- Ministériu Finansas relata Prioridades 2020 Ba Liña Ministériu Sira
Home » Anúnsiu » Ministériu Finansas relata Prioridades 2020 Ba Liña Ministériu Sira Imprime pájina
Ministériu Finansas relata Prioridades 2020 Ba Liña Ministériu Sira
Ohin iha Auditoriu Kay Rala Xanana Gusmão Ministériu Finansas, Aitarak Laran, loron 6 Agostu 2019, Ministériu Finansas hala’o enkontru ho liña Ministériu no institusoens estadu relevantes hotu hodi diskuti programa governu tinan 2020 nomós halo revizaun ba Ezekusaun Orsamentu Jerál Estadu (OJE) 2019.
Inisiativa ba sorumutu ne’e mai hosi Primeiru Ministru VIII Governu Konstitusionál, Taur Matan Ruak hodi involve mos Vise Ministru no Sekretariu Estadu sira hotu hodi bele hetan informasaun klean kona-ba prosesu ezekusaun Orsamentu Jerais Estadu 2019 inklui mos koalia kona-ba area prioridades ba tinan 2020.
“Iha enkontru Konsellu Ministru marka prezensa Ministru sira deit. Entaun Vise Ministu no Sekretariu Estadu sira dalaruma la informadu kona-ba programas sira ne’ebé governu hakarak implementa iha orsamentu 2020. Entaun enkontru ida ohin atu bele halo diskusaun klean liu nomós halo revizaun balun kona-ba ezekusaun orsamentu 2019” dehan Vise Ministra Finansas, Sara Lobo Brites.
Ezekusaun Orsamentu Jerál Estadu (OJE) 2019 oras ne’e atinzi ona 46.1% ho ninia kompozisaun fahe ba Saláriu Vensimentu, Bens Servisu no Transferensia Públikas atinzi ona 50%. Ba Kapital Minor no Kapital Dezenvolvimentu sei lao ho volume ki’ik.
Sorumutu ne’e rasik atu bele hatan ba iha rezultadu Sorumutu Jornada Orsamental ne’ebé hala’o tiha ona iha loron 27 Junu 2019 hodi koalia kona-ba prioridades nasionais no senáriu agregadu Tetu Fiskal OJE 2020 no mos aprovasaun hosi Konsellu Ministru iha loron 31 Jullu 2019 kona-ba prioridades nasionais tinan 2020.
Aban, loron 7 Agustu 2019 iha Auditoriu Kay Rala Xanana Gusmão, Aitarak Laran, Ministériu Finansas ofisialmente sei entrega Tetu Orsamentu 2020 ba responsavies hotu hosi Institusoens Estadu, Servisus Fundus Autónomus inklui responsavies hosi Munisípiu hotu. Ministériu Finansas sei realiza sorumutu ho Diretores Jerais, Diretores Nasionais Administrasaun Finansas inklui Pontus Fokais Orsamentu no Planeamentu hosi Institusoens Estadu no Servisu Fundus Autónomus sira inklui responsaveis munisípiu hotu.