• Ministériu Finansas Realiza Semináriu Jornada Orsamentál 2022 Hodi Diskute Prioridades Nasionál no Determina Tetu Fiskál OJE 2022

Home » Anúncios » Notícias » Ministériu Finansas Realiza Semináriu Jornada Orsamentál 2022 Hodi Diskute Prioridades Nasionál no Determina Tetu Fiskál OJE 2022 Imprimir a página

Ministériu Finansas Realiza Semináriu Jornada Orsamentál 2022 Hodi Diskute Prioridades Nasionál no Determina Tetu Fiskál OJE 2022

Díli, 29 juñu 2021 – Governu Timor-Leste liuhusi Ministériu Finansas (MF) serbisu hamutuk ho Unidade Planeamentu, Monitorizasaun no Avaliasaun (UPMA), ohin, realiza Semináriu Nasionál Jornada Orsamentál ba Orsamentu Jerál Estadu (OJE) Tinan 2022 ho tema “Kualidade Orsamentu, Kresimentu Inkluzivu no Sustentavel”.

Semináriu Jornada Orsamentál ne’e prezide husi Primeiru-Ministru, Sua Exelénsia Jenerál Taur Matan Ruak ho objetivu prinsipál mak atu diskute Prioridades Nasionál ba tinan oin no Determina Tetu Fiskál ida ne’ebé realístiku ba OJE 2022.

Konstituisaun Repúblika Demokrátika Timor-Leste, Artigu 145, fó kompetensia ba Governu atu prepara, elabora no submete OJE nu’udar Proposta de Lei ba Parlamentu Nasionál nu’udar Órgaun Soberanu Lejislativu atu hetan aprovasaun. Operasionalizasaun kompeténsia ne’e hatuur Ministériu Finansas nu’udar órgaun ida ne’ebé mak dirije preparasaun no elaborasaun OJE tomak atu konklui tuir kalendáriu aprovadu husi Konsellu Ministrus.

Ministru Finansas, Rui Augusto Gomes iha ninia mensajen introdusaun hateten “To’o ohin loron, Timor-Leste iha de’it instrumentu ida ne’ebé Governu uza hodi provoka kresimentu no dezenvolvimentu ekonómiku, mak Orsamentu Jerál Estadu. Atu instrumentu ne’e bele efetivu no efikaz, presija halo melloramentu lubuk ida, inklui rejime orsamentál no jestaun finansas públika.”

“Orsamentasaun Bazeia ba Programa, nu’udar meiu ida atu garantia katak osan sira kada tinan Ita foti husi Fundu Petrolíferu, kobransa impostu hosi kontribuinte sira, no empréstimu husi Doadór sira, fó duni benefísiu ba Povu, hadi’ak kualidade prestasaun servisus públiku, no alkansa metas sira ne’ebé mak Governu aprova ona,” Ministru konklui.

Durante Jornada Orsamentál loron ida-ne’e, ekipa tékniku husi MF no UPMA halo aprezentasaun kona-ba Diretivas tuir Planu Estratéjiku Dezenvolvimentu Nasionál (PEDN) 2011-2030 no atualizasaun progresu sira ne’ebé mak atinji ona liga ho PEDN no Planu Rekuperasaun Ekonómiku (PRE).

Ekipa tékniku sira mós aprezenta avaliasaun impaktu Covid-19 ba atividades sosiu-ekonómiku ho nia implikasaun fiskál no ekonómiku, nesesidade no medidas esensiál ne’ebé presiza estabelese ba prevensaun no protesaun grupu vulneravel inklui implikasaun jéneru no normas sosiál.
Governadór Banku Sentrál Timor-Leste, Abraão de Vasconselos mós aprezenta tópiku Dezenvolvimentu Setór Finanseiru iha Timor-Leste. Aleinde ne’e, Prezidente Konsellu Administrasaun Banku Nasionál Komérsiu Timor-Leste, Brígido de Sousa mós aprezenta kona-ba Papel BNCTL iha Dezenvolvimentu setór Privadu: Dezafiu, Oportunidade no Perspetiva sira ba Futuru.

Semináriu ne’e konklui ho diskusaun no aprezentasaun kona-ba proposta programa prioridade sira hodi deside tetu fiskál ida ne’ebé realístiku ba proposta OJE 2022. Sesaun diskusaun ne’e lidera husi Sua Exelénsia Primeiru-Ministru no Ministru Finansas.
Semináriu ne’e hahu ho aprezentasaun dansa kulturál husi Asosiasaun Arte no Kultura Timor Furak ho partisipasaun husi membrus Governu Konstitusionál Daualuk tomak, reprezentante sira husi Parlamentu Nasionál, Autoridade Munisipál no RAEOA, Sosiedade Sivíl, Jestores, Téknikus, Assesóres inklui mídia.

Iha OJE 2021, Governu Konstitusionál Daualuk hahú implementa Orsamentu Bazeia ba Programa ho forma kompletu – ida ne’e tranzisaun ida husi Orsamentu Bazeia ba Item ne’ebé mak implementa desde Timor-Leste restaura ninia Independénsia tinan 19 liubá.

Elementu xave ida husi OJE 2021 mak oinsá rekupera fila-fali Timor-Leste nia ekonomia ne’ebé iha tinan haat nia laran enfrenta resesaun tolu kedas. Rekuperasaun ida ne’e seidauk akontese tuir planu tanbá Timor-Leste hahú tinan ida-ne’e ho moras Covid-19 no kalamidade.

Iha 23 juñu 2021, hafoin rona aprezentasaun husi ekipa tékniku MF no UPMA, Konsellu Ministrus mós aprova projetu Deliberasaun kona-ba Kritériu Rasionalizasaun Estrutura Programátiku OJE 2022 iha ne’ebé Governu halo ona alterasaun balun iha rasionalizasaun estrutura programátiku atu hasa’e efisiénsia no efikásia iha ezekusaun, no mós, atu hadi’ak liután kapasidade monitorizasaun no kontrolu ba implementasaun programa ho atividade sira ne’ebé mak Governu propoin.

Ho introdusaun polítika foun ne’e, ba oin, Governu Konstitusionál Daualuk hakarak atu asegura servisu públiku ida ne’ebé prudente ho rasiosinu sosiu-ekonómiku; hakat husi Orsamentu pur Item ba Orsamentu pur Programa hodi asegura rezultadu reál husi ezekusaun, la’ós persentajen ezekusaun de’it no redus númeru programa husi 145 programas tun ba másimu 30 programas hodi fó biban ba Governu, foku ba kualidade no kontrolu ezekusaun OJE. ***