• Ministériu Finansas Realiza Semináriu Jornada Orsamental 2020

Home » Anúnsiu » Ministériu Finansas Realiza Semináriu Jornada Orsamental 2020 Imprime pájina

Ministériu Finansas Realiza Semináriu Jornada Orsamental 2020

20190701_MINISTERIU FINANSAS REALIZA SEMINARIU JORNADA ORSAMENTAL 2020 1

Ministériu Finansas realiza semináriu nasionál Jornada Orsamentál 2020 ho tema “Promove Kualidade Planeamentu no Orsamentu Hodi Hadia Prestasaun Servisu Públiku” ho objetivu ba dezenvolve sustentável programasaun hosi VIII Governu Konstituisionál no planu asaun anual, atividade refere realiza iha Salaun Auditorium Xanana Gusmão Ministériu Finansas, loron 27 Juñu 2019.

Jornada Orsamentál ne’ebé hala’o kada tinan nu’udar sorumutu anual hodi marka inísiu ba prosesu sira iha ambitu elaborasaun orsamentu annual ho hanoin atu defini Prioridades Nacionais ho forma ida ne’ebé enkuadra Planeamento no Implementação hosi Planu Estratéjiku Desenvolvimentu Nasionál ba periudu 2011 – 2030, hosi Objetivu sira ba Desenvolvimentu Sustentável nian.

VIII Governu Konstitusionál ne’ebé atualmente lidera hosi Primeiru Ministru Taur Matan Ruak pirante diskusaun Jornada Orsamental 2020 afirma pozisaun Politika Governu hodi re-ajusta hikas fali prioridades ba pilares tolu hosi aspeitu dezenvolvimentu nian refere ba Planu Estratéjiku Dezenvolvimentu Nasionál (PEDN) mak hanesan: atensaun ba iha area urbana, Kestoens Ekonomia Nasionál no kondisaun Infra-estrutura

“To ona tempu atu redus infra-estrutura hodi aumenta iha setor ekonomia” hateten Primeiru Ministru Taur Matan Ruak iha sesaun abertura Jornada Orsamental 2020. Aprezentasaun ne’ebé hala’o durante oras ida resin, Primeiru Ministru mos husu atu hamosu sentidu nain ba obra liuhosi projetu komunitaria.

Jornada Orçamental 2020 hakarak hetan objetivo prinsipal rua mak hanesan: Atu Define prioridades nasionais ba tinan 2020. Ho nune’e bele enkuadra iha forma mediu prazu, ne’ebé alina ho periudo Governasaun atu nune’e bele defini teto orsamental ba kada tinan hosi 2020 too 2023 ho forma ida de ne’ebé realistiku, efikaz e sustentável hodi bele asegura ekonomia rai laran nomos antesipa inserteza sira ne’ebé kauza hosi ekonomia global.

Iha parte seluk diskusaun hosi jornada ne’e mos atu determina tetu fiskal ba Orsamentu Jeral Estadu 2020 bazeia duni ba postura orsamentu ida ne’ebé responde ba situasaun krítiku balun ne’ebé Governu tenke tau atensaun makas.

“ Ita hotu hakarak atu elabora Orsamentu 2020 ho prinsípiu ida ne’ebé orientadu liu ba atu hamenus kiak no mukit, investe iha rekursus humanus hodi bele aselera dezenvolvimentu” hateten Ministra Finansas Interina no atual vise Ministra Finansas Sara Lobo Brites iha diskursu durante realizasaun jornada orsamental 2020.

Semináriu loron ida ne’e, ekipa tékniku hosi Ministériu Finansas, UPMA inklui Banco Central Nasional Timor Leste (BNCTL) hato’o matérias prioridades hanesan avaliasaun desempeñu sósio-ekonómiku, análise ba desempenu reseitas no despezas atuais, desempeñu investimentu fundu petrolífera, Dezenvolvimentu iha Setor Finanseiru no programas ba inklusaun finanseira.

Partisipa iha semináriu ne’e Prezidenti Parlamentu Nasional, Arao Noe Amaral, Prezidenti autoridade Munisípiu sira, Sociadade sivíl inklui mos kargu xefia sira hosi varias instituisaun estadu hotu.

Nota: Atu hare’e diskursu Ministra Finansas En Ezersisiu no atual Vise Ministra Finansas Sara Lobo Brites iha SEMINÁRIU JORNADA ORSAMENTAL 2020 , click iha link tuir mai:
Diskursu Ministra Finansas En Ezersisiu no atual Vise Ministra Finansas Sara Lobo Brites iha semináriu Jornada Orsamentál 2020