ne’e sei ajuda sira atu ezekuta ho susesu Orsamentu Estadu 2021.

Serimónia abertura ne’e konklui ho entrega ofisiál Pakote Fiskál 2021husi Ministru Rui A. Gomes ba reprezentante sira husi Gabinete Prezidensia-da-Repúblika, Parlamentu Nasionál, Tribunál Rekursu no Gabinete Primeiru-Minístru, Timor-Leste.

Molok organiza sesaun traballu ida-ne’e, Conselho do Ministros hala’o Sorumutuk Extraordináriu iha 8 janeiru 2021 no aprova ona proposta Dekretu Governu kona-ba ezekusaun Orsamentu Jerál Estadu ba tinan-2021, ne’ebé mak aprezenta husi Minístru Finánsas, S.E. Dr. Rui A. Gomes. Dekretu ida-ne’e defini regras relasiona ho ezekusaun Orsamentu Jerál Estadu ba tinan-2021, aprovadu husi Lei nú.14/2020, 29 dezembru no aplika ba orsamentu-sira ba órgaun no servisu-sira husi Administrasaun Sentrál, Rejiaun Administrativa Espesiál Oekusi-Ambenu no Seguransa Sosiál.

Diploma ida-ne’e hakarak fó garantia ba efetivu no rigorozu kontrolu orsamentál no, iha tempu ne’ebé hanesan, atu simplifika prosedimentu sira kona-ba ezekusaun orsamentál, ne’ebé fó kontinuidade ba mudansa sira ne’ebé hahú ona iha tinan 2020, ho objetivu atu fasilita ezekusaun Orsamentu Jerál Estadu tinan-2021 husi órgaun no servisu-sira husi Setór Admistrativu Públiku.

Iha 12 Dezembru 2020, Parlamentu Nasionál aprova ona Orsamentu Jerál Estadu 2021 ho montante total US$ Billaun 1,895 ne’ebé governu formula ho objetivu atu rekupera fila-fali ekonomia rai-laran, investe ba iha kapitál umanu no fornese foin-sa’e sira ho oportunidade atu tama iha merkadu traballu.